جۇما, 29 ناۋرىز 2024
تالقى 10140 0 پىكىر 6 قاراشا, 2015 ساعات 15:44

بەنەفيس شوۋ: تەك انشىلەرگە ارنالعان با؟

 بەنەفيس (bénéfice) - فرانتسۋز ءسوزى. نەگىزگى ماعىناسى- «ەلگە تانىمال بولعان، ءوزىنىڭ ايتار ويى بار تۇلعاعا ارنالعان قويىلىم». «بەنەفيس» وتكىزۋ باتىستا باستالعانىمەن، قازىر ونى باسقا ەلدەر دە كەڭىنەن پايدالانادى. مىسالى، كورشى رەسەي ەلىندە يليا يۆانحوۆتىڭ «بەنەفيس» باعدارلاماسىنا تانىمال روك-مۋزىكانت مايك نايمەنكو، كومپوزيتور ەۆگەني برونەۆيتسكي سىندى ەڭبەگى سىڭگەن تۇلعالار كەلەدى. قالاي ءان جازىپ، العاشقى كەيىپكەرلەرىن سومداعانداعى قىزىقتارى مەن قيىنشىلىقتارىن اڭگىمە ەتەدى. قوناقتىڭ بار بولمىسىن اشۋ ءۇشىن باعدارلاماعا جانكۇيەرلەرى قوڭىراۋ شالىپ، سۇراق قويادى. ودان قالا بەردى، ارىپتەستەرى كەيىپكەر جايلى ەستەلىكتەرى مەن ەرەكشەلىكتەرىن ايتادى. ونەرىنەن قىسقاشا ۇزىندىلەر كورسەتىلىپ، تالقىلانادى. ەڭ باستىسى «بەنەفيس» ساحنادا جۇرگەن ونەر يەلەرىنىڭ ايتۋلى مەرەيتويلارىنا ارنالىپ ۇيىمداستىرىلادى. كورەرمەننىڭ دە مۇنداي بەنەفيستەن الار تاعىلىمى كوپ بولادى.

ال، بىزدە شە؟ قازاق تەلەكەڭىستىگىندەگى باعدارلامالاردىڭ باستى يدەياسى كوبىنە شەت ەلدەن الىناتىنى بەلگىلى. وكىنىشكە قاراي، بارلىعى دەرلىك ءساتسىز كوشىرمە. سونداي باعدارلامالاردىڭ ءبىرى، ءبىز كورىپ جۇرگەن «حابار» ارناسىنداعى « بەنەفيس-شوۋ». العاشقى كورسەتىلىمىنەن باستاپ كورەتىنىمىز انشىلەردىڭ انشىلەردى شاقىرىپ، شۇيىركەلەسىپ وتىرعانى. تاپقان تايانعانىن ايتىپ، كىمگە نە سىيلىق بەرىپ، كىمنەن نە العانىن ءسوز قىلادى. تورگە كەلىپ جايعاسىپ، فونوگراممامەن اندەرىن بىرىنەن سوڭ ءبىرىن ايتىپ كەتەدى. سوندا اتالعان باعدارلامانىڭ پروديۋسەرلەرى «بەنەفيس» ءسوزىنىڭ ماعىناسىن بىلمەي مە؟ ولاي بولسا، ەستە ساقتاعان دۇرىس-اۋ، «بەنەفيس» تەك انشىلەرگە ارنالمايدى! حالىققا ەڭبەگى سىڭگەن، كورەرمەن ولاردان تاعىلىمدى اڭگىمەلەر كۇتەتىن تۇلعالارعا ارنالىپ، ۇيىمداستىرىلادى. ءبىزدىڭ «بەنەفيستە» جاستارى وتىزعا جەتەر جەتپەس، توي اندەرىن عانا ايتۋمەن شەكتەلىپ جۇرگەن، عادىلبەك جاناي، تورەعالي تورەالى، «كەشYou» توبىنىڭ قىزدارى سىندى انشىلەر دە كەزدەسەدى. قازاق ونەرىنە ۇلەس قوسقان دا قوناقتا، «قوسايىن دەپ جۇرگەن دە»  قوناقتا. قۇددى ءبىر قازاقتى وزگە ەلگە مويىنداتقانداي كەلىپ ءبىر مارقايادى دەسەڭىزشى. انشىلەردى بىلاي دا ىشكەن تاعامى مەن قىدىرعان جەرلەرىنە دەيىن حالىق قاستارىندا جۇرگەندەي، ينستاگرام ارقىلى ءبىلىپ وتىر عوي.

«بەنەفيس شوۋدىڭ» سوڭعى كورسەتىلىمىندە سەرىك يبراگيموۆ دەگەن ءانشى كەيىپكەر بولدى. «جۇردەك پوەزد كەتتى، ساعان قولىم جەتتى» دەپ ءجۇرىپ، سىنعا دا الىندى، اندەرى دە مازاققا اينالدى. تالانتى بار شىعار، بىراق «بەنەفيسكە» وعان ءالى ەرتە سياقتى. «پويىزدىڭ سوڭىنان جۇگىرىپ، «جاياۋ» ەنتىگىپ جۇرگەن» بالادان قانداي تاعىلىمدى اڭگىمە كۇتەمىز؟  سوندا بىزدە «بەنەفيس» جاسايتىن باسقا لايىقتى ادام جوق پا؟ جاقىندا عانا 80 جاسقا تولعان، حالىققا «تاقيالى پەرىشتە» اتىمەن تانىلعان ابىلعازى رايىمبەكوۆ وسىنداي «بەنەفيس- شوۋدىڭ» كەيىپكەرى بولۋعا سۇرانىپ تۇر ەمەس پە؟ ودان باسقا دا تۇلعالار جەتەرلىك.  الدە، «حاباردىڭ» «بەنەفيسى» تەك انشىلەرگە عانا ارنالعان با؟

 نازەركە شاراپاددين

حالىقارالىق اقپاراتتىق تەحنولوگيالار ۋنيۆەرسيتەتىنىڭ

3كۋرس ستۋدەنتى

Abai.kz

0 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1576
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2272
عيبىرات

قايسار رۋحتى عازيز جان

مۇحتار قۇل-مۇحاممەد 3589