سەنبى, 19 قىركۇيەك 2020
COVID-19 قازاقستاندا. جۇقتىرعاندار — 107199. جازىلعاندار — 101822. قايتىس بولعاندار — 1671
قوعام 5117 0 پىكىر 4 ءساۋىر, 2016 ساعات 12:19

رەيتينگ بويىنشا قازاقستان رەسەيدەن گورى باي. راس پا؟

جاقىندا Global Finance Magazine باسىلىمى الەمدەگى ەڭ باي ەلدەردىڭ رەيتينگىسىن جاساپتى. دۇنيەجۇزىلىك بانك پەن حالىقارالىق ۆاليۋتا قورىنىڭ دەركتەرىنە سۇيەنە وتىرىپ جاسالعان بۇل تىزىمگە الەمنىڭ 185 مەملەكەت كىرگەن. امەريكاندىق باسىلىمنىڭ تۇزگەن تىزىمىندە قازاقستان رەسەيدەن گورى باي دەپ كورسەتىلگەن. بۇل تۋرالى «tengrinews.kz» پورتالى جازادى.


ءتىزىمدى تۇزۋشىلەر اۋەلدە حالىقتىڭ ساتىپ الۋ قابىلەتىنىڭ تەپە-تەڭدىگىنە، ادامداردىڭ ءومىر ءسۇرۋ دەڭگەيىنە جانە ەلدەردەگى ينفلياتسيا دەڭگەيىنە باستى نازار اۋدارىپتى.

سونىمەن امەريكاندىقتاردىڭ كوزىمەن جاسالعان رەيتينگ بويىنشا، پوست-كەڭەستىك كەڭىستىكتەگى ەلدەردىڭ ىشىندە ەڭ بايى بالتىق ەلدەرى – ليتۆا ەكەن (41-ورىن). 42-ساتىدا ەستونيا. مۇنداعى ساتىپ الۋ دەڭگەيى 28 245 جانە 27 729 دوللارعا تەڭ ەكەن.

ءبىز بۇل تىزىمدە ەلۋىنشى ورىندامىز ەكەن. ەلىمىزدە حالىقتىڭ ساتىپ الۋ قابىلەتى – 25 367 دوللاردى قۇراپتى.

تۇياعىمىزدى باسىپ، رەسەي 51-ورىندا تۇرسا، لاتۆيا 52, ءازىربايجان 64, بەلارۋس 65, ۋكراينا 109, ارمەنيا 116, وزبەكستان 127, قىرعىزستان 142 تاجىكستان 153 ورىندارعا جايعاسقان.

Global Finance Magazine-ءنىڭ زەرتتەۋىنىڭ ناتيجەسىندە جەر شارىنىڭ ەڭ باي مەملەكەتى – كاتار ەكەن. مۇندا حالىقتىڭ ساتىپ الۋ قابىلەتى 146 مىڭ دوللاردى قۇرايدى ەكەن. ەكىنشى ورىندا ليۋكسەمبۋرگ (94 167), ءۇشىنشى ورىندا - سينگاپۋر (84 821).

انەۋ جىلى قازاقستاندىق زەرتتەۋشىلەر قازاقستاننىڭ قازىرگى ىشكى جاعدايىن ساراپتاپ، ەلىمىزدى الەمنىڭ ەڭ كەدەي چاد رەسپۋبليكاسى جانە افريكانىڭ ەلدەرىمەن تەڭەستىرگەن-ءتىن. سوندا، «مۇنايدىڭ ۇستىندە وتىرعان اراب - باي، قازاق نەگە كەدەي؟» - دەپ سۇراقتى توتەسىنەن قويدىق. وسى تۇستا تاعى ءبىر ەسكەرە كەتەتىن ءجايت بار ەدى.  قازاق قارامايىنىڭ تاريحىندا قازاقتار نەمەن شۇعىلداندى دەيسىز عوي. ەڭ الدىمەن كەنىشتەردى اعىلشىندار تاپتى، ودان كەيىن پاتشالىق رەسەي قوجايىن بولدى. قازاقتار سولاردىڭ بۇيرىعىنا باعىنىپ، شيكىزاتتى شەلەكتەپ تاسىپ، قارا جۇمىس اتقاردى. كەڭەس كەزىندە مۇنايگاز سەكتورىن زەرتەگەن عىلىمي بازا دا بولعان جوق. باسقارۋ ءىسىن ماسكەۋ تۇگەلدەي ءوز قولىندا ۇستادى. قورىتا ايتقاندا، گەولوگيالىق بارلاۋدان باستاپ، ءوندىرىستىڭ تولىق تسيكلىن ءوزى جاساعان ەلدەردە مۇنايدىڭ وزىندىك باعاسى تومەن بولۋىنا بۇل دا ىقپال ەتەدى. ارابتار 8-10 دوللار ارزان مۇنايدى سونىڭ ارقاسىندا الىپ وتىر. بۇل قازاق مۇنايى قازاقتىكى ەمەس ەكەنىن ايقىن اڭعارتسا كەرەك-ءتى.

ايتپاقشى، ەۋروپا وداعىنىڭ ستاتيستيكا قىزمەتى سالىستىرمالى تۇردە دەرەكتەر كەلتىردى. قازاستاننىڭ 60 پايىز ادامى كەدەي تۇرادى دەدى.

ال قازاقستانداعى ەڭ باي 50 ادامنىڭ بايلىعىن بىرىكتىرسە، اقمولا، جامبىل، سولتۇستىك قازاقستان وبلىستارىنىڭ جىلدىق بيۋدجەتىن قۇرايتىنىن بىرنەشە جىل بۇرىن «ازاتتىق» جازعان ەدى.

شىن مانىسىندە، بىزدەگى اۋىل ادامدارىنىڭ كەدەيشىلىگى قالا كەدەيلەرىنەن بەس-ون ەسەگە ءوسىپ كەتكەن. تاناۋلارىنا ەسەكقۇرت كىرگەن باي-شونجارلاردىڭ دەنى – استانادا، مەگاپيلوستەردە. شەراعاڭشا ايتساق، ءبىر كەم دۇنيە...

نۇرگەلدى ابدىعانيۇلى

Abai.kz 

0 پىكىر