جۇما, 29 ناۋرىز 2024
جاڭالىقتار 6086 0 پىكىر 3 ناۋرىز, 2016 ساعات 11:32

اقىن رافاەل نيازبەكپەن كەزدەسۋ ءوتتى

جاقىندا م.اۋەزوۆ اتىنداعى ادەبيەت جانە ونەر ينستيتۋتىندا اقىن رافاەل نيازبەكوۆپەن كەزدەسۋ ءوتتى. شاراعا ءال-فارابي اتىنداعى قازاق ۇلتتىق ۋنيۆەرسيتەتىنىڭ جانە «عىلىم ورداسى» كەشەنىنىڭ بازاسىنداعى عىلىمي زەرتتەۋ ينستيتۋتتارىنىڭ بىرلەسكەن ءبىلىم بەرۋ باعدارلاماسى بويىنشا ءبىلىم الىپ جاتقان ءبىر توپ جاس ادەبيەتشىلەر قاتىستى.

فيلولوگيا عىلىمدارىنىڭ دوكتورى گۇلجاھان وردانىڭ باستاماسىمەن «تاۋەلسىزدىك كەزەڭدەگى قازاق ادەبيەتى» ءپانىنىڭ اياسىندا بۇعان دەيىن س.اسىلبەكۇلى، س.قوسان، ن.اقىش سىندى بەلگىلى قالامگەرلەرمەن كەزدەسۋلەر وتكىزىلگەن بولاتىن. شارانىڭ نەگىزگى ماقساتى تاۋەلسىز قازاق ادەبيەتىنىڭ ومىرشەڭدىگىن دالەلدەپ، ەگەمەندىك تاريحىن شىعارمالارىنا ارقاۋ ەتكەن قالامگەرلەرمەن جان-جاقتى تانىسىپ، بۇگىنگى ادەبيەتتىڭ تىنىسىن، باعىت-باعدارىن ايقىنداپ، بولاشاق ادەبيەتشىلەردى ىرگەلى ىزدەنىستەرگە دايىنداۋ. 

بۇل جولى باتىر اقىن رافاەل نيازبەكوۆتىڭ شىعارماشىلىعىن تالقىعا سالعان جاس زەرتتەۋشىلەر قالامگەردىڭ ءوز اۋزىنان جىر تىڭداپ، ءومىرى مەن شىعارماشىلىعىمەن جاقىن تانىسۋعا مۇمكىندىك الدى. اساۋ شابىتتى اقىن تاعدىرى جايلى كەڭ ماعلۇماتتارمەن قانىققان قاتىسۋشىلار كوپتى كورگەن اقىننىڭ دانا تۇجىرىمدارىن دا ءتۇرتىپ وتىردى. اقىننىڭ «بۇل وتپەلى زاماندا ادام بارلىعىنان ايرىلۋى مۇمكىن، تەك ءبىلىم عانا ماڭگى ايرىلمايتىن بايلىق» دەگەن پاراساتتى ءسوزى جاس ىزدەنۋشىلەردىڭ تالابىنا قانات بىتىرگەنى ءسوزسىز.

«كەلەر كۇندەر»، «قاراتاۋ مەن الاتاۋ»، «تەمىرقازىق»، «بيىكتەي بەر، تاۋلارىم!»، «تامۇق وتىنا جانباعان»، «شەشەندەر»، «تىڭدا ءمانى، زامانا»، «قىدىر عۇمىر»، «ماحامبەت مايدانى»، «جۇرەگىمدە عاسىرلاردىڭ سالماعى» سىندى بىرنەشە جىر جيناقتارى،  «قىزىل ءۇي»، «تاس قۇداي» اتتى ت.ب. پروزالىق شىعارمالارى جارىق كورگەن قوس قاناتتى قالامگەردىڭ جۋىردا التى تومدىق تاڭدامالى جيناعى باسپا بەتىن كوردى. جالىندى جىرلارىمەن قالىڭ وقىرماننىڭ جۇرەگىن باۋراعان رافاەل نيازبەكوۆ  I. جانسۇگىروۆ اتىنداعى سىيلىعى، شەشەنستان رەسپۋبليكاسى جوعارعى مەملەكەتتىك «ۇلت نامىسى» وردەنى، شەشەنستان مەملەكەتتىك سىيلىعى ماراپاتتارىنا يە بولعان. قارىمدى قالامگەردىڭ بۇگىنگى ادەبيەت پەن قوعام تۋرالى وتكىر پىكىرلەرىنەن اقىندىق قۋاتى ءالى دە سارقىلماعانى بايقالدى. اڭگىمە سوڭى اقىننىڭ باتاسىمەن اياقتالىپ، سىي-سىياپاتقا ۇلاستى.

تەمىرلان جوراباي

Abai.kz 

 

 

0 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1576
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2272
عيبىرات

قايسار رۋحتى عازيز جان

مۇحتار قۇل-مۇحاممەد 3590