جەكسەنبى, 26 ماۋسىم 2022
جاڭالىقتار 3952 0 پىكىر 28 جەلتوقسان, 2015 ساعات 09:45

يم ليدەرى الەم ەلدەرىنە سەس كورسەتتى

«يسلام مەملەكەتى» (يم) ەكسترەميستىك توبى جەتەكشىسى ابۋباكر ءال-باعداديدىڭ مالىمدەمەسى دەگەن اتاۋمەن ينتەرنەتتە جاريالانعان اۋديوتاسپادا: «ەندى بىزگە قارسى كرەسشىلەر عانا ەمەس – بۇكىل الەم كۇرەسىپ جاتىر» دەلىنگەن.

مالىمدەمە اۆتورى سونىمەن بىرگە يزرايلگە قوقان-لوقى كورسەتىپ، ءوز ادامدارى «كوپ ۇزاماي پالەستينادا يسلام مەملەكەتىن قۇراتىنى» جايلى ايتقان.

سونىمەن بىرگە ول 15 جەلتوقساندا 34 ەلدىڭ قاتىسۋىمەن يم توبىنا قارسى كواليتسيا قۇرىلاتىنىن جاريالاعان ساۋد ارابياسىنداعى تۇرعىنداردى كوتەرىلىس جاساۋعا شاقىرعان.

باعدادي ءسوزىنىڭ كەيبىر تۇستارىنا قاراپ، بۇل ءۇنتاسپا سيريادا رەسەيلىك ۇشاقتار اۋە شابۋىلدارىن باستاعان سوڭ ىلە-شالا جاسالعانعا ۇقسايدى دەپ توپشىلايدى يزرايلدىك «حاارەتس» باسىلىمى. مىسالى، مالىمدەمەدە رەسەيلىك جانە امەريكالىق ۇشاقتاردىڭ اۋە سوققىلارى يم توبىن السىرەتە العان جوق، قايتا كەرىسىنشە، ونى كۇشەيتتى دەپ ايتىلعان. بۇل سوڭعى جەتى ايدان بەرى باعداديدىڭ اتىنان تاراپ وتىرعان العاشقى اۋديومالىمدەمە.

بۇعان دەيىن تاراعان كەيبىر مالىمەتتەردە قازان ايىندا يراك اۋە كۇشتەرى سوققىسى سالدارىنان ءال-باعداديدىڭ اۋىر جارالانعانى تۋرالى ايتىلعان ەدى. ونىڭ الدىندا بىرنەشە رەت ءال-باعداديدىڭ قازا تاپقانى تۋرالى جالعان حابارلار تاراعان.

سيريادا اقش پەن باتىس ەلدەرى قولدايتىن كوتەرىلىسشىلەردىڭ بىرلەسكەن توبى يم سودىرلارىنىڭ نەگىزگى ورتالىعى – راككا قالاسى ماڭىنداعى سۋ بوگەتىن ءوز باقىلاۋىنا العان.

ال يراكتا ۇكىمەت كۇشتەرى رامادي قالاسىندا يم ۇستاپ تۇرعان سوڭعى اۋدانعا سىنالاي ەنىپ بارادى. ەگەر ۇكىمەت اسكەرى ءراماديدى تولىق قايتارا السا، وندا بۇل يم سودىرلارى ەلدىڭ ۇشتەن ءبىر بولىگىن جاۋلاپ العان 2014 جىلدان بەرگى كەزەڭدە ولارعا قارسى سوعىستاعى ماڭىزدى جەڭىستەردىڭ ءبىرى بولماق.

اباي-اقپارات

0 پىكىر