جۇما, 1 شىلدە 2022
قوعام 4914 0 پىكىر 28 جەلتوقسان, 2015 ساعات 17:19

جاقسىبەكوۆ جاۋىز با، الدە مەيراموۆ الاياق پا؟

جۋىردا استانا قالاسىنىڭ قاق ورتاسىندا ورنالاسقان جەكەمەنشىك ءۇيدىڭ قوجايىنى ادىلبەك مەيراموۆ پەن ونىڭ وتباسىن استانالىق سوت ورىنداۋشىلارى ءۇيدى بوساتۋ ءۇشىن كۇش قولدانعان. بۇل تۋرالى «ازاتتىق راديوسى» حابارلايدى.

ازاتتىق تاراتقان اقپاراتتارعا سۇيەنسەك، استانا قالاسى اكىمدىگى «قالانى دامىتۋ» باعدارلاماسى بويىنشا ادىلبەك مەيراموۆتىڭ جەكە مەنشىگىندەگى باسپانانى بۇزۋ تۋرالى شەشىم شىعارعان. دالىرەك ايتقاندا، استانا قالاسىنداعى يمانوۆ كوشەسىن كەڭەيتۋ ءۇشىن وسى كوشەدەگى جەكە مەنشىك ءۇيدى قيراتۋ كەرەك ەكەن.


ال ادىلبەكتىڭ ايتۋىنشا، سوت بەلگىلەپ بەرگەن ءۇيدىڭ وتەماقىسى بار بولعانى 2 ميلليون 600 مىڭ تەڭگە عانا. ونداي اقشاعا، قازىر باسپانا الا المايسىڭ جانە قالالىق اكىمدىكتەن اۋدارىلدى دەگەن قاراجات باسپانا يەلەرىنىڭ قولىنا تيمەگەن.

«وسى جەكە مەنشىك ءۇيدىڭ قوجايىنى رەتىندە مەنىڭ بارلىق تالاپتارىم مەن قۇقىعىم ەسكەرىلمەي وتىر. زاڭ بويىنشا، بۇل ءۇيدىڭ 70 پايىزدىق ۇلەسى ماعان تيەسىلى. الايدا، مەنىڭ باسپانامنىڭ وتەماقىسى بەلگىسىز بىرەۋلەردىڭ، جسش، قالالىق اكىمشىلىك جانە مەنىڭ تۋىستارىم ارقىلى كەلىسىلگەن تۇردە وزگە بىرەۋلەردىڭ شوتىنا اۋدارىلعان. مەن بۇنىمەن كەلىسپەيمىن. 28-كۇنى وسى ىسكە قاتىستى سوت وتىرىسى بولادى. مەن وسى سوتقا دەيىن باسقىنشىلىقتى توقتاتۋدى تالاپ ەتەمىن»،-دەيدى ءۇي قوجايىنى.

دەگەنمەن، استانالىق سوت ورىنداۋشىلار ادىلبەك مەيراموۆتىڭ ايتقان ۋاجىنە قۇلاق اسپاعان. ءتىپتى، كۇش قولدانۋ ارقىلى ادىلبەك مەيراموۆتى جەرگە قۇلاتىپ، ۇيگە باسىپ كىرگەن.

بىراق، سوت ورىنداۋشىلار قورشاۋدان ارى وتكەنىمەن،  ۇيگە كىرە الماعان. ءۇيدىڭ ىشىندە ادىلبەكتىڭ ايەلى كامەلەت جاسقا تولماعان ءۇش بالاسىمەن بىرگە ەسىكتى بەكىتىپ العان. قالالىق سوت ورىنداۋشىلار باسقىنشىلىقتى توقتاتپاسا وزىنە-ءوزى قول جۇمساۋعا دايىن ەكەنىن ايتىپ، زار جىلىعان انانىڭ ايتارى، «قالالىق اكىمشىلىك بۇل باسسىزدىقتى توقتاتسىن».

قالا اكىمى جاقسىبەكوۆ مىرزادان جاردەم سۇراپ، زار ەڭىرەگەن انانىڭ ەندىگى ارمانى ەڭ قۇرىعاندا جاڭا جىلدى ءوز باسپانالارىندا قارسى الۋ.

«مەيىرىمدى ادامدار، قۇتقارىڭدار!»، «كومەكتەسىڭدەرشى!»، «قاشانعا دەيىن وسىلاي ءجۇرۋىمىز كەرەك!». بۇل جاقسىبەكوۆ مىرزانىڭ وكىمىمەن، قاڭتاردىڭ قاقاعان ايازىندا باسپاناسىنان ايىرىلعان انانىڭ داۋىستاپ ايتقان زاپىران تۇكىرىك زارى ەدى.


قولىنا پىشاق الىپ، وزىنە-ءوزى قول جۇمساماق بولعان ايەلدى، كوشەدەن ءوتىپ بارا جاتقان ادامدار توقتاتقان.

ال استانالىق سوت ورىنداۋشى ەرداۋلەت بولىسبەكوۆتىڭ ايتۋىنشا، مەيراموۆ ادىلبەك سوت ورىنداۋشىلاردىڭ ەسكەرتۋ قاعازىن العان. الايدا، سوت شەشىمىن العانىمەن، ءۇي يەسىنەن ەشقانداي جاۋاپ بولماعان. ءتىپتى، قيراتۋعا بەرىلگەن ءۇيدىڭ وتەماقىسى رەتىندە اۋدارىلاتىن سوما ءۇشىن مەيراموۆ استانا قالالىق سوتىنا جەكە ەسەپ شوتىنىڭ نومەرىن دە تاپسىرعان.

ء«بىزدىڭ مىندەتىمىز. سوت شەشىمى شىققاننان كەيىن 2 ايدىڭ ىشىندە ول ورىندالۋى ءتيىس. ال مەيراموۆ قازىر جاسىرىنىپ ءجۇر. ول وتەماقىنى العان. قۇجاتتاردا كورسەتىلگەندەي، مەيراموۆتىڭ جەكە ەسەپ شوتىنا سوت شەشىمىمەن بەلگىلەنگەن سوما اۋدارىلعان»،-دەيدى.

ءتۇيىن: ماسەلەنىڭ انىق-قانىعى بەلگىلى بولماي جاتىپ، استانالىق سوت ورىنداۋشىلاردىڭ باسقىنشىلىق ارەكەتكە بارعانى الەۋمەتتىك جەلى قولدانۋشىلارى مەن قوعامدىق ورتانىڭ اۋىر سىنىنا ۇشىراعانىمەن، قالعانىمەن، ادىلبەك جاقسىبەكوۆ كومانداسىنىڭ قاھارى قايتپاعان. قاڭتاردىڭ قاقاعان ايازىندا ءۇش بىردەي مەكتەپ جاسىنداعى بالا مەن مەيراموۆتار وتباسى قايدا بارادى؟ زار جىلاپ، زاپىران جۇتىپ، جاقسىبەكوۆ مىرزادان جاردەم سۇراعان انانىڭ زارىنا اكىم مىرزا نە دەپ جاۋاپ بەرەدى؟ مەيراموۆتارعا تيەسىلى قاراجات ورتا جولدا قولدى بولعان دەگەن تۇجىرىمعا كەلسەك، اكىم اپپاراتىنداعىلار مۇنداي سوماعا سالعىرت قاراعانى قالاي؟ جاقسىبەكوۆ مىرزانىڭ جانى اشيتىن بولسا ونى كورە جاتارمىز. ال  قىستىڭ كوزى قىراۋدا قايداعى جول جوندەۋ جۇمىستارى ول؟ تارازى...

نۇرگەلدى ابدىعانيۇلى

Abai.kz

ماقالانىڭ تۇپنۇسقاسى: http://rus.azattyq.org/media/video/snos-doma-v-centre-astany-adilbek-meiramov/27449270.html

0 پىكىر

ۇزدىك ماتەريالدار