وتاندىق شوۋ-بيزنەس وكىلدەرى 2015 جىلعى جەتىستىكتەرىمەن ءبولىسىپ، قالىڭ كورەرمەنگە بيىلعى جىلدىڭ نەسىمەن ەستە قالعانىن باياندادى، دەپ حابارلادى 31 ارنا.

بيىل “مۋزارتتىڭ” بارلىق مۇشەلەرى جاڭا جىلدى وتباسىمەن قارسى الادى. بۇل مەرەكە كۇندەرى مۋزىكالىق توپ جىلدا ەشقانداي تاپسىرىس قابىلدامايدى ەكەن. ال، توپتىڭ ءانشىسى كەنجەبەك ءجانابىلوۆ بيىل جەكە شىعارماشىلىعىنا كوپ كوڭىل بولگەنىن ايتادى.

“مۋزارتتىڭ” وزگە مۇشەلەرىنىڭ جەكە ومىرىندە دە بيىل قۋانىشتى ساتتەر بولدى. مەيرامبەك بەسباەۆتىڭ ەكىنشى بالاسى دۇنيەگە كەلىپ، جۇبايى مارحاببات ەكەۋى ۇلدى بولعان ەدى. قۋانىشى قوينىنا سىيماعان مەيرامبەك بۇل كۇندى ۇيىندە، اق داستارحان باسىندا، دوس-جاراندارىمەن دۇركىرەتىپ اتاپ وتكەن بولاتىن.

بيىل ءسابيلى بولعان شوۋ-بيزنەس جۇلدىزدارىنىڭ تىزىمىندە توقتار مەن بەيبىت تە بار. ولار ەگىز ۇلدى بولىپ، قازاق حالقىن قۋانتقان ەدى. جانە دە الماس كىشكەنباەۆ، نۇرجان كەرمەنباەۆ، ەرلان ورىنباساروۆ پەن بايان نۇرمىشەۆا، ميراس پەن قۇرالاي دا قوي جىلى ءسابيلى بولدى. سونداي-اق 2015 جىلى قىزدى بولعان سيۆي ماحمۋديگە جارى بەنتلي سىيلاعانى ەل ەسىندە.

2015 جىلى روزا رىمباەۆا مەرەيتويىن اتاپ ءوتتى. ءومىرىنىڭ 40 جىلىن ساحناعا ارناعان ءانشى بۇل قۋانىشتى كۇندى حالىق الدىندا كونتسەرت بەرىپ وتكىزگەن ەدى.

حالىق ءارتىسى ماقپال ءجۇنىسوۆا دا بيىلعى جىلدىڭ تابىستى بولعانىن ايتادى. ەلدىڭ قۋانىشىنا ءاردايىم ورتاق بولىپ جۇرەتىن ءانشىنىڭ ەسىمى قاراعاندىداعى جۇلدىزدار اللەياسىندا قاشالىپ جازىلدى.

جىل سوڭىندا بىرقاتار ءانشى “قازاقستاننىڭ ەڭبەك سىڭىرگەن قايراتكەرى” قۇرمەتتى اتاعىن يەلەندى. ولاردىڭ قاتارىندا اكتريسا ايگۇل يمانباەۆا، مەدەۋ ارىنباەۆ، جانار دۇعالوۆا، تۇرسىنبەك قاباتوۆ بار.

ايتا كەتۋ كەرەك، قوي جىلىنىڭ سوڭىندا ايگۇل يمانباەۆا ءوز مەكتەبىنىڭ تۇساۋىن كەسكەن ەدى. وسىنداي بيزنەس باستاعان ءانشىنىڭ ونەر-ءبىلىم ورتالىعىنان ءان، بي، اكتەرلىك شەبەرلىكتى عانا ەمەس، وقۋشىلار بىرنەشە ءتىلدى مەڭگەرىپ، قوسىمشا ساباقتارعا قاتىسا الادى.

ايگۇلدىڭ الدىندا ءانشى روزا القوجا ءوز بيزنەسىن قولعا العان ەدى. “القوجا برەند” دەپ اتالاتىن ورامالدارى ساتىلاتىن ءوز دۇكەنىنىڭ ەسىگىن ايقارا اشقان بولاتىن.

Abai.kz