جۇما, 1 شىلدە 2022
ءوز سالتىڭ 3698 0 پىكىر 28 ناۋرىز, 2016 ساعات 12:05

ناۋرىز ناقىشتارى: مۇز ۇستىندەگى قىز قۋ ءام قارا جورعا

ەگەمەندىكتىڭ جيىرما بەسىنشى جىلىنداعى ناۋرىز مەرەكەسى استانا قالاسىندا جوعارى دەڭگەيدە اتالىپ ءوتتى.  دۋماندى كۇننىڭ دۋ-دۋىنىڭ كۋاسى بولىپ قايتقان جۇرتشىلىقتىڭ وكىلى رەتىندە ءوز سەزىمىمدى وسى جەردە ءبولىسۋدى ءجون كوردىم. استاناداعى مەرەكە «الاۋ» مۇزايدىنىندا دا تويلاندى.

مۇز ۇستىندە ءسابيدىڭ تۇساۋى كەسىلىپ، كونكيشىلەر قاراجورعاعا تولقىتا بيلەگەندە قازاقى قانىمىز قىزىپ، تاۋەلسىزدىكتىڭ ءتاتتى قۇدىرەتىن سەزىندىك. ول از بولعانداي 400 مەترلىك كونكيدەن جارىس  ۇيىمداستىرىلىپ، اق ايدىندا قازاقى بۇرمەلى اق كويلەكتى جەلبىرەتە، قۇستاي  ۇشقان كونكيشى قىزدى كۇرمە كيگەن قازاق جىگىتى زۋىلداپ كەلىپ، بەلىنەن ۇستاعاندا تويعا كەلگەندەر شۋ ەتە ءتۇسىپ، الاڭداعى  قيقۋى كۇشەيە ءتۇستى.

ساۋىرباي ەسجانوۆ مىرزا تىزگىنشىلىك ەتەتىن وسى ءبىر مۇز ايدىنى ۇلتتىق ءداستۇرىمىزدى ناسيحاتتاۋعا بەلسەنە اتسالىسىپ كەلەدى. ەلوردامىزداعى وسى ءبىر ساراي الەم بويىنشا ەڭ جوعارعى كلاسستى مۇز ايدىندارىنىڭ ءبىرى ەكەنىن بىرەۋ بىلسە، بىرەۋ بىلە بەرمەس. ايتار ءسات تۋعاندا ايتىپ قالۋ كەرەك، ساۋىرباي اعامىز كەلگەلى ايدىن ىشىندە قارا كوزدەر كوبەيىپ عانا قويماي، مەملەكەتتىك  ءتىل مەن ۇلتتىق سالت-داستۇرىمىزگە  دە ورىن تابىلدى. بۇگىنگى مەرەكەلىك شارا دا سونىڭ كۋاسى.

قىسقى سپورت تۇرلەرى دەسە تەك عانا وزگە ۇلت وكىلدەرى ەلەستەيتىن ءبىزدىڭ قوعام ەندى قارا كوزدەرمەن دە تولىعىپ جاتىر. مۇز ايدىنى سارايى جىلىنا 100 مىڭنان استام كەلۋشىلەردى قابىلداپ، رەسپۋبليكالىق ءام الەمدىك دودالاردىڭ ورتالىعىنا اينالىپ ۇلگەرگەن.

سونىمەن، وسى ءبىر شاراعا ارنايى كەلىپ قاتىسقان ەكس-ەكونوميكا ءمينيسترى، قازىرگى قازاقستان دامۋ بانكىنىڭ باسقارما توراعاسى بولات امىشەۆ مىرزا ءۇش بىردەي ءبۇلدىرشىننىڭ تۇساۋىن كەستى. ال مۇز ايدىنى ديرەكتورى ساۋىرباي ەسجانوۆ 450 مىڭىنشى قوناققا ءبىر جىلدىق تەگىن سىرعاناۋ سەرتيفيكاتىن سالتاناتتى تۇردە تاپسىردى.

مۇز ۇستىنە تىگىلگەن كيىز ۇيلەردەن ناۋرىز كوجە ءدامىن تاتقان كورەرمەندەر، ارى قاراي  مۇز ايدىنىنداعى قارا جورعا ءبيىن تاماشالادى. 400 مەترلىك جارىس الاڭىندا «قىز قۋ»  ۇيىمداستىرىلىپ، قوناقتار ءماز-مەيرام تارقاستى.

بەيسەن احمەتۇلى

Abai.kz 

0 پىكىر

ۇزدىك ماتەريالدار