شىمكەنت قالاسىنىڭ  2020 جىلعا دەيىنگى الەۋمەتتىك-ەكونوميكالىق دامۋ تۇجىرىمداماسىن دايىنداۋ بارىسىندا   ەڭ اۋەلى، الەۋمەتتىك سالانىڭ ەڭسەسىن تىكتەۋگە مەيلىنشە كوڭىل اۋدارىلعانى بەلگىلى. قالانىڭ دامۋ قۇجاتىندا قارالعان ماسەلەنى الەۋمەتتىك سالا قىزمەتكەرلەرىمەن بىرلەسە تالقىلاعان قالا اكىمىنىڭ ورىنباسارى گۇلجان قۇرمانبەكوۆا جۇمىسپەن قامتۋ جانە مەديتسينا سالاسى بويىنشا بايانداما جاسادى. تۇجىرىمدامادا كورسەتىلگەندەي، 2016-2018 جىلدارى 2350 ادام كاسىبي قايتا دايارلىقتان ءوتىپ، تۇراقتى جۇمىسقا ورنالاستىرىلاتىن بولادى. ايتا كەتەيىك، بۇگىنگى تاڭدا جۇمىسسىزداردىڭ جالپى ۇلەسى 5,3 پايىزدى قۇرايدى، ياعني، 23 مىڭنان اسىپ جىعىلادى.

دەنساۋلىق ساقتاۋ سالاسى بويىنشا بۇگىندە قالانىڭ وزەكتى ماسەلەسى رەتىندە اۋرۋحانا جانە امبۋلاتوريالىق ەمحانالارمەن قامتۋ دەڭگەيىن ايتۋعا بولادى. ياعني، بۇل ماسەلەدە شىمكەنت قالاسىنىڭ كورسەتكىشى وبلىستىق جانە رەسپۋبليكالىق دەڭگەيدەن ايتارلىقتاي تومەن بولىپ وتىر. ماسەلەنىڭ شەشىمىن تابۋ ءۇشىن، بايانداماشى تۇجىرىمداما جوباسى شەڭبەرىندە قالانىڭ 7 تۇرعىن الابىندا (قايناربۇلاق، بوزارىق، تۇران، قۇرساي، جيدەلى، بادام-1, قايتپاس-2) دارىگەرلىك امبۋلاتوريالاردىڭ قۇرىلىسىن سالۋ قاجەتتىگى ۇسىنىلعانىن اتاپ ءوتتى.

سونداي-اق، جيىندا ءبىلىم، مادەنيەت، سپورت سالاسى بويىنشا قالا اكىمىنىڭ ورىنباسارى قايرات نۇرتاي تۇجىرىمداما جوباسىنىڭ نەگىزگى باعىتتارىنا توقتالدى.

– قازىرگى تاڭدا ءبىلىم سالاسى بويىنشا ءۇش اۋىسىمدا جۇمىس ىستەيتىن مەكتەپتەر بۇگىنگى كۇننىڭ وزەكتى ماسەلەسىنە اينالىپ وتىر. قازىر قالادا ءۇش اۋىسىمدا ءبىلىم بەرەتىن 9 مەكتەپ بار. جىل سايىن قالاداعى بالا سانى 8 مىڭعا ارتىپ وتىرعانىن ەسكەرسەك، بۇل ماسەلەگە دەندەپ كوڭىل ءبولۋ قاجەتتىگى اڭعارىلادى، – دەدى قايرات ىرزاقۇلۇلى.

بۇل ورايدا، تۇجىرىمدامادا 12 مەكتەپتى قايتا قۇرۋ، 11 جاڭا مەكتەپ جانە 7 بالاباقشا قۇرىلىسىن سالۋ ۇسىنىلعان. سونداي-اق، قالا اكىمىنىڭ ورىنباسارى وقۋشىلار اراسىنداعى قۇقىقبۇزۋشىلىق كورسەتكىشىن تومەندەتۋ ماقساتىندا مەكتەپىشىلىك ەلەكتروندى باقىلاۋ ورناتۋ، مەكتەپ ديرەكتورلارىن تاعايىنداۋ كونكۋرستارىن اشىق تۇردە وتكىزۋ، بارلىق ءبىلىم بەرۋ مەكەمەلەرىندە «قامقورشىلىق كەڭەستەرىن» قۇرۋ جايى ۇسىنىلىپ وتىرعانىن اتاپ ءوتتى.

مادەنيەت سالاسىن تالداي كەلە، ق.نۇرتاي شىمكەنت قالاسى كىتاپحانالار كورسەتكىشى بويىنشا رەسپۋبليكالىق ورتاشا كورسەتكىشتەن 4,2 ەسە، مۇراجايلار كورسەتكىشىندە 2,2 ەسە تومەن ەكەندىگىن ءمالىم ەتتى. سونداي-اق، سپورت سالاسىندا اتقارىلۋى ءتيىس الداعى نەگىزگى مىندەتتەرگە توقتالدى. ياعني، مەكتەپتەردە سپورتتىق ليگالار قۇرۋ، جەكە ينۆەستورلاردى سپورت نىساندارىن سالۋعا تارتۋ، سپورتتىق فۋنكتسيونەرلەر قىزمەتىن ۇيىمداستىرۋ ماسەلەلەرى تۇجىرىمداما جوباسىندا قامتىلعان.

قالالىق ءماسليحات حاتشىسى نۇرلان بەكنازاروۆ جيىن سوڭىندا ءسوز كەزەگىن الا وتىرىپ، شىمكەنت – بۇگىندە ەل اۋماعىندا دامۋى تۇراقتى، بولاشاعى ايقىن، قارجىلىق جانە ادامي تۇرعىدان مۇمكىندىگى وتە جوعارى قالا رەتىندە مويىندالىپ وتىرعانىن ايرىقشا ماقتانىش سەزىممەن ايتتى. تۇجىرىمداما جوباسىن تالقىلاۋعا قاتىسقان قالالىق ارداگەرلەر كەڭەسىنىڭ، جاستار ۇيىمدارىنىڭ وكىلدەرى جانە الەۋمەتتىك سالا قىزمەتكەرلەرى ءوز پىكىر-ۇسىنىستارىن ورتاعا سالىپ، دامۋ قۇجاتىن قولدايتىندىقتارىن ءبىلدىردى.

ينۆەستورلار تارتۋ ءۇشiن جاڭا جوبالار جاسالادى

سونداي-اق، شىمكەنت قالاسىنىڭ 2020 جىلعا دەيىنگى الەۋمەتتىك-ەكونوميكالىق دامۋ تۇجىرىمداماسى بويىنشا جيىن م. اۋەزوۆ اتىنداعى مەملەكەتتىك ۋنيۆەرسيتەتىندە ءوتتى. وعان قالا اكىمىنىڭ ورىنباسارى نۇرالحان كوشەروۆ قاتىسىپ، جينالعانداردى الداعى 5 جىلدا تۇجىرىمداما اياسىندا بيزنەس، تۋريزم جانە اۋىلشارۋاشىلىعى سالاسىندا اتقارىلاتىن شارالاردىڭ جوسپارىمەن تانىستىردى.

– تۇجىرىمدامادا قالامىزدىڭ الەۋمەتتىك-ەكونوميكالىق جاي-كۇيىنە سالىستىرمالى تالداۋ جاسالىنىپ، نەگىزگى كورسەتكىشتەرىنىڭ دامۋ ديناميكاسى مەن وزەكتى ماسەلەلەر كورسەتىلگەن. كاسىپكەرلىك سالاسىن وركەندەتۋ ماقساتىندا اكىمشىلىك توسقاۋىلدارعا تالداۋ جۇرگىزىلىپ، كەشەندى جوسپار قابىلدانادى. جەرگىلىكتى جانە شەتەل ينۆەستورلارىن تارتۋ ءۇشىن 100 جوبا ازىرلەنەدى، - دەدى قالا اكىمىنىڭ ورىنباسارى.

ن.كوشەروۆتىڭ مالىمدەۋىنشە، كەلەر جىلى رەتسىز ساۋدا ورىندارىن جويۋ ماقساتىندا بىرقاتار جۇمىستار جۇرگىزىلەدى، كەي بازارلار قالا سىرتىنا كوشىرىلىپ، قايتا قۇرۋدان وتەدى. ءتۋريزمدى دامىتۋ ماقساتىندا قالامىزداعى تۋريستىك كومپانيالار رەسەي، قىتاي مەملەكەتتەرىمەن بىرلەسكەن زامانعا ساي ءتۇرلى باعدارلامالار ازىرلەپ، مارشرۋتتار ۇسىنادى. سونىمەن قاتار اۋەجاي، تەمىر جول ۆوكزالى مەن ويىن-ساۋىق نىساندارىن سالۋعا ينۆەستورلار تارتىلماق.

دامۋ قۇجاتىنىڭ باسىم باعىتتارى تالقىلانعان جيىندا تۇرعىن-ءۇي قۇرىلىس جيناق بانكى وقو فيليالىنىڭ ديرەكتورى قاسىمبەك مالىكوۆ، وقو كاسىپكەرلەر پالاتاسى ديرەكتورىنىڭ ورىنباسارى ماقسات قاسىمبەكوۆ، جانە باسقا دا كاسىپكەرلەر ءسوز الىپ، وي-پىكىرلەرىمەن ءبولىستى. ءوز كەزەگىندە، قالا اكىمىنىڭ ورىنباسارى كاسىپكەرلەردى العا قويعان مىندەتتەردى بىرلەسە وتىرىپ جۇزەگە اسىرۋعا شاقىردى.

Abai.kz