بۇگىن ءوڭىر باسشىسى ب.اتامقۇلوۆ ەنەرگەتيكتەر كۇنى مەرەكەسىنە وراي ۇيىمداستىرىلعان سالتاناتتى جيىنعا قاتىستى. مەرەكەلىك جيىندا وبلىس اكىمى اتالمىش سالادا ەلىمىزدىڭ دامۋىنا وراسان ۇلەس قوسىپ جۇرگەن بىرقاتار ەنەرگەتيكتەردى وبلىس اكىمى ماراپاتتاپ، اتاۋلى داتامەن بارشا سالا ماماندارىن قۇتتىقتادى.

«ەنەرگەتيكا – بۇگىنگى تاڭدا جاڭا زامان ءومىرىنىڭ كۇرە تامىرىنا اينالدى. ول تۋرالى ءبىزدىڭ ەلباسىمىز دا ۇنەمى ايتىپ وتىرادى. پرەزيدەنتىمىزدىڭ حالىقارالىق باستامالارىنىڭ ءبىرى دە – ەنەرگەتيكا سالاسىنا قاتىستى ەكەنىن سىزدەر جاقسى بىلەسىزدەر. بىرىككەن ۇلتتار ۇيىمىندا سويلەگەن سوزىندە ەلباسىمىز ادامزاتقا بالامالى ەنەرگيا كوزدەرىنە كوشۋ تۋرالى ۇسىنىس ايتتى. بۇل جاڭا عاسىردا ەڭ كەرەكتى، ەڭ وزەكتى ۇسىنىستارىنىڭ ءبىرى. شىن مانىندە، ءومىردىڭ ساپاسى بۇگىنگى تاڭدا ەنەرگەتيكا سالاسىنىڭ ساپاسىنا تىكەلەي قاتىستى»، - دەدى وبلىس باسشىسى.

سونداي-اق، ب.اتامقۇلوۆ بۇگىنگى تاڭدا ەلەكتر ەنەرگياسىنسىز ءومىر ءسۇرۋدى ەلەستەتۋدىڭ مۇمكىن ەمەستىگىن ايتىپ، وسى قيىن دا قىزىق سالادا قاجىرلى ەڭبەك ەتىپ جۇرگەن قىزمەتكەرلەردىڭ ۇلەسى وراسان ەكەنىن جەتكىزدى.

سالتاناتتى شارادا ەنەرگەتيكا سالاسىنىڭ كاسىبي مەرەكەسىندە جالپى سانى 80-گە جۋىق قىزمەتكەرلەرگە قر ەنەرگەتيكا مينيسترلىگىنىڭ «ەڭبەك ارداگەرى» مەدالى، تمد-نىڭ «قۇرمەت گراموتاسى»، «قازاقستان ەلەكتر ەنەرگەتيكالىق قاۋىمداستىعىنىڭ» «ەڭبەگى سىڭگەن ەنەرگەتيگى»، «قۇرمەتتى ەنەرگەتيك» بەلگىلەرى مەن قۇرمەت گراموتاسى، سونداي-اق، وبلىس اكىمىنىڭ العىس حاتىمەن، وبلىستىق ءماسليحاتتىڭ گراموتاسىمەن ماراپاتتالدى.

وڭىرىمىزدە ەنەرگەتيكا سالاسىندا 5,5 مىڭنان استام قىزمەتكەر جۇمىس ىستەيدى. جالپى، وبلىس تۇرعىندارىنىڭ ەلەكتر قۋاتىن ورتاشا تۇتىنۋى جاز مەزگىلىندە 330-350 مۆت، قىس مەزگىلىندە 430-470 مۆت-تى قۇرايدى. وبلىستا تۇتىنىلاتىن ەلەكتر قۋاتىنىڭ 60 پايىزدان استام بولىگى ەلىمىزدىڭ سولتۇستىك ايماقتارىنان جانە جامبىل گرەس-نەن تاسىمالدانۋدا.

وبلىستاعى «3-ەنەرگوورتالىق» اق، «شاردارا سەس» اق، «كەنتاۋ سەرۆيس» مكك، «كەلەسگيدروستروي» جشس مەكەمەلەرى ەلەكتر قۋاتىن وندىرەدى.

بۇگىندە وڭتۇستىك قازاقستان وبلىسى 100 پايىز ەلەكتر ەنەرگياسىمەن قامتاماسىز ەتىلگەن. 2010-2015 جىلدارى رەسپۋبليكالىق، وبلىستىق بيۋدجەتتەردەن 9 041,1 ملن. تەڭگە قارالىپ، وبلىستا جالپى 55 نىساننىڭ قۇرىلىس جۇمىستارى جۇرگىزىلىپ، ياعني، 1876,444 شاقىرىم ەلەكتر جەلىلەرى جانە 440 دانا ەلەكتر قوندىرعىلارى پايدالانۋعا بەرىلدى. ناتيجەسىندە 235 040 تۇرعىن ساپالى ەلەكتر ەنەرگيامەن قامتاماسىز ەتىلدى.

وقو اكىمىنىڭ ءباسپاسوز قىزمەتى

Abai.kz