جەكسەنبى, 26 ماۋسىم 2022
جاڭالىقتار 4718 0 پىكىر 5 قازان, 2015 ساعات 14:04

سيرياداعى رەسەي اسكەرلەرىنىڭ شابۋىلى جايلى دەرەكتەر جاريالاندى

ينتەرنەتتەن ۋكراينا مەن سيرياداعى رەسەي اسكەرىنىڭ ءىس-قيمىلىنا ايعاق-دەرەكتەر ىزدەۋمەن اينالىساتىن رەسەيلىك بلوگەرلەر رەسەيلىك اسكەري ۇشاقتار تاستاعان بومبالار «ەركىن سيريا ارمياسى» باقىلاۋىنداعى حومس قالاسىنىڭ سولتۇستىگىندەگى تەل-بيسا (تالبيسا) قالاسىندا تۇرعىن ۇيلەرگە تۇسكەنىن دالەلدەيتىن اقپاراتتاردى جاريالادى. بۇل ەلدىمەكەنگە رەسەيدىڭ فەدەراتسيا كەڭەسى پرەزيدەنت ۆلاديمير پۋتينگە اۋە كۇشتەرىن شەتەلدە قولدانۋعا رۇقسات بەرىسىمەن ىلە-شالا جاسالعان العاشقى اۋە شابۋىلدارى ەدى.

War In Ukraine (WIU) ۆولونتەرلەر توبى جۇرگىزگەن زەرتتەۋدە، اۋە سوققىلارى حالىق ەڭ كوپ شوعىرلانعان قالا ورتالىعىنا جاسالعانىن «دجەيش-ءال-تاۋحيد» (Jaish al-Tawhid) توبىنىڭ ارناسىندا جاريالانعان ۆيدەولاردى اتالعان ايماقتىڭ سپۋتنيكتەن تۇسىرىلگەن جانە وزگە دە كوپشىلىككە اشىق سۋرەتتەرمەن سالىستىرۋ ارقىلى كوز جەتكىزۋگە بولادى. زەرتتەۋدە رەسەيلىك اۋە كۇشتەرى شابۋىلى كەزىندە نىساناعا الىنعان تەلل-بيسا قالاسى «سيريالىق ۇستامدى وپپوزيتسيا» سانالاتىن «دجەيش-ءال-تاۋحيد» (Jaish al-Tawhid) توبىنىڭ باقىلاۋىندا بولعانىنا دالەلدەر كەلتىرىلگەن.

سونىمەن بىرگە زەرتتەۋ بارىسىندا بلوگەرلەر رەسەي اۋە كۇشتەرىنىڭ سيريادا قولدانىپ جاتقانى – وفاب-250 جارقىنشاقتى-فۋگاس بومباسى ەكەنىن انىقتاعان.

ينتەرنەتتە جاريالانعان وفاب-250 سيپاتتاماسىندا ونىڭ باسقارىلمايتىن بومبا ەكەندىگى جانە نىساناعا ءدوپ تيەتىن قارۋ تۇرىنە جاتپايتىنى ايتىلعان. بۇعان دەيىن رەسەي قورعانىس مينيسترلىگى وكىلدەرى سيريادا كوزدەگەن جەرگە ءدوپ تيەتىن جوعارى تەحنولوگيالى قارۋ ءتۇرى قودانىلىپ جاتىر دەپ مالىمدەگەن.

سيريالىق وپپوزيتسيا وكىلدەرىنىڭ مالىمدەۋىنشە، تەلل-بيسا قالاسىندا اۋە شابۋىلى سالدارىنان 30-دان اسا بەيبىت تۇرعىن، سولاردىڭ اراسىندا ايەلدەر مەن بالالار قازا تاپقان.

رەسەي اسكەري باسشىلىعى وكىلدەرى بۇنداي ايىپتاۋلاردى جوققا شىعارىپ، «تەك بارلاۋ مالىمەتتەرىنە سايكەس انىقتالعان جانە ەلدىمەكەندەردەن تىس ايماقتاعى نىسانالارعا عانا سوققى جاسالادى» دەپ مالىمدەگەن.

اباي-اقپارات

0 پىكىر