جەكسەنبى, 14 ءساۋىر 2024
بەتبۇرىس 6218 0 پىكىر 27 قازان, 2015 ساعات 17:32

استاناعا ابە كەلدى

بۇگىن ەلورداعا جاپونيا پرەمەر-ءمينيسترى سيندزو ابە مىرزا رەسمي ءىس-ساپارمەن كەلدى. بۇل تۋرالى abai.kz پورتالى اقوردانىڭ ءباسپاسوز قىزمەتىنە سىلتەمە جاساي وتىرىپ حابارلايدى.

جاپونيانىڭ  پرەمەر-ءمينيسترى بولىپ قىزمەت اتقارعان 9 جىلدىڭ ىشىندە ابە مىرزا قازاقستانعا العاش كەلدى. ال، دالىرەك ايتساق، سيندزو ابە  2006 جىلى سول كەزدەگى پرەمەر-مينيستر دزيۋنيتيرو كويدزۋمي مىرزانىڭ كەڭەسشىسى رەتىندە قازاق توپىرعان باسقان-دى.

ورتالىق ازيادا قىتايمەن باسەكەلەس بولۋعا نيەت بىلدىرگەن ابە مىرزا وزبەكستان، تۇركىمەنستان مەن قىرعىزستانعا ساپارىنان كەيىن قازاقستانعا ارنايى ات باسىن بۇردى.

جاپونيا پرەمەر-ءمينيسترى سيندزو ابە مەن قازاقستان پرەزيدەنتى نۇرسۇلتان نازارباەۆ بۇگىنگى كەزدەسۋدەن كەيىنگى ناتيجەلەر قانداي بولعانىن بايانداپ بەردى.

سيندزو ابە، جاپونيا پرەمەر-ءمينيسترى:

-بىرىنشىدەن، جاپونيا الداعى ۋاقىتتا دا قازاقستاننىڭ ەكونوميكالىق رەفورمالارىن قولدايدى. اسىرەسە، مەملەكەتتىك قۇرىلىم مەن جەكە سەكتورلاردا. ءبىز بۇل جونىندە كەلىسىمگە كەلدىك. ەكىنشىدەن، قازاقستانداعى اەس قۇرىلىسىنا كەلەر بولساق، ءبىز ينۆەستيتسيا قۇيۋ جونىنەن كەلىسىمگە قول قويدىق. سونداي-اق، كادرلار دايارلاۋ، دەنساۋلىق ساقتاۋ، ونەركاسىپ ت.ب. سالالاردا دا بىرلەسىپ جۇمىستار جۇرگىزەتىن بولامىز.

نۇرسۇلتان نازارباەۆ، قازاقستان پرەزيدەنتى:

-قازاقستان مەن جاپونيا ىنتىماقتاستىعى جوعارى ەلدەر قاتارىندا. ءبىز بۇگىن كەلىسىمگە كەلگەندەي، سيرەك كەزدەسەتىن مەتاللدار ءوندىرۋ، اتوم ەنەرگەتيكاسى، بانك سەكتورى، حيميا ونەركاسىبى، اۋىل شارۋاشىلىق سالاسى مەن ترانسپورت ونەركاسىبى سالالارىندا بىرلەسكەن جوبالارعا قول قويىلدى. بۇل جوبالار الداعى ۋاقىتتا ناتيجەسىن كورسەتەدى دەپ ويلايمىن.

ايتا كەتەيىك، وسىعان دەيىن ءمالىم بولعانداي سيندزو ابە مىرزا وزبەكستان رەسپۋبليكاسىنا ساپارى بارىسىندا 8,5 ميلليارد دوللارلىق كەلىسىمگە قول قويعان بولاتىن. ال تۇركىمەنستانعا جاساعان رەسمي ساپارى 18 ميلليارد دوللارلىق كەلىسىممەن اياقتالعان. ودان كەيىن قىرعىز پرەزيدەنتى الماسبەك اتامباەۆپەن كەزدەسكەن سيندزو ابە مىرزا 0,1 پايىزدىق مولشەرمەن قىرعىزستانعا 120 ميلليون دوللار نەسيە بەرگەن.

ال قازاقستان پرەزيدەنتى نۇرسۇلتان نازارباەۆپەن كەزدەسۋى بارىسىندا جۇرگىزگەن كەلىسسوزدەر ناتيجەسىندە قابىلدانعان جوبالاردىڭ سوماسى ناقتى قانشا ميللياردتى (ميلليون) قۇراعانى تۋرالى ايتىلماعان. دەگەنمەن، استانادا كەزدەسكەن مەملەكەت باسشىلارى ءبىراز جىلدار بويى ءۇزىلىپ قالعان قازاقستان-جاپونيا قارىم-قاتىناسى قايتا جانداناتىن كۇن الىس ەمەس ەكەندىگىن اڭعارتتى. وسىلايشا ورتالىق ازيادا ەكونوميكالىق ۇستەمدىك جۇرگىزۋ تالاسىنا جاپونيا دا ارالاسۋعا قۇلىق تانىتىپ وتىر.

نۇرگەلدى ابدىعانيۇلى

Abai.kz

0 پىكىر