بىرىككەن اراب امىرلىگىنەن كەلگەن كاسىپكەر ءال-بايداني موحاممەد سالەح حاسان وقو بايدىبەك اۋدانى شايان ەلدى مەكەنىن كوركەيتۋ جۇمىسىنا ينۆەستيتسيا سالماق.  حالىقتىڭ سالاۋاتتى ءومىر سالتىن قالىپتاستىرۋدى نيەت ەتكەن شەتەل كاسىپكەرى 1 ملن. 700 مىڭ  اقش دوللارى كولەمىندە قارجى قۇيۋعا اۋداندىق اكىمدىكپەن كەلىسىمگە كەلدى دەپ حابارلايدى وقو اكىمىنىڭ ءباسپاسوز قىزمەتى.

بايدىبەككە جاساعان ساپارىندا اۋدان اكىمى ب.كوشەرباي مەن ءال-بايداني موحاممەد سالەح حاسان مىرزا شايان اۋىلىنداعى سپورت جانە مادەني دەمالىس نىساندارىنىڭ قۇرىلىسىمەن تانىسىپ، مەموراندۋم نەگىزىندە بىرقاتار  ينۆەستيتسيالىق  جوبالاردى جۇزەگە اسىرۋعا ۋاعدالاستى. قوس تاراپتىڭ كەلىسىمى اياسىندا اۋدانداعى ورتالىق ساياباق پەن ورتالىق ستاديوندى قايتا قۇرۋ، ۆولەيبول، باسكەتبول، گيمناستيكا جانە شاعىن فۋتبولعا ارنالعان ويىن الاڭدارىن ورناتۋ جانە جابىق باسسەين قۇرىلىسى جوبالارىن ىسكە اسىرۋ كوزدەلۋدە.

      اراب ينۆەستورى قارجىلاندىرعان اقباستاۋ اۋىلدىق وكرۋگىندەگى قۇس ءوسىرۋ ورتالىعىنا بۇگىنگى كۇنگە دەيىن 3 ملرد.  500 ملن.  تەڭگە شەتەل ينۆەستيتسياسى تارتىلىپ، وندا قازىرگى تاڭدا 120 ادام جۇمىسپەن قامتىلعان.  2016-2017 جىلدارى جوبانىڭ ءۇشىنشى فازاسى جۇزەگە اسىرىلىپ، تاعى دا 7 ملرد.  تەڭگە شەتەل  ينۆەستيتسياسىن تارتۋ جوسپارلانۋدا. اۋدان اكىمدىگى مەن قۇس ءوسىرۋ ورتالىعىنىڭ باسشىلىعى اراسىندا جاسالعان كەلىسىم بويىنشا جوبانى جۇزەگە اسىرۋ ناتيجەسىندە، جاڭادان اشىلاتىن 400-گە جۋىق جۇمىس ورىندارىنىڭ 80 پايىزىنا اۋدان تۇرعىندارى ورنالاساتىن بولادى.  سونىمەن قاتار،  قوسىمشا كىرىس كوزدەرىن قالىپتاستىرۋ ءۇشىن اتالعان قۇس ورتالىعى اۋداندىق مەملەكەتتىك كىرىستەر باسقارماسىنا سالىق تولەۋشى رەتىندە تىركەلدى.

اباي-اقپارات