بەيسەنبى, 13 تامىز 2020
COVID-19 قازاقستاندا. جۇقتىرعاندار — 101372. جازىلعاندار — 76756. قايتىس بولعاندار — 1269
46 - ءسوز 2973 0 پىكىر 26 قاراشا, 2015 ساعات 14:05

مۋلتفيلم


باياعىدا ءبىزدىڭ رەداكتسياعا ءبىر وقۋشى حات جازىپتى. حاتىندا «گازەتتەرىڭىزدى وقيمىن، وتە جاقسى...» دەپ كەلىپتى دە، «بىراق تەلەۆيدەنيا پروگرامماسىندا مۋلتفيلم وتە از ەكەن، سونى كوبەيتسەڭىزدەر...» دەپ اياقتاپتى. وقۋشى بالا تەلەديدار اپتالىعىن گازەت جۋرناليستەرى جاسامايتىنىن قايدان ءبىلسىن؟!. كۇلگەنبىز دە قويعانبىز
شىنىندا ءبىزدىڭ بالا كەزىمىزدە تەلەديداردان مۋلتفيلم دەگەن مۇلدەم از بەرىلەتىن. ءبىر كۇندە بىرەۋ، ارى كەتسە ەكى رەت... وندا دا 10-15 ءمينوت قانا... جەكسەنبىدە جيىرما ءمينوت بەرىلۋى مۇمكىن. بولدى. تام-تۇمداپ بەرىلگەننەن كەيىن بە، بالالاردىڭ مۋلتفيلمگە دەگەن قۇمارلىعى دا ەرەكشە ەدى. ول كەزدە اۋىلدا ءۇي سايىن تەلەۆيزور دا جوق. تەلەۆيزوردىڭ قاسىنداعى دۋالعا اپتالىق پروگراممانى كنوپكامەن جابىستىرىپ قويعانبىز. قاپتاعان باعدارلامالاردىڭ اراسىنان جىلت-جىلت ەتكەن 5 مينوتتىك ءمۋلتفيلمدى ىزدەپ ءجۇرىپ تاۋىپ الىپ، سونى زارىعا كۇتەمىز.
مۇلدەم بالا كەزىمىزدە اعالارىمىز الدايدى ەكەن. پروگراممادان ءمۋلتفيلمنىڭ قاي ۋاقىتتا بولاتىنىن الدىن-الا كورىپ الادى. ۇيدە ىستەن شىققان اق تەلەفون اپپاراتى بولاتىن. سونىڭ تۇتقاسىن كوتەرىپ ءبىر جاققا زۆاندايدى:
«اللو، بۇل تەلەۆيدەنيە مە؟ ءبىزدىڭ ۇيگە بالالار جينالىپ قالىپ ەدى... ءبىر مۋلتفيلم قويىپ جىبەرىڭىزدەرشى... اللو! جاقسى ەستىلمەي جاتىر عوي. قاي ۋاقىتتا قويامىز دەيسىز؟.. ا، مەيلى-مەيلى، جاقسى، كۇتەمىز» دەپ، تۇتقانى ورنىنا قويادى. بىزگە قاراپ: «بالالار، ءمۋلتفيلمدى ساعات 11-دە كورسەتەتىن بولدى. زورعا دەگەندە كوندىردىم. وعان دەيىن مال قورانى سىپىرىپ تاستاڭدار دەپ جاتىر... ايتپەسە قويماي قويۋى مۇمكىن». ءبارىمىز شۋلاپ، قوراعا قاراي جۇگىرەمىز. 
11-دەگى ءمۋلتفيلمدى كورىپ بولعاننان كەيىن اعامىز اق تەلەفوندى قايتادان الدىنا الادى. «سىزدەرگە ۇلكەن راحمەت. بالالار مۋلتفيلمدەرىڭىزدى كوردى. تاعى دا كورسەتسە دەپ جاتىر ءبارى... ايتپاقشى بۇل بالالار ايتقاندى تىڭداپ، قورانى جاقسىلاپ تازالاپ تاستادى. سول ەڭبەكتەرىن ەسكەرىپ، تاعى دا بەرسەڭىزدەر... ەندى ءتۇس قايتا كورسەتەسىزدەر مە؟ ساعات تورتتە عوي، ءا؟ وي، جاقسى بولدى. ايتامىن بالالارعا... بىراق وعان دەيىن باۋدى تازالاپ تاستاۋ كەرەك پە؟ مەيلى، مەيلى، ايتامىن...» ساعات تورتكە دەيىن ءبارىمىز باۋدا شۋلاپ جۇرەمىز. 
قانشا زامان وتسە دە بالالاردىڭ مۋلتفيلمگە دەگەن ماحابباتى، ىنتىقتىعى باسىلعان جوق. قازىر بالالى ءۇيدىڭ تەلەۆيزورىن قاي ۋاقىتتا قوسىپ قالساڭ دا، جارق ەتىپ الدىڭنان "بالاپان" ارناسى شىعادى. كەي كەزدەرى كەلىنشەگىم ەكەۋىمىز ءبىر جاققا كەتىپ بارا جاتىپ بالالارعا: "تەلەۆيزوردى قويۋشى بولماڭدار، ودان دا ساباقتارىڭدى وقىڭدار" دەپ، ابدەن نىعىزداپ كەتەمىز. ءسويتىپ بىلدىرمەي تەلەۆيزوردى "حابار" ما، "قازاقستان" با، ايتەۋىر باسقا ارناعا اۋىستىرىپ، ءوشىرىپ قويامىز. كەلگەننەن كەيىن قوسىپ قالساڭ، الدىڭنان الگى ارنا ەمەس، مۋلتفيلم جارق ەتە قالادى عوي.

ورالحان ءداۋىت

Facebook-تەگى پاراقشاسىنان

0 پىكىر