بەيسەنبى, 28 ناۋرىز 2024
46 - ءسوز 4657 0 پىكىر 19 اقپان, 2016 ساعات 11:04

نۇرماعانبەتوۆ وسىلاي ايتادى دەپ ويلاماپپىن

تاۋەلسىزدىكتىڭ العاشقى جىلدارى بولاتىن. ول كەزدە مەن قازاقستان سىرتقى ىستەر ءمينيسترىنىڭ ورىنباسارىمىن. ءبىر جولى تۇركيادان شتاب باستىعى كەلدى. قاسىندا كوپ اسكەريلەرى بار ۇلكەن دەلەگاتسيا ەكەن. ولاردىڭ ساپارى اياقتاعان سوڭ سوۆەت وداعىنىڭ باتىرى، ارميا گەنەرالى جانە سول كەزدەگى قازاقستاننىڭ قورعانىس ءمينيسترى ساعادات نۇرماعامبەتوۆپەن بىرگە تۇرىك اسكەريلەرىن شىعارىپ سالدىق. 

 ولار وزدەرىنىڭ ارنايى ۇشاعىمەن كەلىپتى. ءبىز ولاردى ۇشاقتارىنىڭ الدىنا دەيىن اپارىپ، اتتاندىرىپ سالعان سوڭ اۋەجايدىڭ ەكىنشى باسىنداعى كولىكتەرىمىزگە قاراي بىرگە كەلە جاتتىق. ەكەۋمىز عانا. ادەتتەگى قىزمەت جاعدايىندا بولسا ول كىسىنىڭ كوپ نارسەنى اشىلىپ ايتا بەرمەيتىنى تۇسىنىكتى. ويتكەنى، ۇستىندەگى اسكەري فورما، كەڭسە دەگەندەر ادامدى ەرىكسىز باسىپ، تەك قىزمەتتىك جاعدايداعى سوزدەرمەن شەكتەيدى. بىراق، مەن ول كىسىنىڭ وزگە اسكەريلەر سەكىلدى تەك ءامىر-بۇيرىق قانا بەرىپ، دۇڭكىلدەپ، زىركىلدەگەندى عانا بىلەتىن ادام ەمەس، ايتارى بار، ويى تەرەڭ تۇلعا رەتىندە سانايتىنمىن. 

سونىمەن مەن قاتارلاسىپ كەلە جاتقان گەنەرالعا «اعا»، - دەدىم، - قىزمەت بابىنداعىداي اتى-ءجونىن ايتقان جوقپىن، - «ەگەر بىزگە قىتاي شابۋىل جاسايتىن بولسا اسكەرىمىز وعان قاۋقارى جەتە مە؟»،-دەپ سۇرادىم. 

«جوق، ۇستاپ تۇرا المايدى» دەدى. «ال، رەسەي شابۋىل جاساسا شە؟» «وندا دا ۇستاپ تۇرا المايدى». «بولاشاقتا وزبەك، قىرعىزدارمەن ارادا قاقتىعىستار بولۋى مۇمكىن بە؟». «ونداي بولمايدى». «ەگەر قىتاي مەن رەسەيدەن قورعانا الماساق، ال، وزبەك، قىرعىزدار ونسىز دا بىزگە تيىسپەيدى ەكەن، وندا بىزگە وسىنشا مول قارجى شىعىنداپ، اسكەر دايىنداپ، قارۋ-جاراق ساتىپ الىپ نە قىلامىز؟ مەملەكەتتىڭ بيۋدجەتى دە از؟»،-دەگەن سۇراق قويدىم. 

سوندا گەنەرال ويلانىپ كەلە جاتىپ، «قىتايدىڭ اسكەرى بىزدەن كوپ بولعانىمەن ولاردىڭ قازىر كۇشپەن باسقا ەلگە شابۋىل جاساۋ ويى مۇلدە جوق، ال، قىرعىز، وزبەك ەلدەرى بىزگە تۋىسقان، ولاردان قاۋىپ كۇتۋ ورىنسىز بولار ەدى، بىراق، قازاقستاننىڭ قاۋىپسىزدىگى مەن تاۋەلسىزدىگىنە قاتەر توندىرەتىن بىردەن-ءبىر مەملەكەت رەسەي بولادى، ءتۇبى سودان ساقتانۋ ءۇشىن اسكەري دايىندىققا كىرىسە بەرۋ كەرەك» دەدى. 

ءيا، بۇل مەنىڭ دە ويىمداعى دۇنيە ەدى. بىراق، مىنا ءسوزدى قورعانىس ءمينيسترى ساعادات نۇرماعامبەتوۆ ايتقاندا تاڭعالىپ قالدىم. ول كىسىنىڭ سوۆەت اسكەري مەكتەبىندە تاربيەلەنگەن ادام بولعانىمەن، ۇلكەن پاتريوت، مەملەكەتشىل تۇلعا ەكەنىن تولىق تانىدىم. راسىندا ول كىسى مينيستر بولعاندا ورىستارعا كوپ جاقىنداعان جوق. وفيتسەرلەر وقىتۋ، قارۋ-جاراق الۋ ماسەلەسىندە كوبىندە ولاردان اۋلاق ءجۇرىپ، تۇركيامەن جاقىن بايلانىستا بولدى. ال، س.نۇرماعامبەتوۆ كەتكەن سوڭ رەسەيمەن اسكەري بايلانىستا وتە توننىڭ ىشكى باۋىنداي بولىپ كەتتىك. 

بۇل ديپلومات، قوعام قايراتكەرى سايلاۋ باتىرشا-ۇلىنىڭ ايتقان اڭگىمەسى. بۇگىنگى رەسەيدىڭ ۋكرايناعا قاراتقان ساياساتى ارداگەر تۇلعا، ناعىز اسكەري قايراتكەر ساعاداتتاردىڭ قاۋپى قالاي ءدال كەلگەنى قايران قالدىرادى. بۇگىن دە سول گەنەرال ساعاداتتاردىڭ دەڭگەيىندە ويلايتىن اسكەري قولباسىلىرىمىز، گەنەرالدارىمىز بار ما ەكەن؟ ويتكەنى، سونداي تاباندى، ۇستانىمى بەرىك مەملەكەتشىل گەنەرالداردىڭ قانشالىقتى قاجەت ەكەنىن رەسەي بىزگە ءوز ارەكەتىمەن ايقىن اڭعارتىپ وتىر...

مۇرات الماسبەكۇلى

Facebook-تەگى پاراقشاسىنان

0 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1562
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2256
عيبىرات

قايسار رۋحتى عازيز جان

مۇحتار قۇل-مۇحاممەد 3525