جۇما, 21 ماۋسىم 2024
بيلىك 5267 0 پىكىر 10 شىلدە, 2015 ساعات 17:24

ەلوردادا 310 جاڭا اۆتوبۋس حالىق يگىلىگىنە بەرىلدى

«استانا LRT» جشس جولاۋشىلار كولىگى ءبولىمى قالا تۇرعىندارى ءۇشىن قوعامدىق كولىكتەردە قاتىناۋ قولايلى ءارى شاپشاڭ بولۋ ءۇشىن بىرقاتار كەشەندى شارالاردى اتقارۋدا. جاقىندا عانا ەلوردا اۆتوبۋستارى تەگiن ينتەرنەتپەن قامتىلىپ، WI-FI Bus Astana جوباسىنىڭ تۇساۋى كەسiلگەنىن جازعان ەدىك. بۇگىن استانانىڭ  ىشىندە قاتىنايتىن قوعامدىق كولىكتەر قاتارى 310 جاڭا اۆتوبۋسپەن تولىقسا، تاعى 48 اۆتوبۋس قازان ايىنا دەيىن قاتارعا قوسىلماق.

–شىلدەنىڭ 11 كۇنى «Iveco citylis» ماركالى 241 اۆتوبۋستى پايدالانۋعا بەرۋدى كوزدەپ وتىرمىز. سونىڭ ىشىندە 34 اۆتوبۋس 18 مەترلىك، ال قالعانىنىڭ ۇزىندىعى 12 مەتر. بارلىق اۆتوبۋستار كونديتسيونەرلىك جانە بەينەباقىلاۋ جۇيەسىمەن قامتاماسىز ەتىلگەن، - دەدى «استانا LRT» جشس جولاۋشىلار كولىگى ءبولىمىنىڭ باسشىسى بەيبىت ەسجانوۆ.

 

ونىڭ ايتۋىنشا، 2017 جىلعا دەيىن اۆتوبۋستار تاپشىلىعىن بولدىرماس ءۇشىن، 958 اۆتوبۋس ىسكە قوسىلماق. جوسپار بويىنشا، 2015 جىلى 358 جاڭا اۆتوبۋس پايدالانۋعا بەرىلەدى. 2016 جىلى قوسىمشا 200-250 قوعامدىق كولىك الىنىپ، 2017 جىلى ەلوردانىڭ اۆتوبۋس پاركى تاعى 350 اۆتوبۋسپەن تولىعادى  دەپ جوسپارلانۋدا.

 

سونداي-اق بۇگىنگى تاڭدا قالالىق قۇزىرەتتى قۇرىلىمداردا ەلوردادا قوعامدىق كولىكتەرگە ارنالعان قوسىمشا جول جولاقتارىن جاساۋ ماسەلەسىن تالقىلاۋدا. «استانا LRT» جشس كولىك ءبولىمىنىڭ ديرەكتورى رۋستام حاليلەۆتىڭ ايتۋىنشا، بوگەنباي باتىر، ن. تىلەنديەۆ جانە ب. مومىشۇلى داڭعىلدارىندا ۇستىمىزدەگى جىلدىڭ تامىز ايىندا قوعامدىق كولىكتەرگە ارنالعان قوسىمشا جولاقتار جاسالماق. شاھاردىڭ ترانسپورت كەشەنىن مودەرنيزاتسيالاۋ ماقساتىندا جابىق تۇردەگى 55 ايالداما اشىلاتىنىن جازعانبىز.

 

ايتا كەتەرلىك تاعى ءبىر ءجايىت، ەلوردادا ەرتەڭنەن باستاپ 26 قالالىق اۆتوبۋس باعدارلارىنىڭ قوزعالىس باعىتتارى وزگەرتىلەدى. كولىك جۇيەسىن مودەرنيزاتسيالاۋدىڭ باستى ماقساتى – باعدارلار جۇيەسىن جاقسارتۋ، جولاۋشىلارعا كورسەتىلەتىن قىزمەت ساپاسىن جوعارىلاتۋ، قايتالاناتىن قوزعالىس باعدارلارىنىڭ سانىن ازايتۋ، اۆتوبۋس جۇرگىزۋشىلەرىنىڭ رەتسىز جول جۇرگىزۋىن شەكتەۋ بولىپ تابىلادى.

قازىرگى تاڭدا استانا قالاسىندا 52 باعدار تىركەلگەن، ولاردىڭ 26-سى وزگەرتىلدى. سونىڭ ىشىندە جەتەۋى ەكىگە ءبولىنىپ، بۇگىندە 14 جاڭا باعداردى قۇراپ وتىر. 

 

ء–بىز كەلەسى باعىتتارداعى جاعدايدى جاقسارتۋ ءۇشىن كەشەندى جۇمىستار اتقارۋدامىز: بىرىنشىدەن، مارشرۋتتىق جۇيەنى قايتا قۇرۋ، ەكىنشىدەن، جىلجىمالى قۇرامدى جاڭارتۋ، ۇشىنشىدەن، جۇرگىزۋشىلەر مەن كوندۋكتورلاردىڭ بىلىكتىلىگىن ارتتىرۋ، تورتىنشىدەن، جول ءجۇرۋ اقىسىن ەلەكتروندى تۇردە جۇرگىزۋ، بەسىنشىدەن، ەلەكتروندى ديسپەتچەرلىك قىزمەت، التىنشى، ەلەكتروندى اقپاراتتاندىرۋ قىزمەتى، جەتىنشى، كولىك باقىلاۋ قىزمەتى، - دەدى استانا قالاسى جولاۋشىلار كولىگى جانە اۆتوموبيل جولدارى باسقارماسىنىڭ باسشىسى ءابدىحاميت تاماباەۆ.

 

قوعامدىق كولىك قوزعالىسىنىڭ جاڭا سىزباسى جولاۋشىلارعا كورسەتىلەتىن قىزمەت ساپاسىن ارتتىرۋعا سەپتىگىن تيگىزەدى. كولىك جۇيەسىن مودەرنيزاتسيالاۋ اياسىندا اۆتوبۋستاردىڭ جىلجىمالى قۇرامى جاڭارتىلىپ، كولىك باقىلاۋ قىزمەتى ەنگىزىلەدى. باعدارلار جەلىسىن مودەرنيزاتسيالاۋدىڭ تۇجىرىمداماسى حالىقارالىق ۇيىمداردىڭ كەڭەسشىلەرىنىڭ قاتىسۋىمەن ازىرلەنگەن بولاتىن. ساراپشىلار قازىرگى باعدارلار جەلىسىن تەرەڭ زەرتتەپ، جولاۋشىلار اعىمىن بايقاپ، قوعامدىق كولىكپەن پايدالاناتىن ادامدار سانىن انىقتاپ، 35 مىڭنان استام ادام قاتىسقان اۋقىمدى الەۋمەتتىك ساۋالناما وتكىزدى.

بولجامدارعا سۇيەنسەك، جاڭا باعدارلار جەلىسى قالا تۇرعىندارىنىڭ 85 % كوڭىلىنەن شىقپاق. 

El.kz

0 پىكىر