جۇما, 21 ماۋسىم 2024
46 - ءسوز 9363 0 پىكىر 29 قازان, 2015 ساعات 13:34

قيسىق مىنەز

ورتەپ جىبەرۋ دەگەننەن شىعادى عوي... اشۋلانسا سىرىڭكەگە جابىساتىن قيسىق مىنەز ءبىر ادام بار ءبىزدىڭ ۇيدە دە.

ول كەزدە ءبىز كىشكەنتايمىز. پاپامنىڭ قۇرداستارى اسارلاتىپ ءبىزدىڭ ءۇيدى تۇرعىزىپ بەردى. ءتىلى قىرشاڭقى ءبىر قۇرداسى ءبىر كۇنى "مىناۋ مەنىڭ سالعان ءۇيىم، قاي كۇنى كەلسەم دە ءوزىم بىلەمىن، سەن ەمەس بۇل ءۇيدىڭ قوجايىنى" دەپ ءشالتيىپ توردەن شىقپاعان عوي. قاتتى اشۋلانعان پاپام كەروسين شاشىپ جىبەرىپ، ۇيگە وت قويىپتى. كورشىلەر دەر كەزىندە ءورتتى ءسوندىرىپ، ءۇيدى الىپ قالدى. توسەك كورپەلەر ورتەنىپ كەتىپ، كورشىلەر بەرگەن تاقىر كىلەمنىڭ ۇستىندە جاتىپ كۇرسىنگەن سول كەزدە... اياق استىنان كەلىپ قالاتىن قىڭىر مىنەزىنە وكىندى-اۋ دەيمىن.

ءبىر ءۇيدىڭ شارۋاسىن دوڭگەلەتىپ وتىرعان پاپامنىڭ "گاز-53" ماشيناسى بولعان. اۋىلدا ءشوپ تۇسىرەدى، قي تاسيدى، جىڭعىل تاسيدى. كادىمگىدەي تابىس اكەلىپ وتىرعان ماشينا ەدى، جارىقتىق... قۇجاتتارى دۇرىس بولماعاسىن ماي قىزمەتكەرلەرى كەلىپ، پاپاما تيىسكەن عوي. پاپام ەرەگىسىپ العان، "قۇجاتتارىن دا، ماشينانى دا ەشقايدا اكەتپەيسىڭدەر" دەيدى. ءبىر كەزدە ارتقى ءنومىرىن اعىتىپ الىپ جاتقان گايششنيكتى يتەرىپ تاستاپ، ماشينانى قىزدىرىپ الدى دا، شاڭدى بۇرقىراتىپ تارتتى اۋىل سىرتىنا. ون بەس مينۋت وتكەندە كوكجيەكتەن قىزىل جالىن لاپ ەتتى. ءبىر سۇمدىقتىڭ بولعانىن سەزگەن ءبارىمىز تۇرا جۇگىردىك. بارساق قولىندا ماشينانىڭ رۋكوياتكاسى بار پاپام كەلە جاتىر. "تتتۇسوگەيىندەرررر، كەرەگى وسى ما؟" دەدى دە ۇيگە كىرىپ كەتىپ جاتىپ الدى. ەرتەڭىنە قاپ-قارا تەمىرگە اينالىپ كەتكەن ماشيناسىنىڭ قاڭقاسىنىڭ قاسىندا ۇزاق ءجۇردى اينالىپ. تاعى دا وكىندى-اۋ دەيمىن...

باقىتگۇل سارمەكوۆا

Facebook-تەگى پاراقشاسىنان

 

0 پىكىر