قر اسكەري سوتتىڭ توراعاسى ساكەن ابدۋللاەۆقا سىلتەمە جاساپ، «استانادا 500 ميلليون تەڭگە اقشا جىمقىرعان وفيتسەرلەر سوتتالىپ جاتىر»، - دەپ حابارلايدى Tengrinews.kz.

ابدۋللاەۆ ءباسپاسوز ءماسليحاتى كەزىندە: "سوت پروتسەسى باستالدى (...) سوتقا كەز كەلگەن ازامات، تىلشىلەر قاتىسا الادى", - دەپ مالىمدەگەن.

قر قورعانىس مينيسترلىگى 42062 اسكەري ءبولىمىنىڭ كاپيتانى  ا. پۇسۇرمانوۆتىڭ جەتەكشىلىگىمەن ۇيىمداسقان قىلمىستىق توپقا قاتىستى مەملەكەت قاراجاتىن، ياعني 547 ميلليون 703 مىڭ 924 تەڭگەنى زاڭسىز يەمدەنگەنى ءۇشىن قىلمىستىق ءىس قوزعالدى. 

اسكەري سوتتىڭ ءباسپاسوز قىزمەتىنىڭ مالىمەتىنشە، قىلمىستىق ءىس سوتقا 2015 جىلدىڭ 13 شىلدەسىندە كەلىپ ءتۇستى، 16 شىلدەدە وندىرىستىك سوتقا قابىلداندى. قازىر قاماۋداعى التى كۇدىكتىنى جامبىلدان استاناعا اكەلۋ جۇمىستارى جۇرگىزىلىپ جاتىر.

مالىمەتتە قىلمىستىق ءىستىڭ كولەمى 66 تومنان تۇراتىنى حابارلانعان. جابىرلەنۋشى تاراپ قر قورعانىس مينيسترلىگى، ءىس بويىنشا 21 ادام كۋاگەر بولادى، سەگىز ادام كۇدىكتى رەتىندە تانىلدى. كۇدىكتىلەر قورعانىس مينيسترلىگىنىڭ اسكەري قىزمەتكەرلەرى، ودلاردىڭ جەتەۋى وفيتسەرلەر، بىرەۋى كەلىسىمشارتپەن جۇمىس ىستەپ جاتقان قىزمەتكەر.

ءىس ماتەريالدارى بويىنشا، جامبىل وبلىسىنىڭ لۋگوۆوە ستانتسياسىنداعى 42062 اسكەري ءبولىمىنىڭ كاپيتانى ا. پۇسۇرمانوۆتىڭ باسشىلىعىمەن ۇيىمداسقان توپ 2008 جىلدىڭ 1 قاڭتارىنان 2014 جىلدىڭ 21 تامىزىنا دەيىن 547 ميلليون 703 مىڭ 924 تەڭگەنى زاڭسىز جولمەن اسكەري قىزمەتكەرلەر مەن باسقا دا ادامداردىڭ شوتتارىنا اۋدارىپ وتىرعان، سونىمەن قاتار 53 ميلليون 950 مىڭ 949 تەڭگەنى زەينەتاقى شوتتارىنا اۋدارعان.

اباي-اقپارات