ول اقوردادا پارلامەنت ءماجىلىسىنىڭ كەزەكتەن تىس سايلاۋىن وتكىزۋ ماسەلەسى بويىنشا كەڭەس وتكىزدى. كەڭەسكە پرەمەر-مينيستر كارىم ءماسىموۆ، پرەزيدەنت اكىمشىلىگىنىڭ جەتەكشىسى نۇرلان نىعماتۋلين، كونستيتۋتسيالىق كەڭەستىڭ توراعاسى يگور روگوۆ، باس پروكۋرور اسحات داۋىلباەۆ جانە تاعى دا باسقالار قاتىستى.

شارا كەزىندە مەملەكەت باسشىسى دەپۋتاتتاردىڭ ماجىلىسكە كەزەكتەن تىس سايلاۋ وتكىزۋ تۋرالى باستاماسىنا جانە بارلىق دەڭگەيدەگى ماسليحاتتارعا كەزەكتى سايلاۋلارعا بايلانىستى قازاقستان حالقىنا ۇندەۋ جاسادى.

قازاقستان پرەزيدەنتى پارلامەنت ءماجىلىسىنىڭ دەپۋتاتتارىنىڭ پارلامەنت ءماجىلىسىنىڭ وكىلەتتىلىگىن مەرزىمىنەن بۇرىن توقتاتۋ جانە جاڭا سايلاۋدى بەكىتۋ تۋرالى ۇسىنىسىنىڭ جان-جاقتى قارالعانىن اتاپ ءوتتى. 

نۇرسۇلتان نازارباەۆ بۇگىنگى شىندىقتا شيكىزاتتىڭ باعاسى تومەن جاعدايىندا ءومىر ءسۇرۋدى ۇيرەنۋدىڭ، يندۋسترياليزاتسيانى، شاعىن جانە ورتا بيزنەستى دامىتۋدى بەلسەندى تۇردە جالعاستىرۋدىڭ قاجەتتىلىگىن اتاپ ءوتتى. 

"قازىرگى كۇردەلى جاعدايدا كورپەگە قاراي كوسىلىپ، قاراجاتتاردى ۇنەمدەپ، جۇمىس ورىندارىن ساقتاپ ءومىر ءسۇرۋدىڭ قاجەت ەكەنىن ءتۇسىنۋ بارلىعىمىزعا ماڭىزدى. قازىرگى جاعدايدا ۇكىمەت پەن پارلامەنت بىرلەسىپ، جيناقتالىپ جۇمىس ىستەۋى كەرەك جانە جەدەل شارالار قابىلداۋى قاجەت. حالقىمىز ءاردايىم بىرىگىپ، قاجەت بولعان جاعدايدا وسى ءبىر كۇردەلى كەزەڭدەردە مۇمكىن بولعان بارلىق قيىندىقتارعا توتەپ بەرۋى كەرەك. جاعدايدىڭ قيىنداعانىنا كىنالىلەردى ىزدەپ، ساياسيلاندىرۋعا تىرىساتىندارعا دا توتەپ بەرۋى كەرەك. بۇل عالامدىق پروتسەسس، وعان بۇكىل الەم، ونىڭ ىشىندە قازاقستان اسەر ەتە المايدى. سوندىقتان بارلىعىمىز بىرىگىپ، ءبىر-بىرىمىزگە كومەكتەسۋىمىز كەرەك", - دەدى مەملەكەت باسشىسى.

قازاقستان پرەزيدەنتى بۇگىندە قوعامنىڭ قيىندىقتارعا توتەپ بەرۋگە دايىن ەكەندىگىنە توقتالدى.

ء"بىز تاۋەلسىزدىگىمىزدىڭ شيرەك عاسىرعا سوزىلعان جولىن لايىقتى تۇردە ءجۇرىپ وتتىك. ءبىز بىرلىگى جاراسقان حالىققا اينالدىق، جاسامپاز ەڭبەكپەن ءونىپ، الەمدە قۇرمەتكە لايىق ءارى ءساتتى مەملەكەت قۇردىق. مەن دەپۋتاتتاردىڭ باستاماسىن قازاقستاننىڭ تاعدىرىنا الاڭداۋشىلىعىمەن كورسەتكەن پاتريوتتىعى دەپ قابىلدايمىن. ماسليحاتقا كەزەكتى سايلاۋمەن قاتار ماجىلىسكە كەزەكتەن تىس سايلاۋىن وتكىزۋ ۋاقىتتى دا، قارجى رەسۋرستارىن دا ۇنەمدەۋگە مۇمكىندىك بەرەدى. مەملەكەت مۇددەسىنە اۋدارعان نازارى مەن جوعارعى تاريحي جاۋاپكەرشىلىگىن كورسەتكەنى ءۇشىن دەپۋتاتتارعا العىسىمدى بىلدىرەمىن", - دەدى نۇرسۇلتان نازارباەۆ.

مەملەكەت باسشىسى ەل كونستيتۋتسياسىنىڭ تالابىنا سايكەس، پارلامەنت پالاتالارىنىڭ توراعالارىمەن، پرەمەر-مينيسترمەن جانە كونستيتۋتسيالىق كەڭەستىڭ توراعاسىمەن كەڭەستىڭ وتكىزىلگەنىن، ونىڭ قورىتىندىسى بويىنشا دەپۋتاتتاردىڭ باستاماسىن قولداۋعا شەشىم قابىلدانعانىن اتاپ ءوتتى. 

"بيلىك وكىلدەرىنىڭ جاڭارۋى - ەل مەن حالىقتىڭ مۇددەسى دەپ سەنەمىن. ساياسي پارتيالار ساۋاتتى، ىسكەر جانە ەل مۇددەسىنە ادال، كۇن تارتىبىندەگى تاپسىرمالاردى تۇسىنە الاتىن ۇمىتكەرلەردى ۇسىنۋى كەرەك. بۇگىن مەن پارلامەنت ءماجىلىسىنىڭ وكىلەتتىلىگىن مەرزىمىنەن بۇرىن توقتاتۋ تۋرالى جارلىققا قول قويدىم. ماجىلىسكە كەزەكتەن تىس سايلاۋ 2016 جىلدىڭ 20 ناۋرىزىنا بەلگىلەندى", - دەدى قازاقستان پرەزيدەنتى. 

نۇرسۇلتان نازارباەۆ بارلىق قازاقستاندىقتان، قوعامنىڭ بارلىق الەۋمەتتىك توبىنان ۋاقىتتىڭ ەركىمەن جاسالعان شەشىمدى قولداۋىن سۇرادى.

"ەلىمىزدىڭ بولاشاعى ءۇشىن بارلىعىڭىزدى سايلاۋعا بەلسەندى تۇردە قاتىسۋعا جانە بىرلىگىمىز بەن تاتۋلىعىمىزدى  كورسەتۋگە شاقىرامىن. كونستيتۋتسيا كەپىلى رەتىندە مەن ورتالىق سايلاۋ كوميسسياسىنا جانە بارلىق مەملەكەتتىك قۇزىرلى ورگاندارعا الداعى سايلاۋلاردىڭ زاڭدى، ءادىل ءارى اشىق ءوتۋىن قامتاماسىز ەتۋدى تاپسىرامىن. سايلاۋ كامپانيالارى جانە سايلاۋدىڭ كۇردەلى كەزەڭدە ۇلتتى شوعىرلاندىرۋعا كومەكتەسەدى جانە ءبىزدىڭ قازاقستانىمىزدى دامۋدىڭ جاڭا بەلەسىنە شىعارادى دەپ سەنەمىن", - دەدى مەملەكەت باسشىسى.

Abai.kz