«ۇستازدىق ەتكەن جالىقپاس،

ۇيرەتۋدەن بالاعا» - دەپ دانىشپان اباي ايتقانداي، الەمدەگى ماماندىقتاردىڭ ىشىندەگى ەڭ قاسيەتتىسى، ەڭ قۇرمەتتىسى، ەڭ اسىلى، ارداقتىسى – ۇستازدىق!

بۇل ماماندىقتىڭ ۇلكەنى نەمەسە كىشى بولمايدى. ۇستازدىق – ۇلاعاتتىلىق! ۇلاعاتتىلىق - كەمەڭگەرلىكتىڭ باستاۋى نەمەسە قاينار بۇلاعى. الەمدەگى بارلىق دانىشپاندار، اياعى سالبىراپ، اسپاننان تۇسكەن جوق، ۇستازدىڭ الدىنان شىققانىن ۇمىتپاۋىمىز كەرەك. سوندىقتان دا ۇستازعا قۇرمەتى ەرەكشە ەلدىڭ بولاشاعى زور دەر ەدىم. كەرىسىنشە بولعان جاعدايدا، ول باقىتسىز ەل نەمەسە باقىتسىز ۇلت اتانارى داۋسىز!

تۇركيا رەسپۋبليكاسىنىڭ تۇڭعىش ءارى جاڭاشىل رەفورماتور پرەزيدەنتى مۇستافا كەمال اتاتۇرىك ءوزى پرەزيدەنت بولىپ تاققا وتىرعان كۇنى ايلىعى مەن جاعدايىن جاقسارتۋ ءۇشىن ەكى ماماندىق يەلەرىنىڭ ەل الدىنداعى قۇرمەتىن ارتتىرۋ ماقساتىندا ەرەكشە جارلىق بەرىپتى. ونىڭ ءبىرى - ۇلتتىڭ بولاشاعى قولدارىندا تۇرعان ۇستازداردىڭ ايلىعىن كوتەرىپ، جاعدايلارىن جاقسارتۋ بولعان ەكەن. ال، ەكىنشى جارلىعى - دارىگەرلەردىڭ ايلىعىن كوتەرۋگە ارنالعان. بۇل - ءوز ۇلتىن شەكسىز سۇيگەن ادامنىڭ عانا قولىنان كەلەتىن ۇلى جاقسىلىق ەدى!

ال، ءبىزدىڭ ەل ۇستازدارىنىڭ جاعدايىن جاقسارتاتىنداي قانداي قادام جاسادى؟.

مىنە، شيرەك عاسىر بولدى، ەلدەگى ايلىعى تومەن، تۇرمىسى ناشار ماماندىق يەلەرى – ۇستازدار.

بۇل از دەسەڭىز، ەلدەگى ەڭ لاس ساياسي ناۋقانعا مۇعالىمدەردى، قۇرمەتتى ۇستازداردى جەگۋ – ادەت بولعالى دا شيرەك عاسىر. قازاقستاندا ءبىر دە ءبىر رەت ءادىل سايلاۋ وتپەگەنى بەلگىلى. مىنە، وسى لاس جۇمىستى اسا قادىرلى ماماندىق يەلەرى - ۇستازداردىڭ قولىمەن جاسايتىن ءبىزدىڭ جۇيەگە ۇستازدار ءالى-اق لاعنەت ايتادى. 

كەشەگى قازاقتى قىناداي قىرعان، قىرعىزعان قىزىل كوممۋنيستەر ءالى بيىك مىنبەلەردە وتىر.

 ول تەكسىزدىر نە ىستەمەدى؟..

 ۇستاز قارعىسى - اۋىر بولادى.

ولاردى ءتۇبى ۇستازدار قارعىسى اتادى!

مەن وعان كامىل سەنەمىن!

جۇماش كوكبورى

Abai.kz