بەيسەنبى, 6 تامىز 2020
COVID-19 قازاقستاندا. جۇقتىرعاندار — 95942. جازىلعاندار — 68871. قايتىس بولعاندار — 1058
ءوز ءسوزىم... 4192 0 پىكىر 28 ءساۋىر, 2016 ساعات 09:33

«تابان تىرەر ەلىم بار!»

ەلباسى: «وزىندە ماقتان تۇتارلىق ەشتەڭەسى جوقتار ۇلتشىل بولادى» دەدى. راس مەندە اۋىز تولتىرىپ ايتارلىقتاي ەشتەڭە جوق. ەگەر بۇل «ماقتان تۇتارلىق ەشتەڭە» ماتەريالدىق بايلىق بولسا، وندا مەن – تاقىر كەدەيمىن. اياق-قولىمدى ماتاعان ء«وز شىنجىرىمنان» باسقا، شىنىندا، ەشتەڭەم جوق. جارايدى، ول تۋرالى كەيىن ايتارمىز!..

ءدال قازىر – ەلۋ بەستەمىن. اتا-بابام، اكە-شەشەم، ءوزىم، بالالارىم مەن باۋىرلارىم قاسيەتتى كەڭ بايتاق قازاق جەرى ءۇشىن قانى مەن تەرىن ەشكىمنەن كەم توكپەسە دە مىناۋ مەنىكى دەپ اتىن اتاپ، ءتۇسىن تۇستەپ كورسەتەتىن الاقانداي جەرىم جوق. جەر عانا ەمەس، مالىم دا، باسپانام دا جوق. بىراق ءوزىمدى ەشكىمنەن كەم تۇتپايمىن، ءتىپتى تالايدان ارتىقپىن دەپ ەسەپتەيمىن. نەگە؟..

سەبەبى، ارقا سۇيەر ەلىم، تابان تىرەر جەرىم، ماقتان تۇتار حالقىم بار.

شىققان تەگىم دە ەشكىمنەن سورلى ەمەس. ءوزىم – تولەڭگىت، ناعاشى جۇرتىم مەن قايىن جۇرتىم – تورە تۇقىمىنان.

ءبىلىمىم – جوعارى، اتاق-دارەجەم دە ءبىر باسىما جەتەرلىك – اقىنمىن، قازاقستان جازۋشىلار جانە جۋرناليستەر وداعىنىڭ مۇشەسىمىن.

ءبىر ۇل، ءبىر قىزىم، كەلىنىم مەن نەمەرەم بار. باستى بايلىعىم – سولار.

ويتكەنى، ءوزىم ەلىم مەن جەرىمدى قانداي سۇيسەم، ولار دا سونداي جاقسى كورەدى. ەكەۋى دە مەنىڭ جولىمدى قۋىپ (ۇلىم مەن قىزىمدى ايتام) اقپارات سالاسىندا ەڭبەك ەتىپ ءجۇر، ەشكىمنەن كەم ەمەس. وزىمە قانداي سەنسەم، ولارعا دا سونداي سەنەمىن. كۇنى ەرتەڭ ءتىپتى قاجەت بولسا تۋعان ەلى مەن جەرىن، وتانىن قورعاۋ ءۇشىن قولىنا قارۋ ۇستاپ قاسىمنان تابىلارىنا سەنىمىم كامىل. سونى ماقتان تۇتامىن!..

ارتىمدا قالار ازدى-كوپتى ەڭبەگىم بار. اتا جولىن جالعاستىرىپ، اماناتىن ورىندار اياۋلى ۇرپاعىم بار. مەن ماقتان تۇتار بار بايلىق – وسى!..

ءسىز ايتقان بايلىق سول بولسا، وندا مەنەن باي ەشكىم جوق!

مەنىڭشە، ماسەلە كىمنىڭ نەنى ماقتان تۇتىپ، بايلىق، باقىت دەپ تۇسىنۋىندە.

...سوندا قالاي، سىزدىڭشە سوناۋ ەلى ءۇشىن ەڭىرەپ، حالقى ءۇشىن قان جۇتقان ۇلى حاندارىمىز بەن جىراۋلارىمىز، باتىرلارىمىز بەن اقىندارىمىز، حاكىم ابايدان باستاپ ۇلتى ءۇشىن جان قيعان الاش ارىستارىنىڭ، ۇرپاعىنىڭ بولاشاعى ءۇشىن بارى مەن ءنارىن بەرگەن اتا-انالارىمىزدىڭ بويىندا ماقتان تۇتارلىق ەشتەڭە بولماعانى ما؟! نەمەسە قولىندا...

راس، سىزگە جەتە الماس، دەگەنمەن ەشكىمنەن كەم ەمەس ەدى!.. تەكتىلىك قانداي ەدى، ارمان قانداي ەدى؟! جەرى ءۇشىن كۇرەسىپ، ەلى ءۇشىن ءومىر ءسۇردى. جەڭدى، جەڭىلدى. الىستى، جۇلىستى. اتىلدى، اسىلدى. ارتىندا ولمەس اتاعى مەن وشپەس ىستەرى، اتا جولىن قۋعان ۇرپاعى قالدى. ءبىرتۇتاس ەلى مەن جەرى قالدى!..

ءبىز بەن سىزدەن نە قالادى؟! ماسەلە – سوندا!..

P/S:   ال قازىرگى «بىزدەردە مىناداي بار، مىناداي بار» دەپ كورسەتەتىن بار بايلىقتى قولىنا جيناعان جاساندى بايشىكەشتەر مەن بيشىكەشتەرىڭىز ەل باسىنا كۇن تۋىپ، ەر ەتىگىمەن سۋ كەشەر زامان كەلسە كىمگە قورعان، كىمگە پانا بولادى؟ ءسىزدى دە، ەلدى دە ەڭ الدىمەن سولار ساتادى، وعان ءباس تىگەمىن!..

تۇرماعانبەت كەنجەباەۆ – قازاقستان جازۋشىلار جانە جۋرناليستەر وداعىنىڭ مۇشەسى. ۇلتشىل.   

Abai.kz       

0 پىكىر