جۇما, 29 ناۋرىز 2024
بيلىك 4377 0 پىكىر 7 قازان, 2015 ساعات 02:00

"قازىنالى وڭتۇسىتىك" اتىراۋدان تۇلپار ءمىنىپ قايتتى

باتىس جۇرتشىلىعىن ءوز ونەرىمەن ءتانتى ەتكەن وڭتۇستىكتىڭ ونەرپازدارىنا ۇلكەن سىي-قۇرمەت كورسەتىلدى.  انىعىراق ايتساق،  وبلىستىق مادەنيەت باسقارماسىنىڭ ۇجىمى  دايىنداعان «قازىنالى وڭتۇستىك» اتتى باعدارلاماسىنا ءتانتى بولعان اتىراۋلىق اعايىندار ونەر مايتالماندارىنا تەمىر تۇلپاردى سىيعا تارتتى. جايىقتىڭ جاعاسىنداعى ءۇش كۇنگە ۇلاسقان مادەني كۇندەرى مەرەكەسىنە كۇنگەيدەن ات تەرلەتىپ بارىپ، باتىس جۇرتشىلىعىنىڭ ىستىق ىقىلاسىنا ءبىز دە بولەندىك، - دەپ جازادى "وڭتۇستىك رابات" گازەتىنىڭ ءتىلشىسى.

اتىراۋ جۇرتشىلىعى وڭتۇستىك دەلەگاتسياسىن تەمىرجول بەكەتىندە قۋانا، ءسان-سالتاناتپەن قارسى الدى. بۇل باتىستاعى اعايىننىڭ جومارتتىعىن عانا ەمەس، ولاردىڭ كۇنگەيدەگى مادەنيەت پەن ونەرگە دەگەن رياسىز قۇرمەتىن كورسەتسە كەرەك. مۇنايلى وڭىردەگى مادەنيەتتىڭ العاشقى كۇنىندە جەرلەستەرىمىز كوپشىلىككە كەڭەيتىلگەن كورمە-ەكسپوزيتسياسىن ۇسىندى. مۇندا وڭتۇستىك قولونەرشىلەرىنىڭ 1000-نان استام تۋىندىلارى مەن تاريحي جادىگەرلەرى، قىلقالام شەبەرلەرىنىڭ سۋرەتتەرى قويىلدى. بەينەلەۋ ونەرى مۇراجايىنىڭ باسشىسى، بەلگىلى سۋرەتشى اينابەك وسپانوۆ تا مۇنايلى وڭىرگە مازمۇندى شىعارماسىن ارقالاي كەلىپتى. ايتۋىنشا، تاريحي تۋىندىنىڭ ماعىناسى اتىراۋدىڭ اۋماعىمەن استاسادى. اتىراۋ وبلىستىق م.وتەمىسۇلى اتىنداعى قازاق دراما تەاترىندا باستالعان  شاراعا ءوڭىر تۇرعىندارى دا كوپتەپ جينالدى.

ءبىزدىڭ دەلەگاتتار  مادەنيەت كۇندەرى اياسىندا ءوڭىردىڭ اۋدان-قالاسىن ارالاۋدى دا ۇمىتقان جوق. ال ش.قالداياقوۆ اتىنداعى وبلىستىق فيلارمونيانىڭ ۇجىمى مەن جەرگىلىكتى انشىلەر م. وتەمىسۇلى اتىنداعى قازاق تەاترىنىڭ ساحناسىن ءشامشىنىڭ اندەرىمەن الديلەدى. بەكزات ونەر قازاق جانە شەتەلدىڭ كلاسسيكالىق شىعارمالارى دا شىرقالدى. وڭتۇستىكتىڭ ونەرىن تانىستىرىپ، ونى ەل اراسىندا دارىپتەۋگە كەلگەندە حالىقارالىق، رەسپۋبليكالىق بايقاۋلاردىڭ تالاي دۇركىن  جەڭىمپازى اتانعان   «قازىنا» بي ءانسامبىلىنىڭ ورنى بولەك. بۇل جولى دا بي توبى قازاقتىڭ ۇلتتىق بيىمەن قاتار، وزگە ەتنوس وكىلدەرىنىڭ بيلەرىنە ءار بەرە ورىنداپ شىقتى.

شىڭعىس مۇقان، اتىراۋ وبلىسى اكىمىنىڭ ورىنباسارى:

– قازاق ونەرى بولىنبەيدى. ونەر — بارشا قازاقستاندىقتارعا، بىزدە شوعىرلانعان ەتنوس وكىلدەرىنە ورتاق دۇنيە. دەگەنمەن ءار ءوڭىردىڭ مادەنيەتى مەن ونەرىن تانىستىراتىن، ونداعى تۇرمىس-تىرشىلىكتەن سىر شەرتەتىن ۇجىمدار بولادى. وسىنداي ونەردىڭ ۇلكەن كەنىشى  وڭتۇستىكتە دەپ بىلەمىز. ايتۋلى مادەنيەت كۇندەرىنىڭ كوكسەگەنى دە — تاجىريبە الماسۋ، قازاقتىڭ ۇمىت قالعان ءداستۇر-مادەنيەتىن جاڭعىرتۋ، جاقسىنى ۇيرەنۋ. سوندىقتان، قازاقي قۇندىلىقتاردىڭ قايماعى بۇزىلماعان كۇنگەيلىك ونەر ۇجىمدارىنان ءبىزدىڭ دە ۇيرەنەرىمىز كوپ.

جايىق جاعاسىنىڭ حالقى وڭتۇستىك كۇيشىلەرىنىڭ «كۇي تارتىس» باعدارلاماسىنا دا كۋا بولدى. قوس ىشەكتىڭ بويىمەن بارشا سىردى سىرتقا شاشقان كۇيشىلەر ۇلتتىق سازدى اسپاپتىڭ قۇلاعىندا ويناپ، حالقىمىزدىڭ وتكەنى مەن بۇگىنىن، ءتول تاريحىن جاڭعىرتا، كۇمبىرلەگەن كۇي توكتى. بۇل بىزدەگى كۇي ونەرىنىڭ دامۋ دەڭگەيىن كورسەتىپ، قاناتىن كەڭگە جايۋىنا دالەل بولسا كەرەك.

باتىستاعى اعايىنعا وڭتۇستىكتەگى تەاتر ونەرىن تانىستىرۋعا وبلىستىق ءازىل-سىقاق جانە ساتيرا تەاترى دا بارعان بولاتىن. ونەر ۇجىمدارى كورەرمەن قاۋىم الدىندا توسىلعان جوق، ج.ايماۋىتوۆتىڭ «سىلاڭ قىز» كومەدياسىن ساحنالادى. كوپشىلىكتى كۇلكىگە قارىق قىلدى. اسىرەسە، قوعامداعى اقيقات پەن زاماننىڭ اعىمىن ازىلمەن استارلاپ جەتكىزگەن ارتىستەرگە دۋ قول شاپالاق قارشا جاۋدى.

مادەنيەت كۇندەرى «شىرايلى شىمكەنت – ارايلى اتىراۋ» اتتى ەكى وبلىس قۇرامالارىنىڭ ايتىسىنا ۇلاستى. جىر باسەكەسىنە ءبىزدىڭ ءوڭىردىڭ سۋىرىپ سالما اقىندارىن بەلگىلى ايتىسكەر اقىن مارجان ەسجانوۆا باستاپ باردى. مارجان اقىن باتىستىڭ ماقتانىشىنا اينالعان جاس تالانت شالقارباي ىزباساروۆپەن ايتىسىپ، ونىڭ «شىمكەنتتىك ءادىس» دەگەن تىركەسىنە تويتارىس بەردى.

ال وڭتۇستىكتە، قالا بەردى ەل اۋماعىنداعى الامان ايتىستاردا جۇلدەلى ورىنداردى ەنشىلەپ، جاسىنداي جىرلارىمەن كوپتىڭ العىسىن ارقالاپ جۇرگەن اقىن قاجىمۇحان ابزالوۆ تا ساحنادان كورىندى. جەرلەسىمىز اتىراۋدىڭ جەر استى بايلىعىن جىرىنا ارقاۋ ەتتى. ءوز كەزەگىندە ءوڭىردىڭ كەلەلى ماسەلەلەرىن دە اينالىپ وتپەدى. ءتىپتى، بروكونەرلەردىڭ باعالى ۋىلدىرىقتاردى شەتەل اسىرىپ جاتقانىن دا جىرىمەن جەتكىزدى.

جانداربەك زايدۋللين، اتىراۋ قالاسىنىڭ تۇرعىنى:

– وڭتۇستىكتىڭ قويناۋى — تۇنعان تاريح، قازىنا. سوندىقتان كورمەگە اكەلگەن دۇنيەلەرىن كورىپ، تاعى دا تاڭ-تاماشا بولىپ جاتىرمىز. ءاربىر تۋىندىنىڭ وزىنە قاراپ، ەلدىڭ وتكەنىن ەسكە الۋعا بولادى. ال ش.قالداياقوۆ اتىنداعى فيلارمونيا ۇجىمىنىڭ قولعا العان كونتسەرتتىك كەشىنە كورشىلەرىمىزبەن بىرگە كەلدىك. اعايىن-تۋىس تا ارنايى كەلىپ، تاماشالادى. وركەستردىڭ سۇيەمەلدەۋىمەن ورىندالعان اندەردى تىڭداپ، رۋحاني بايىپ قالدىق. ال وبلىسارالىق  ايتىستا وڭتۇستىك اقىندارىنىڭ قازاقي سوزدەرىن، ونداعى ويماقتاي ويلارىن، قوعامداعى ماسەلەلەردى قوزعاعانىن كورىپ، قوشەمەت كورسەتتىك. جارايسىڭدار دەگىم كەلەدى!

زالداعى كورەرمەن، اسىرەسە ءبىرجان بايتۋوۆ پەن ساعادات نۇرمانوۆتىڭ ايتىسىن اسىعا كۇتتى. قوس ءوڭىردىڭ ابىرويىن ارقالاپ شىققان اقىندار الدىمەن  اتىراۋ مەن شىمكەنتتىڭ شەجىرەسىنە توقتالدى. الاش ارىستارىن، ونداعى باتىر مەن حانداردىڭ ۇتىمدى ۋاجدەرىن،  ەل ىشىندە جۇرگىزگەن بيلىكتەرىن ايرىقشا ايتىپ ءوتتى.

اقىندار ايتىسى «دوستىق» ۇرانىمەن ءتامامدالدى. الامانعا اتسالىسقانداردىڭ ارقايسىسىنا 100 مىڭ تەڭگەدەن سىياقى تابىس-تالدى. ال، «قازىنالى وڭتۇستىك» اتتى كونتسەرتتىك شارانى قولعا الىپ، مادەنيەت كۇندەرىنىڭ مارتەبەسىن ۇستەم ەتۋگە سەبەپكەر بولعان مادەنيەت باسقارماسىنىڭ باسشىلىعىنا اۆتوكولىكتىڭ كىلتى تابىستالدى. ايتا وتەيىك، وسىناۋ 3 كۇنگە ۇلاسقان مەرەكەگە ءوڭىرىمىزدىڭ 160-تان استام ونەرپازى قاتىستى.

ءمولدىر بەكەەۆا

0 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1578
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2274
عيبىرات

قايسار رۋحتى عازيز جان

مۇحتار قۇل-مۇحاممەد 3591