دۇيسەنبى, 6 جەلتوقسان 2021
ءوز ءسوزى 5970 0 پىكىر 30 جەلتوقسان, 2015 ساعات 15:29

مەنىڭ جاڭا جىلىم - 22 ناۋرىز

نەگىزى، مەنىڭ جاڭا جىلىم – 22 ناۋرىز! ادام پەندەسى ۇمىتپەن، ارمانمەن جاسايدى عوي. مەن ءوزى وپتيميست اداممىن. ەسكى داعدىمەن ايتساق، قۇدايعا شۇكىر، وتكەن جىل ءبىز ءۇشىن وتە تابىستى بولدى. ەڭ باستىسى، ۇلى ەلىمىز امان، جۇرتىمىز تىنىش.

ەلباسىنىڭ ۇلت جوسپارى – بەس ينستيتۋتتىق رەفورماسى مەن «100 ناقتى قادامدى» جولعا قويىلدى. بۇل – ۇزاق مەرزىمگە جاسالعان باعدارلاما. ۇلى، ماڭگىلىك ەل بولۋدىڭ نەگىزى! ىسكە اساتىنىنا مەنىڭ زارەدەي كۇدىگىم جوق! ەلىمىز دۇنيە ءجۇزى ساۋدا ۇيىمىنا مۇشە بولدى! قازاق حاندىعىنىڭ 550 جىلدىعىن اتاپ وتتىك. بۇل توي تەك ۇلى دالا ەلىندە عانا ەمەس، قازاعى بار مەملەكەتتىڭ بارىندە تويلاندى. شەتتەگى قازاقتار، ەڭ كەمىندە، كورشى-قولاڭىمەن باس قوسىپ، داستارقان باسىندا تويلادى... ايدىن ايىمبەتوۆ زامانداسىم، قازاقتىڭ ءۇشىنشى عارىشكەرى اتاندى. بۇل – قازاق ءۇشىن بيىك ابىروي، زور مارتەبە!

ال، مەن ءۇشىن اسا ماڭىزدى ءبىر ماسەلە – ۇلت كوشباسشىسى دەر كەزىندە جولعا قويعان كوشى-قون ساياساتى بولاتىن. قۇدايعا تاۋبە، ونىڭ دا ءتۇيىنى شەشىلىپ، جاڭا زاڭ جوباسىنا مەملەكەت باسشىسى قول قويدى. جاڭا جىلدان باستاپ اتقارىلا باستايدى.

ءومىر بولعان سوڭ، وكىنىش تە قاتار جۇرەدى. ءبىراز مارعاسقا تۇلعالارىمىزدان ايىرىلىپ قالدىق. اللانىڭ جازۋىنا ادامنىڭ جاسار شاراسى جوق! جاتقان جەرلەرى جانناتتا بولسىن! سونىمەن بىرگە، 1935 جىلى تۋعاندار ونەر يەلەرى مەن اقىن-جازۋشىلار ءۇشىن وتكەن جىل مەرەكە، ولار 80 جاسقا كەلدى. كوزى تىرىلەرى شاما-شارقىنشا تويلادى. اتاۋسىز قالعاندارى دا بولدى. و دۇنيەلىك بولعاندارىن تۋعان حالقى ەسكە الۋ شارالارىن وتكىزىپ، بيىك دەڭگەيدە اتاپ ءوتتى. بۇل شوعىردىڭ قاتارى مول ەدى جانە شەتىنەن كلاسسيك بولاتىن. ولارعا قانداي قۇرمەت كورسەتسەك تە جاراسادى. دەگەمەن، مەنىڭ تۇماعامنىڭ – تۇمانباي مولداعاليەۆتىڭ 80 جىلدىعى ءوز دەڭگەيىندە اتالىپ وتىلمەدى. ەڭبەكشىقازاق اۋدانىنىڭ اتىن اقىن اتىنا بەرسە، الماتى قالاسىنىڭ ىڭعايلى جەرىنە ەسكەرتكىشىن ورناتسا، تۋعان اۋدانىنان مادەنيەت ءۇيىن تۇرعىزسا، قازاتكوم اۋىلىنداعى ءوزى وقىعان ەسكى مەكتەبىن جاڭارتىپ سالسا، الماتىداعى ماسانچي كوشەسىن اقىن اتىمەن اتاسا، كەرەمەت-اق بولار ەدى! امال نە، قادىر، جۇمەكەن قۇرداستارىنىڭ قاسىندا اعامنىڭ مەرەيتويى جەتىم قىزدىڭ تويىنىڭ كۇنىن كەشتى. ەشكىم ەسكەرمەدى. سوعان ءىشىم ۋاداي اشيدى. بۇگىندە ءبىر جينالىس پەن ءبىر كونتسەرتتى اركىم وتكىزە بەرەدى ەمەس پە؟!

قايتالاپ ايتايىن، وتكەن جىلعا وكپە جوق! ارماندار ورىندالعان جىل بولدى. ال، كەلەسى جىل – توي جىلى، ۇلى تويدا كەزدەسەيىك، اعايىن! 

اۋىت مۇقيبەك

استانا

Abai.kz

0 پىكىر