بۇگىن استانادا قازاقستان مۇسىلماندارى ءدىني باسقارماسى، قر مادەنيەت جانە سپورت مينيسترلىگى ءدىن ىستەر كوميتەتى، «اسىل ارنا» يسلامي-اعارتۋشىلىق تەلەارناسى اراسىندا ءدىني-رۋحاني سالادا ءوزارا ىقپالداسىپ جۇمىس ىستەۋ تۋرالى كەلىسىمگە قول قويىلدى.

قازاقستان مۇسىلماندارى ءدىني باسقارماسىنىڭ توراعاسى، باس ءمۇفتي ەرجان قاجى مالعاجىۇلى، ءدىن ىستەرى كوميتەتىنىڭ توراعاسى عالىم شويكين، «اسىل ارنا» يسلامي-اعارتۋشىلىق تەلەارناسىنىڭ باس ديرەكتورى مۇحامەدجان تازابەك قول قويعان ءۇش جاقتى مەموراندۋم قازاقستاندا ءداستۇرلى يسلامدى، ونىڭ ىشىندە ءابۋ حانيفا ءمازھابىن، حالىققا جالپى ءدىني قاعيدالاردى دۇرىس جەتكىزۋدى كوزدەيدى.

قابىلدان كەلىسىم نەگىزىندە جوسپار بويىنشا ءدىن مەن ءداستۇردىڭ ءمانىن اشاتىن، ءتول ءمازھابىمىزدىڭ اسىل قۇندىلىقتارىن ناسيحاتتايتىن، ءدىني جانە مەملەكەتتىك مەرەكەلەردىڭ مازمۇنىن باياندايتىن ارنايى باعدارلامالار دايىندالىپ، ەفيردەن كورسەتىلمەك.

تاراپتار ءوزارا تەڭ قۇقىقتارىن باسشىلىققا الا وتىرىپ، ءوز قۇزىرى شەڭبەرىندە ءدىن سالاسىنداعى تۇراقتىلىقتى نىعايتۋ، ءدىني ەكسترەميزمدى الدىن الۋ، ەلىمىزدەگى ۇلتتار مەن ۇلىستاردىڭ بىرلىگىن ارتتىرۋ ماقساتىندا بىرىگىپ جۇمىس ىستەۋگە كەلىستى.

«بارشامىزدىڭ ماقساتىمىز ءبىر: حالقىمىزدىڭ يمانىن كۇشەيتۋ، ىزگىلىكتى، مەيىرىمدىلىكتى ناسيحاتتاۋ، بىرلىگىمىزدى بەكەم ەتۋ. ءبىز بىرىگۋ ارقىلى ءدىني، رۋحاني سالادا ءونىمدى، ناتيجەلى ەڭبەك ەتە الامىز»، – دەدى باس ءمۇفتي ەرجان قاجى مالعاجىۇلى.

ءدىن ىستەرى كوميتەتىنىڭ توراعاسى عالىم شويكين مەموراندۋم زايىرلى قوعامنىڭ ورتاق قۇندىلىقتارىن ناسيحاتتاۋعا سەپتىگىن تيگىزەتىنىن اتاپ ءوتتى.

«اسىل ارنا» يسلامي-اعارتۋشىلىق تەلەارناسىنىڭ باس ديرەكتورى مۇحامەدجان تازابەك ارنا ۇجىمى ورتاق يگى ىستەرگە اقپاراتتىق تۇرعىدان اتسالىسۋعا، قولداۋ كورسەتۋگە ارقاشان دايىن ەكەنىن مالىمدەدى.

قمدب ءباسپاسوز قىزمەتى

www.muftyat.kz