وڭىرلىك كاسىپكەرلەر پالاتاسىنىڭ مۇرىندىق بولۋىمەن قۇرىلعان «مايتوبە جانە ك» كووپەراتيۆىنىڭ قۇرامىنا 4 شارۋا قوجالىعى كىرەدى

مەركى اۋدانىنىڭ كاسىپكەرلەرى بىرىگىپ جاسالعان جۇمىستا بەرەكەنىڭ مول بولاتىنىن جاقسى تۇسىنەدى. بيىلعى جىلدىڭ 1 قاڭتارىنان باستاپ «اۋىلشارۋاشىلىق كووپەراتسياسى تۋرالى» زاڭ كۇشىنە ەنگەندە مەركىلىك شارۋالار ونى العاشقى بولىپ قولدادى. رەسپۋبليكا بويىنشا پيلوتتىق جوبا رەتىندە قولعا الىنعان 4 كووپەراتيۆتىڭ ءبىرى وسى اۋداننىڭ شارۋالارىنىڭ كۇشىمەن قۇرىلدى. بۇگىندە ءسۇت وڭدەۋ جانە ءسۇت ونىمدەرىن شىعارۋمەن شۇعىلداناتىن «مەركى ونىمدەرى» كووپەراتيۆىنىڭ قۇرامىنا 42 شارۋا قوجالىعى توپتاسقان. بيىل 1,7 مىڭ توننا ءسۇت ونىمدەرىن شىعارۋدى جوسپارلاپ وتىرعان كووپەراتيۆتىڭ قۇرىلۋىنا كاسىپكەرلەر پالاتاسى ۇلكەن بەلسەندىلىك تانىتتى. ناقتىلى كەزەڭدە كاسىپكەرلەر پالاتاسى كووپەراتيۆ مۇشەلەرىنە اسىل تۇقىمدى مال الۋ ماسەلەسىنە كومەكتەسۋدە.

قىرىقتان استام شارۋا بىرىگىپ ەڭبەك ەتىپ جاتقان «مەركى ونىمدەرى» كووپەراتيۆىنىڭ بولاشاعىنىڭ جارقىن ەكەندىگىنە كوز جەتكىزگەن جەرگىلىكتى شارۋالار اۋداندا تاعى دا ءبىر وندىرىستىك كووپەراتيۆتىڭ شاڭىراعىن كوتەردى. ءداندى جانە ءداندى-بۇرشاقتى داقىلدار مەن تۇقىم شارۋاشىلىعىن دامىتۋدى كوزدەپ وتىرعان كووپەراتيۆتىڭ اتاۋى – «مايتوبە جانە ك». كووپەراتيۆ جەتەكشىسى ساۋىتبەك ءابىروۆ:  «كووپەراتيۆكە بىرىگىۋىمىزدىڭ باستى سەبەبى – يەلىگىمىزدەگى جەرلەردى ءوز دەڭگەيىندە يگەرۋ. ودان تۇسەتىن تابىس كولەمىن ارتتىرۋ. ەگەر ءوز الدىمىزعا جەكە جۇمىس ىستەيتىن بولساق ونداي ناتيجەگە قول جەتكىزە المايمىز. شارۋالاردىڭ بىرىندە جەرى بولسا تەحنيكاسى جوق، تەحنيكاسى بولسا قاراجاتى جەتىسپەيدى. سوندىقتان شارۋاشىلىعى دا اقساي بەرەدى»،–دەيدى.

«مايتوبە جانە ك» كووپەراتيۆىنە بۇگىندە 4 شارۋا قوجالىق بىرىگىپ وتىر. جالپى جارعىلىق قورلارى – 1 000 000 تەڭگە. كووپەراتيۆ جەتەكشىسى ساۋىتبەك ءابىروۆ اۋىل شارۋاشىلىعى سالاسىندا ۇلكەن تاجىريبە جيناقتاعان ازامات. جىل باسىندا مەركى اۋدانىنداعى كاسىپكەرلىكتى قولداۋ ورتالىعىنا كەلىپ كەڭەس العان بولاتىن. كاسىپكەرلەردى قولداۋ ورتالىعى ماماندارىنىڭ كەڭەسىنەن سوڭ، كووپەراتيۆ قۇرۋدىڭ تيىمدىلىگىنە كوز جەتكىزگەن ول اۋدانداعى شارۋا قوجالىق جەتەكشىلەرىمەن ۇگىت-ناسيحات جۇمىستارىن جۇرگىزدى. ناتيجەسىندە ۇلكەن ءىستى قولعا الىپ، جۇمىسقا بىلەك سىبانا كىرىسىپ كەتتى. اۋداندىق كاسىپكەرلەر پالاتاسىنىڭ ماماندارى كووپەراتيۆ جارعىسىنىڭ جوباسى مەن قۇرىلتايشىلىق كەلىسىم-شارتتارىن ازىرلەپ بەردى. ناقتىلى كەزەڭدە «مايتوبە جانە ك» كووپەراتيۆىنىڭ مۇشەلەرى كوكتەمگى دالا جۇمىستارىنا قىزۋ دايىندىق ۇستىندە.

 Abai.kz