جۇما, 29 ناۋرىز 2024
46 - ءسوز 4257 0 پىكىر 10 شىلدە, 2015 ساعات 15:39

اكىم ابدىبەكوۆ: نازارباەۆ الدە لەنين؟

«ايتىپ وتىرعانىمىز – كەنشىلەر استاناسى اتانىپ كەتكەن الەمگە ايگىلى قاراعاندى قالاسى. ايتىپ وتىرعانىمىز – وسى قالانىڭ قاق ورتاسىنداعى نيكولاي گوگول اتىنداعى وبلىستىق امبەباپ كىتاپحانا. ايتىپ وتىرعانىمىز – وسى كىتاپحانانىڭ تۋرا جانىنداعى قالالىق ءبىلىم بولىمىنە قارايتىن بالالار مەن جەتكىنشەكتەر سارايى دەپ اتالاتىن مەملەكەتتىك قازىنالىق كاسىپورىن. ايتىپ وتىرعانىمىز – وسى سارايدىڭ تۋرا الدىنداعى كوكپەڭبەك جاسىل الاڭقايداعى لەنين مەن گوركي ەسكەرتكىشى. الەكسەي ماكسيموۆيچكە (ماكسيم گوركي دەگەنىمىز الەكسەي پەشكوۆ قوي نەگىزى) راس، ءبىر اۋىز اڭگىمەمىز جوق. قاسقايىپ قاي جەردە تۇرسا دا، ول كىسىگە جاراسادى ەندى. ال سوندا اتام زاماندا-اق ارحيۆكە اتتانىپ كەتكەن لەنين جارىقتىققا نە جورىق؟».
ۇلت.كز پورتالى جاقىندا عانا وسىلاي دەپ جازعان ەدى، جازىلعان جايدىڭ جاڭعىرىعىن قايتا شىعارىپ وتىرمىز – ويتكەنى بۇعان قاراعاندى وبلىسىنىڭ اكىمى نۇرمۇحامبەت ابدىبەكوۆ تە، كەنشىلەر استاناسىنىڭ اكىمى نۇرلان اۋباكىروۆ  تە ءالى كۇنگە دەيىن ء«ماۋ» دەگەن جوق. وبلىس اكىمدىگىنە جاپ-جاقىن جەردە قاراعاندىلىقتارعا قاسقايا قاراپ تۇرعان لەنين جارىقتىقتا ارمان جوق، ويتكەنى ءوزىنىڭ تاس مۇسىنىنە تاپ-تاياۋ جەردە ءوزىنىڭ اتىمەن اتالاتىن كوشە جانە بار. سوندا دەيمىز-اۋ، سوندا اكىمدەر ابدىبەكوۆ پەن اۋباكىروۆ وزدەرى وبلىس پەن قالا اۋماعىندا ۇرشىقتاي ءيىرىپ وتىرعان قازىرگى «نۇر وتان» پارتياسىنىڭ كوسەمى نۇرسۇلتان نازارباەۆتىڭ ەسكەركىشىن سۇيەگى باياعىدا قۋراپ قالعان لەنين جارىقتىقتىڭ ورنىنا قويامىن دەسە، بىرەۋ قويما دەپ پە؟ الدە بۇل ەكى اكىمگە ۇلت كوشباسشىسىنىڭ سارابدال ساياساتىنان گورى كوممۋنيستەر كوشباسشىسىنىڭ «داڭعىل جولى» قىمبات بولىپ وتىر ما – ءالى كۇنگە دەيىن؟

بىرەۋلەر ايتار ارينە، «قايداعى ءبىر ەسكەرتكىش ءۇشىن وبلىس اكىمىنىڭ مازاسىن العاندارىڭ دۇرىس ەمەس-اۋ!» دەپ. ال بۇعان ءبىز ايتامىز – يدەولوگيا دۇرىس بولماي، «تورتەۋ تۇگەندەلمەيدى» دەپ. اسىرەسە قاراشا قازاقتىڭ «تورتەۋى تۇگەندەلمەيدى» دەپ («التاۋ الا بولسا — اۋىزداعى كەتەدى، تورتەۋ تۇگەل بولسا – توبەدەگى كەلەدى»). قىسقاسىنان قايىرعاندا، كوممۋنيستەر يدەولوگياسىن ەگەمەن ەلىمىزدە ءالى كۇنگە دەيىن جاسقانباي جۇرگىزىپ كەلە جاتقان بۇرىنعى كوممۋنيست، قازىرگى «نۇر وتاندىق» ابدىبەكوۆ تە، جاپ-جاس «نۇر وتاندىق» اۋباكىروۆ تە «ەكى كەمەنىڭ قۇيرىعىن ۇستاعان سۋعا كەتەدى» ءتامسىلىن ءسىرا دا ونشا-مۇنشا بىلە بەرمەيتىن بولسا كەرەك. ەگەر شىنىمەن دە وسىلاي بولسا، ەسكە سالىپ قويعانىمىزدىڭ دا ونشا-مۇنشا ارتىقتىعى جوق-اۋ دەپ ويلايمىز. قانشا دەگەنمەن دە اكىم ابدىبەكوۆ ايماقتىڭ ءبىرىنشى ءنومىرلى ادامى ەمەس پە، ءتيىستى ورىندارعا «اۋ، بۇلارىڭ قالاي، لەنين نەعىپ تۇر ءالى كۇنگە دەيىن؟» دەپ ءبىر اۋىز «جىلى ءسوزىن» ارناسا، ءسوز تۇسىنگەنگە سونىڭ ءوزى دە جەتىپ جاتىر ەمەس پە؟

ءبىر ويىم ايتادى – «مۇمكىن، اكىمدىكتىڭ ءباسپاسوز قىزمەتى مەن ىشكى ساياسات سالاسىنىڭ باسشىلىعى لەنين ەسكەرتكىشى تۋرالى جاقىندا عانا جاريالانعان پورتال ماتەريالىن ابدىبەكوۆكە جەتكىزە قويماعان شىعار» دەپ. تاعى ءبىر ويىم ايتادى – «پورتال ماتەريالىن ابدىبەكوۆ الدىندا تۇرعان كومپيۋتەردەن ءوزى-اق وقي سالادى عوي، ينتەرنەت ءتىلىن بىلمەيدى دەپ پە ەدىڭ ول كىسىنى…» دەپ. قالاي بولعاندا دا، لەنين ەسكەرتكىشىن ءبىر جاقتى قىلۋ كەرەك، نۇرمۇحامبەت اعا، ايتپەسە سىزگە دەيىن بۇل ەسكەرتكىشكە بۇرىنعى اكىمدەر ابدىشەۆتىڭ دە، احمەتوۆتىڭ دە، نىعماتۋليننىڭ دە، مۇحامەتجانوۆتىڭ دا ء«تىسى باتپاي» كەتكەن بولاتىن.

 

مارات ماداليموۆ.

"ۇلت" پورتالى

 

0 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1567
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2261
عيبىرات

قايسار رۋحتى عازيز جان

مۇحتار قۇل-مۇحاممەد 3544