سارسەنبى, 5 قازان 2022
جاڭالىقتار 3770 0 پىكىر 29 ناۋرىز, 2016 ساعات 11:20

قىرىمداعى جالعىز ۋكراين تىلىندە شىعاتىن گازەت جابىلدى

رەسەي باسىپ العان قىرىمدا ۋكراين تىلىندە شىعاتىن جالعىز "كريمسكا ءسۆىتليتسيا" ("قىرىم جارىعى") قوعامدىق-ساياسي، ادەبي گازەتى جابىلدى. گازەتتىڭ 25 ناۋرىزداعى نومىرىندە بۇل باسىلىمنىڭ قىرىمدا جارىق كورگەن سوڭعى سانى ەكەنى تۋرالى جازىلدى.

14 ناۋرىزدا ۇلتتىق گازەت-جۋرنال باسپاسى باس ديرەكتورىنىڭ رەداكتسيانى سيمفەروپولدەن كيەۆكە كوشىرۋ تۋرالى بۇيرىعى شىقتى. گازەتتىڭ قىرىمدىق قىزمەتكەرلەرى مۇنى ادىلەتسىز شەشىم دەپ سانايدى. ولار «كريمسكا ءسۆىتليتسيانىڭ» و باستان «وزدەرى اراسىنداعى بوتەندەر، بوتەندەر اراسىندا وزدەرى» بولعانىن ايتادى.

ولار بيلىكتەن قىرىمداعى ۋكراينداردىڭ ماسەلەسىنە نازار اۋدارۋىن جانە مەملەكەتتىك قامقورلىق جاساۋىن تالاپ ەتەدى. ولاردىڭ پىكىرىنشە، گازەتتىڭ تۇراقتى سۇرانىسقا يە ەكەندىگىن باسىلىمنىڭ سايتىنا مىڭداعان وقىرماننىڭ كىرەتىنى دالەل. «فەيسبۋكتە» گازەتتىڭ الەۋمەتتىك جەلىدەگى دوسىنىڭ سانى ەكى مىڭعا جەتەتىنى تۋرالى جازىلعان.

ۇلتتىق گازەت-جۋرنال باسپاسى رەداكتسيانى كيەۆكە كوشىرۋىنىڭ سەبەبى رەتىندە، باسىپ الىنعان اۋماقتاعى جۋرناليستەردىڭ قاۋىپسىزدىگىنە جاۋاپ بەرە المايتىندىعىمەن ءتۇسىندىردى. «كريمسكا ءسۆىتليتسيانىڭ» قىرىمداعى رەداكتسياسى ەكى جىل بۇرىن اق تارتىپ الىنعان. 2015 جىلدىڭ مامىرىنان بەرى گازەت ەلەكتروندى تۇردە شىعادى.

«كريمسكا ءسۆىتليتسيا» قىرىمدا 1992 جىلدان بەرى شىعىپ كەلدى. 2014 جىلى تۇبەكتى رەسەي باسىپ العاننان كەيىن، قىرىمنىڭ وككۋپاتسياسىنا قارسىلىق تانىتقان بىرقاتار ۋكراين جانە قىرىم تاتارلارىنىڭ اقپارات قۇرالدارى جانە رەسەيلىك زاڭ بويىنشا تىركەۋدەن وتپەي قالعاندارى ۋكرايناعا كوشىپ كەتكەن.

اباي-اقپارات

0 پىكىر