جۇما, 1 شىلدە 2022
ماسقارا! 7888 0 پىكىر 5 قازان, 2015 ساعات 19:22

"كرىشالى" ديرەكتور جۇكتى ۇستازدى نەگە باسىنادى؟

ءبىلىم جانە عىلىم ءمينيسترى اسلان ءسارىنجىپوۆتىڭ نازارىنا

2015 جىلى قوستاناي مەملەكەتتىك پەداگوگيكالىق ينستيتۋتىن قىزىل ديپلومعا ۇزدىك بىتىرگەن ءامىروۆا ۇلپان جۇماعاليقىزى قوستاناي قالاسىنىڭ №5 مەكتەپكە حيميا ءپانىنىڭ مۇعالىمى بولىپ وسى جىلى جۇمىسقا ورنالاسادى.

ءبىر ايداي قىزمەت ىستەگەن سوڭ، بويى تالدىرماش كەلگەن، دەنەسى جۇقالتاڭ ۇلپاننىڭ جۇكتى ەكەنىن بىلىنە باستايدى. مۇنى بايقاعان مەكتەپ ديرەكتورى يسەتوۆا باقىتجان قابدىقاپارقىزى «وز ەركىڭمەن ارىز جازىپ، جۇمىستان شىق، مەنىڭ ساعان "دەكرەتنىي" تولەيتىن باسى ارتىق قاراجاتىم جوق!» دەپ جەكىرىپ، بىرەر كۇندە جاس كەلىنشەكتىڭ جۇيكەسىن جۇقارتىپ جىبەرەدى. بۇل ازداي مەكتەپتىڭ ديرەكتورى جيىرما ءبىر جاستاعى ورىمدەي جاس كەلىنشەكتى كابينەتىنە قاماپ: «جۇمىستان شىعۋ تۋرالى ارىز جازباساڭ، وسى جەردەن شىقپايسىڭ!» – دەپ، زىركىلدەپ، كابينەتتىڭ ەسىگىن قۇلىپتاپ كەتىپ قالادى. ءبىراز ۋاقىت وتكىزىپ قايتىپ كەلگەن مەكتەپ ديرەكتورى يسەتوۆا باقىتجان جۇكتى كەلىنشەكتى قيناۋىن ودان ءارى جالعايدى. اقىرى ءوز بىلگەنىن ىستەپ، كابينەتىنىڭ ەدەنىندە دومالاپ، ءىشىن باسىپ، قينالىپ جاتقان ۇلپاننىڭ قولىنا قالام مەن قاعاز بەرىپ دەگەنىنە جەتەدى.  وسىلايشا ديرەكتور «جۇمىستان ءوز ەركىممەن بوساتىڭىز» دەگەن كوپتەن كۇتىپ جۇرگەن ارىزىن قولىنا تۇسىرەدى. 

جۇكتى بولعانىنا 5-6 اي شاماسى بولىپ قالعان ۇلپان قاتتى قورقۋدىڭ سالدارىنان ىشىندەگى نارەستەسىنە تۇسىك تاستاۋعا دەيىن شاق قالىپ، ۇيالى تەلەفونى ارقىلى كۇيەۋىنە حابارلاعان ەكەن، ايتەۋىر جەدەل جاردەم ۋاقىتىندا جەتىپ، جۇكتى كەلىنشەكتى اۋرۋحاناعا جاتقىزادى. قازىرگى ۋاقىتتا قۇرساعىنداعى نارەستەسىنە زيان تيگەندىكتەن تۇسىك تاستاۋ قاۋپى تونگەن ۇلپان قوستاناي قالالىق اۋرۋحاناسىندا ساقتاۋدا جاتىر. ال ونىڭ تۋىس-تۋمالارى ادىلدىك ىزدەپ قوستاناي ءىىم باسقارماسىنا بارسا، «بۇل جەردە قىلمىستىق باپ جوق، باسقا جەرگە بارىپ شاعىمدانىڭىزدار» دەپ ازار دا بەزەر بولسا، «نۇر وتان» پارتياسى امالدارى بولماي، قولدارىن جايادى ەكەن ەكى جاققا. لاجى قۇرىپ، باسقا امالدارى قالماعان جاڭاعى جۇكتى كەلىنشەكتىڭ تۋىستارى قوستاناي قالالىق وقۋ ءبولىمىنىڭ باستىعى ۆ.ا. تسىمباليۋككە بارسا: «مەكتەپ ديرەكتورى قاراماعىنداعى مۇعالىمدەرىنە نە ىستەسە دە ءوز ەركى» – دەپ، ماسقارانىڭ ءبىر شەتىن شىعارىپتى. ال ەندى الگى «قاراماعىنداعى مۇعالىمدەرگە نە ىستەسە دە ءوز ەركىندەگى» №5 مەكتەپتىڭ ديرەكتورى استانادا دوكەي «كرىشاسى» بار ەكەندىگىن دە ەسكە سالىپ قويىپتى... 
«قازاقستان – قوستاناي» تەلەارناسى اۋرۋحانادا ەمدەلىپ جاتقان جۇكتى مۇعالىم ۇلپاندى بەينەتاسپاعا ءتۇسىرىپ كەتكەن ەكەن، ونىسىن وسى ۋاقىتقا دەيىن «ايالاپ»، كورسەتۋگە قيماي وتىرسا كەرەك. ال الدىندا عانا «وسى جاعداياتتى تۇسىرەمىز، تەلە-ارنادان كورسەتەمىز» دەپ باتىرسىنىپ جاۋاپ بەرگەن كتك ارناسىنا دا «تۇماۋ» تيسە كەرەك، «اۋىزدارىن اق داكەمەن تۇمشالاپ وتىر» دەيدى جاس مۇعالىمنىڭ تۋىستارى...

قۋانىش مۇقتاي

Abai.kz

0 پىكىر

ۇزدىك ماتەريالدار