دۇيسەنبى, 6 جەلتوقسان 2021
مايەكتى 5675 0 پىكىر 28 ناۋرىز, 2016 ساعات 14:54

اپاتتى ۇشاقتى امان قوندىرعان ۇشقىشتارعا «باتىر» اتاعى بەرىلۋى ءتيىس!

كەشەلى-بەرى كوپشىلىكتىڭ تالقىسىنا تۇسكەن ماسەلە استانادا اپاتتى جاعدايدا قونعان Fokker-100 (Bek Air) ۇشاعىنىڭ ۇشقىشتارىنىڭ ەرلىككە ءتان ارەكەتى بولدى. قىزىلوردادان ۇشىپ شىعىپ، استانا اۋەجايىنا قونار ساتتە اپاتتىق جاعدايعا ۇشىراعان ۇشاقتىڭ بورتىندا 116 ادام بولعان.

ۇشاقتىڭ الدىڭعى شاسسيلەرى اشىلماي قالعاندىقتان، تۇمسىعىمەن جەر سۇزگەن ۇشاقتى باسقارعان ۇشقىشتار تۋرالى پىكىرلەر الەۋمەتتىك جەلى مەن قوعامدىق ورتادا قىزۋ تالقىلانۋدا.

الەمدىك اۆياتسيانىڭ تاريحىندا جۇزدەگەن جولاۋشىسى بار بورتتى قۇتقارىپ قالۋدىڭ ءدال وسىنداي وقيعالارى سيرەك كەزدەسەدى. بۇنى مۇمكىن ەمەس جاعداي نەمەسە ميلليوننان ءبىر دەسە دە بولادى. ءاربىر جولاۋشىنىڭ اتا-اناسى، بالاسى، ءىنى-قارىنداستارى سونىمەن قاتار جۇزدەگەن تۋىسقاندارى بار، تۇپتەپ كەلگەندە ولاردىڭ بارلىعىنىڭ تاعدىرى  اپاتقا ۇشىراي جازداعان ۇشاقتىڭ «قاناتىنا» بايلانىپ قالعان ەدى.

بەيبىت كۇندە باتىرعا ءتان ەرلىك كورسەتىپ، اپاتتى جاعدايداعى ۇشاقتى جەرگە شەبەرلىكپەن قوندىرا بىلگەن Bek Air اۋە كومپانياسىنىڭ ۇشقىشتارى «حالىق قاھارمانى» اتاعىنا ابدەن لايىق ەكەنى داۋسىز.

مۇنداي ۇسىنىستى الەۋمەتتىك جەلى قولدانۋشىسى سىرىم ءابىراحمانوۆ تا ءوزىنىڭ «فەيسبۋكتەگى»  جەكە پاراقشاسىندا ءبىلدىرىپتى.

قازاقستان رەسپۋبليكاسىنىڭ «حالىق  قاھارمانى» – وتانىنا ەرەكشە مارتەبە كورسەتىپ، ەل  الدىنا يگىلىكتى ءىس تىندىرىپ كوزگە تۇسكەن، حالقىنا  اسا كورنەكتى قىزمەتى مەن تاۋەلسىزدىك جولىندا جاۋىنگەرلىك ەرلىك كورسەتكەن ادامدارعا بەرىلەتىن اتاق.

ۇشاق ىشىندەگى 116 ادامنىڭ ءومىرىن قۇتقارىپ قالعان ۇشقىشتار: دميتري رودين مەن ۆ. سەمەرياچينسكي جوعارعى دەڭگەيدەگى اتاقپەن ماراپاتتالۋعا ءتيىس.

«حالىق قاھارمانى» اتاعى قازاقستان رەسپۋبليكاسىنىڭ جوعارى دارەجەلى «التىن قىران» وردەنىمەن جانە «قازاقستاننىڭ ەڭبەك ەرى» التىن جۇلدىزدى ماراپاتىمەن دەڭگەيلەس كەلەدى. وسى اتاق بارىسىندا «التىن جۇلدىز» جانە «وتان» وردەندەرى قوسا تاپسىرىلادى. «حالىق قاھارمانى» اتاعى 1993 جىلى رەسمي تۇردە بەكىتىلگەن.

ايتپاقشى، Fokker-100 (Bek Air) ۇشاعىنىڭ ەكىنشى ۇشقىشى ۆاديم سمەرەچانسكي دىنمۇحامەد قوناەۆتىڭ جەكە ۇشقىشىنىڭ نەمەرەسى بولىپ شىقتى.

Abai.kz

0 پىكىر