قوستاناي شەكارا وتريادىنىڭ «قايراق اۆتو» بولىمشەسىندە 26 جەلتوقسان كۇنى ساعات 11.38-دە شەكارا جاساعى «زيتا» اتتى قىزمەتتىك ءيتتىڭ كومەگىمەن رەسەي تەرريتورياسىنا ەسىرتكى الىپ وتپەك بولعان ازاماتتى قۇرىقتاعان. بۇل تۋرالى قر ۇقك شق ءباسپاسوز قىزمەتى حابارلايدى.

جەڭىل اۆتوكولىكپەن قازاقستان تەرريتورياسىنان رەسەيگە باعىت العان 37 جاستاعى رەسەي ازاماتىن ۇستادى. بۇل تەكسەرۋ بارىسىندا ونىڭ ءاميانى مەن قولعابىنان اق ءتۇستى، سالماعى 2 گراممداي ۇنتاق جانە جاسىل ءتۇستى وسىمدىك تەكتەس زات تابىلعان. كەيىن انىقتالعانداي، بۇلار قازاقستاننان زاڭسىز الىپ وتپەك بولعان  گەروين جانە گاشيش ەسىرتكىسى بولعان. قازىرگى تاڭدا ۇستالعان ازامات قارابالىق اۋدانىنىڭ ىشكى ىستەر بولىمىنە جەتكىزىلگەن.

ارادا ءۇش ساعاتتان استام ۋاقىت وتكەندە اتالمىش قارابالىق اۋداندىق ىشكى ىستەر ءبولىمىنىڭ قىزمەتتىك «زيتا» ءيتى رەسەيگە قاراي باعىت العان جولاۋشىلار اۆتوبۋسىنان 25 جاستاعى رەسەي ازاماتىن ۇستادى. تەكسەرۋ جۇمىستارى بارىسىندا ەكىنشى رەسەي ازاماتى سالماعى 100 گرامم بولاتىن ماريحۋانا الىپ وتپەك بولعان. العاشىندا كۇدىكپەن ۇستالعان ازامات بۇل زاتتىڭ وزىنىكى ەمەستىگىن ايتىپ، انت-سۋ ىشكەندىكتەن، ەسىرتكى تابىلعان ورىنداردىڭ ارت جاعىندا № 31-32 ورىنداردا وتىرعان ەكى ازامات تا كۇدىكتى رەتىندە ۇستالىپ، قارابالىق اۋدانى بويىنشا ىشكى ىستەر بولىمىنە تاپسىرىلدى.

الايدا، فيلتراتسيالىق شارالار ناتيجەسىندە العاشقى ازامات ءوزىنىڭ كىناسىن موينىنا الىپ، كەيىنگى ۇستالعان ەكى قازاقستان ازاماتتارى بوساتىلدى.

«مەركە» تەكسەرىپ-وتكىزۋ پۋنكىتىنىڭ «سىپاتاي باتىر اۆتو» بولىمشەسىندە 27 جەلتوقساندا ساعات 18.40-تا قىرعىز رەسپۋبليكاسىنىڭ اۋماعىنان ءبىزدىڭ ەلگە قاراي جاياۋ كەلە جاتقان، ەكى قازاقستاندىق ازامات ۇستالدى.

تەكسەرۋ بارىسىندا ولاردىڭ ىشكيىمدەرىنەن سكوتچپەن ورالعان، اق-سۇر ءتۇستى ۇنتاق سالىنعان 3 تۇيىنشەك تابىلدى. بۇل زاتتىڭ جالپى سالماعى 500 گراممدى قۇرايتىن گەروين ەسىرتكىسى ەكەندىگى انىقتالىپ، ۇستالعاندار ايعاقتىق زاتتارىمەن بىرگە لۋگوۆوي تەمىرجول بەكەتىنىڭ جەلىلىك پوليتسيا بولىمشەسىنە تاپسىرىلدى.

Abai.kz