بەيسەنبى, 28 ناۋرىز 2024
ادەبيەت 7768 0 پىكىر 2 قاراشا, 2015 ساعات 19:19

ولجاس-الجاس

جۇرەكتىڭ ءسوزى – اق الماس،
ۇمتىلعان شاق ەد الدى اڭساپ.
ەسىمدە ءبارى، ەڭ العاش
الماتى جاققا بارعان شاق.

وسىندا كەلىپ جيىلعان،
سىيىنعان كىلەڭ ۇمىتكەر.
اتىراۋ، التاي – قيىردان،
قيىلعان قىز بەن جىگىتتەر.

ورتەيتىن سىندى جاي ءتۇسىپ
كازگۋ-ءدىڭ جاتاقحاناسىن،
جاتامىز تۇندە ايتىسىپ:
«وياتىپ ۇلتتىڭ ساناسىن...»

جاستىقتىڭ وتى مۇزدار ما –
كەتپەسە داۋىل ءسوندىرىپ؟!
كەتە جازدايمىز – قىزعاندا:
«قازاقتى جەكە ەل قىلىپ!»

جازۋ جوق مۇقابامىزدا!
سول شاققا ەنىپ... قاراڭىز.
شاتىرلاپ تۇتانامىز دا،
پىشىرلاپ ءسونىپ قالامىز.

جىگەردەي وڭشەڭ سول جاستى
شىعارۋعا ەستەن حاقىم جوق! ...
ماقتايتىن ءبارى ولجاستى:
«ابايدان وتكەن اقىن!» – دەپ.

البىرت ەك كىلەڭ داۋعا يە،
سارابدالى جوق سالۋالى.
كەڭ بولاد دەۋشى ەد – اۋليە،
كەشىرگەي، اباي ارۋاعى!..

ىزدەلىپ باعزى كۇرە-ءتىن،
جوندەلىپ كونە ءباز ۇيا
اۋىزداردا ىلعي جۇرەتىن:
«جاس تۇلپار» مەنەن «ازيا».

ەستىدىك كەنەت – تىلەۋلى ەل،
جارىلماي قالدى ەت-جۇرەك:
«ولجاستى كۇندەس بىرەۋلەر
سوققىعا جىعىپ كەتتى!» – دەپ.

كەزدەسكىمىز كەپ، شىنىمەن،
الدە ءبىر جاۋدى كۇتىنىپ،
كۇپىنىپ جۇردىك تۇنىمەن
جۇدىرىعىمىزعا تۇكىرىپ.

كىلەڭ ءبىر جالاڭ نارگەسكەن –
ماحامبەتكە ەدىك اعايىن، –
تارتتىردىق سىرتتاي «دانتەس» پەن
«ورازباي ءيتتىڭ» سازايىن!

اتانداي ەردى جىلاتقان،
دەپ جۇردىك: «ۇلتتا جوق بىرلىك!..»
...سونىمەن، كۇتكەن «سىناقتان»
ءوزىمىز تاياق جەپ تىندىق!

اڭگىمە – ەمەس ول جايلى،
ەر جايلى سول ءبىر – اڭگىمە.
ۇمىتۋعا ونى بولمايدى،
سونداعى جىرىم بار، مىنە!..

جاستىقتىڭ ءىسى – اق الماس!
جاس ەدىك – «ورىسقا» ءوشى كوپ.
جادىما ءسىڭدى سول ولجاس –
«ازاتتىق پەرىشتەسى» بوپ.

قۇزىندا قىران قارلىققان
ارمان دا ءبىزدىڭ اسقار ەد!..
قاناتىنا ەپتەپ قان جۇققان
«پەرىشتە» قانداي اسقاق ەد؟!

«قازاقتىڭ ار مەن باعىنا
جىبەرگەن ۇل، – دەپ، – حاق-ءتاڭىر!»
جان جولاتپاۋشى ەم جانىنا،
قيماۋشى ەم جاماناتقا ءبىر.

ورالىپ كەنەت عايىپتان،
اڭساعان بىزدەر ازاتتىق
سانامىز شاقتا ايىققان،
كوتەرگەندە ەڭسە قازاق تىك،

الجاسىپ كەتتى سول اعام
سوقتى دا جاتتىڭ سويىلىن. ...
كەتەيىن سەنىڭ ساداعاڭ،
سەن مەنى سوكپە، ەي، ءىنىم!

قىسقاسى، مىناۋ، اڭگىمە:
بولساڭ دا، ءتىپتى، قۇتپانىم! –
جاۋىمسىڭ مەنىڭ ماڭگىگە،
تىلىمە قارسى شىققانىڭ!

شىنىڭدى ايت بۇگىن، قاسقا ولەڭ،
قالسا دا ءسونىپ ازات كوك! –
جۇماققا بارماي باسقامەن،
توزاققا كىرەم – قازاق بوپ!..

قازاققا تيەر قايىردى
جۇمساسا قارا باسىنا،
«ابايدان وتكەن شايىردى» –
شالامىن ساداعاسىنا!

...جازعانمەن دانىشپانشا ولەڭ،
ۇمىتتىڭ، اعا، حاقىڭدى...
باياعى ورىستارشا مەن:
«الجاس!» – دەپ كەتتىم اتىڭدى.

كەتتىڭ سەن تاستاپ ۇلى ەلدى،
تونالدى سەندىك بار كيە.
جات جولعا سالىپ جىبەردى –
باستاعى بوتەن تاربيە.

جاۋقازىن جۇرتتى بەيىتتىڭ
سالماقسىڭ قايتا استىنا.
شىرماپ اپ ۋى ءجويىتتىڭ،
ساناڭدى جات شەل باستى ما؟!

...سوناۋ ءبىر وتكەن باسىمنان
جىلداردى كورەم پاراقتاپ،
كوشىپ وتەدى قاسىمنان
كىلەڭ ءبىر قىرشىن – ارى اپپاق!

بۇزىلىپ مۇلدە ءوڭى، ءۇنى،
جاتقانداي بەينە جاۋ تەرگەپ
تاس تالقان بولعان سەنىمى
بوزبالا تۇراد جاۋتەڭدەپ!...

...نازارىن بۇرىپ تەرىسكە،
كەتەدى ۇشىپ جانىمنان-
مەرت بولعان اپپاق پەرىشتە-
قاپ-قارا كەبىن جامىلعان!..

سۆەتقالي نۇرجان

(الماس التايدىڭ FB الەۋمەتتىك جەلىسىندەگى جەكە پاراقشاسىنان الىندى).

0 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1562
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2256
عيبىرات

قايسار رۋحتى عازيز جان

مۇحتار قۇل-مۇحاممەد 3530