ميلانداعى قازاقستاندىق پاۆيلون سەكىلدى ەكسپو-2017 كورمەسى دە قوناقتاردىڭ ۇلكەن قىزىعۋشىلىعىن تۋعىزا الادى. بۇل تۋرالى «استانا ەكسپو-2017» ۇك» باسقارما توراعاسى ادىلبەك جاقسىبەكوۆ بۇكىلالەمدىك Expo Milano 2015 كورمەسىندەگى قازاقستان ۇلتتىق كۇنىنىڭ اشىلۋى بارىسىندا حابارلادى.

«قازاقستان پاۆيلونى Expo Milano 2015 كورمەسىنە كەلگەن قوناقتاردىڭ ۇلكەن قىزىعۋشىلىعىن تۋعىزىپ وتىر. كۇن سايىن بۇل جەرگە ەلىمىزدىڭ مادەنيەتىمەن، تاريحىمەن جاقىن تانىسقىسى كەلگەن ادامداردىڭ ۇزاق كەزەگى جينالادى. استانادا وتەتىن حالىقارالىق «ەكسپو-2017» كورمەسى دە قاتىسۋشىلاردىڭ وسىنداي ىقىلاسىنا يە بولاتىنىنا جانە قوناقتارىمىزدى قۇرمەتپەن كۇتىپ الا الاتىنىمىزعا سەنىمدىمىز» دەدى ادىلبەك جاقسىبەكوۆ قازاقستان ۇلتتىق كۇنىنىڭ اشىلۋ شاراسىندا مەملەكەت باسشىسى نۇرسۇلتان نازارباەۆقا ايتقان سوزىندە.

ەلىمىزگە ارنالعان سالتاناتتى شارا يتاليا مەن قازاقستاننىڭ مەملەكەتتىك ءانۇراندارىنىڭ ورىندالۋىمەن باستالدى. وسىدان كەيىن قازاقستان رەسپۋبليكاسىنىڭ مەملەكەتتىك تۋىن كوتەرۋ سالتاناتتى ءراسىمى ءوتتى.

سالتاناتتى شارانى ەل پرەزيدەنتى نۇرسۇلتان نازارباەۆ اشتى. كورمەگە قاتىسۋشى 147 ەلدىڭ وكىلدەرىنە قاراتا ايتقان سوزىندە مەملەكەت باسشىسى بۇكىلالەمدىك كورمەنىڭ جوعارى دەڭگەيدەگى ۇيىمداستىرۋ جۇمىستارىن اتاپ ءوتتى.

«حالىقارالىق Expo Milano2015 كورمەسىندەگى قازاقستان ۇلتتىق كۇنىنىنىڭ اشىلۋ سالتاناتىندا سىزدەردى قارسى العانىما قۋانىشتىمىن. يتاليا رەسپۋبليكاسىنىڭ باسشىلىعىنا، يتاليالىق بارلىق سەرىكتەستەرگە تاماشا ۇيىمداستىرۋ جۇمىستارى ءۇشىن العىس بىلدىرگىم كەلەدى. ۇلتتىق كۇنىمىزدىڭ اشىلۋىنا كەلگەندەرىڭىز ءۇشىن راحمەت» دەدى ن.نازارباەۆ.

ميلانداعى كورمەنى ءساتتى وتكىزۋدى تىلەگەن قر پرەزيدەنتى كەلگەن قوناقتاردى الداعى استانا ەكسپو-2017 كورمەسىنە شاقىردى.

رەسمي اشىلۋ سالتاناتىنان كەيىن «استانا ەكسپو-2017» ۇك» باسقارما توراعاسى ادىلبەك جاقسىبەكوۆ پەن بۇكىلالەمدىك «Expo Milano 2015» كورمەسىندەگى قر سەكتسياسىنىڭ باس كوميسسارى انۋاربەك مۋسين قازاقستان پرەزيدەنتى نۇرسۇلتان نازارباەۆ پەن يتاليا پرەمەر-ءمينيسترى ماتتەو رەنتسيگە ۇلتتىق پاۆيلوندى تانىستىردى. ەل باسشىلارى كورمەگە قويىلعان ەكسپوزيتسيالارمەن تانىسىپ، قۇرمەتتى قوناقتار كىتابىندا جازبالار قالدىردى.

Expo Milano 2015 كورمەسىندەگى قازاقستاننىڭ ۇلتتىق كۇنى قازاقستاندىق ەسترادا جۇلدىزدارى قاتىسقان مەرەكەلىك كونتسەرتپەن اياقتالدى.

اباي-اقپارات