سارسەنبى, 1 اقپان 2023
جاڭالىقتار 3250 0 پىكىر 28 ناۋرىز, 2016 ساعات 14:02

وزبەكستان قىرعىزستانمەن شەكاراسىنىڭ داۋلى بولىگىنەن اسكەرىن اكەتتى

قىرعىز پرەزيدەنتىنىڭ ءباسپاسوز قىزمەتى وزبەكستان بيلىگى قىرعىزستانمەن شەكاراسىنىڭ چالاسارت بولىگىنەن اسكەرىن تولىعىمەن شىعاردى دەپ حابارلادى.

قىرعىزستاننىڭ مەملەكەتتىك شەكارا قىزمەتىنىڭ توراعاسى رايىمبەردى دۇيشەنبيەۆ وزبەك تارابىنىڭ 26 ناۋرىزدا جالال-اباد وبلىسى اقسى اۋدانىنداعى چالاسارت ەلدە مەكەنى تۇسىنداعى شەكارانىڭ داۋلى بولىگىنەن اسكەري تەحنيكاسى مەن اسكەرىن الىپ كەتكەنى تۋرالى باياندادى.

ونىڭ سوزىنشە، ەكى ەلدىڭ شەكارا قىزمەتىنىڭ بولىمدەرى كەلىسىم بويىنشا شەكارانى كۇزەتۋدىڭ قالىپتى تارتىبىنە كوشكەن.

وزبەك تارابى اسكەرى مەن تەحنيكانى ەكى ەلدىڭ شەكارا قىزمەتىنىڭ باسشىلارى 25 ناۋرىزدا «قىزىل-قيا-اۆتودوروجنىي» وتكىزۋ بەكەتىندە كەزدەسكەن سوڭ الىپ كەتۋگە كەلىسكەن. قىرعىزستان شەكارا قىزمەتىنىڭ حابارلاۋىنشا، كەزدەسۋ وزبەك تارابىنىڭ باستاماسىمەن وتكەن.

شەكاراداعى تەكەتىرەس 18 ناۋرىزدا وزبەك بيلىگى ەكى ەل اراسىنداعى شەكارانىڭ بەلگىلەنبەگەن بولىگىنە اسكەرى مەن تەحنيكاسىن شوعىرلاندىرعاننان باستالدى. بۇعان جاۋاپ رەتىندە قىرعىز جاعى دا شەكارانىڭ داۋلى بولىگىنە قوسىمشا اسكەري كۇشتەرىن اكەلگەن ەدى.

اباي-اقپارات

0 پىكىر

ۇزدىك ماتەريالدار