بەيسەنبى, 6 قازان 2022
قۇيىلسىن كوشىڭ 5250 0 پىكىر 28 قازان, 2015 ساعات 08:13

قىتاي قازاققا انىقتاما بەرمەيتىن بولدى


قىتاي حالىق رەسپۋبليكاسىنىڭ ەڭ جوعارى بيلىگىنىڭ ورگانى سانالاتىن «رىنمين رىباو» (حالىق گازەتى) گازەتىنىڭ 2015 جىلدىڭ 25-تامىزداعى سانىنىڭ 11-بەتىندە قىتايدىڭ قوعامدىق قاۋىپسىزدىك مينيسترلىگىنىڭ وسى جىلدىڭ 22-تامىزىنداعى بۇيرىعىنا سىلتەمە جاساي وتىرىپ، ەندىگى جەردە قىتاي قوعامدىق قاۋىپسىزدىك (ىشكى ىستەر) تاراۋلارىنىڭ 18 ءتۇرلى شەكتەن شىققان، سوراقى انىقتامانى (گازەتتىڭ ءتول ءسوزى) بەرمەيتىندىگىن جاريالادى.

سونىڭ 14-ءسى – «زاڭعا قايشى قىلمىسىنىڭ بار نەمەسە جوقتىعى» جونىندەگى انىقتاما. وندا اتالعان انىقتامانى نە سەبەپتى بۇدان بىلاي جەكە تۇلعانىڭ وزىنە بەرمەيتىندىگى (بۇرىن قىتايدىڭ ءوز ىشىندە ەرەكشە قاجەت بولعان نەمەسە ازاماتتىڭ جەكە باسىنا بايلانىستى كۇدىك-كۇمان تۋىنداعان جاعدايدا عانا بەرىلىپ كەلگەن)  جونىندەگى قۇزىرەتتى مينيسترلىك بىلايشا ءتۇسىندىرىپتى: «كەز كەلگەن جەكە تۇلعانىڭ قىلمىسقا قاتىستىلىعى جونىندەگى مالىمەت قوعام قاۋىپسىزدىك مەكەمەلەرىنىڭ ىشكى شارۋاسى، سول سەبەپتى، مەملەكەتتىك اكىمشىلىك جانە ادىلەت مەكەمەلەرى جەكە تۇلعانىڭ ساياسي تولىمدىلىعىن تەكسەرگىسى جانە دە جەكە تۇلعاعا قاتىستى باسقا دا جاعداياتتاردى انىقتاعىسى كەلسە، ال، كاسىپورىندار مەن قوعامدىق مەكەمەلەر ءوز قارماعىنداعى اسا ماڭىزدى دەگەن لاۋازىمدى ورىندارعا تاعايىنداماقشى بولعان جەكە ادامدار جايلى تولىق ماعلۇمات العىسى كەلسە، تەكسەرۋ وكىلەتتىگى بار قۇزىرەتتى ادامدارىن جۇمساپ، ارنايى قىزمەتتىك كۋالىگىمەن جانە اتالعان مەكەمەلەردىڭ ارنايى قاتىناس حاتىمەن كەلگەن جاعدايدا عانا بەرىلۋى مۇمكىن. ال، جەكە تۇلعانىڭ ءوز قولىنا اتالعان انىقتاما بۇدان بىلاي ەشقاشان بەرىلمەيدى» – دەپ ءبىر-اق كەسىپتى. 

قحر-سى قوعامدىق قاۋىپسىزدىك مينيسترلىگىنىڭ (ىشكى ىستەر)  اتالعان بۇيرىعىنا سايكەس، قىتايدان ەلگە ورالاتىن اعايىندار  قر ىشكى ىستەر ورگاندارىنىڭ تالابىن ورىندايمىن دەپ ەندىگى جەردە، قىتايدىڭ ەڭ جوعارى بيلىگىنىڭ ءۇنى بولىپ سانالاتىن «رىنمين رىباو» (حالىق گازەتى) گازەتىنىڭ ءوزى «شەكتەن شىققان، سوراقى انىقتاما» دەپ اتاعان «قىلمىستىق جاعدايعا بايلانىستى انىقتامانى» قىتايدىڭ قۇزىرەتتى ورگاندارىنان سۇراپ، بوس اۋرەگە تۇسپەگەنى ءجون. جالعان انىقتاما اكەلىپ، جازىقتى بولۋدان ءتىپتى دە ساق بولىڭىزدار، اعايىن!

راقىم ايىپۇلى

Abai.kz

0 پىكىر