دۇيسەنبى, 6 شىلدە 2020
COVID-19 قازاقستاندا. جۇقتىرعاندار — 41065. جازىلعاندار — 13614. قايتىس بولعاندار — 188
قوعام 3474 0 پىكىر 27 شىلدە, 2015 ساعات 12:53

قورعانىس مينيسترلىگىندە «مارودەردى» قولداپ وتىرعان كىم؟

يمانعالي تاسماعامبەتوۆكە دەيىن قورعانىس مينيسترلىگىنىڭ «قوقىسقا» اينالاعانى تۋرالى ايتىلىپ تا، جازىلىپ تا كەلدى. قاجەتسىز، ساپاسىز قارۋلار مەن اسكەري تەحنيكالاردىڭ قارا بازارىنا ۇقساي باستاعان سالانىڭ داۋى بۇگىنگى شىعىس قازاقستان وبلىسىندا اكىم بولىپ جۇرگەن دانيال احمەتوۆ پەن ءماجىلىس دەپۋتاتى باقىتجان ەرتاەۆتاردىڭ ەسىمىمەن بايلانىستا وربىگەنىن ەل ءىشى ۇمىتا قويماسا كەرەك. اباقتىنىڭ اۋزىنان قايتقان ەرتاەۆ سولتۇستىك كورەياعا ۇشاقزىمىراندار ساتقان توپتىڭ شىرماۋىنان ارەڭ شىقسا، ەكس-قورعانىس ءمينيسترى احمەتوۆ يزرايلدەن تورعاي اتا المايتىن زەڭبىرەكتەردى توپتاپ اكەلىپ، قۇلاق بىتكەندى شۋلاتقان ەدى. اتالعان سالاداعى ساۋدا-ساتتىقتىڭ سونداي ۇساق-تۇيەك ءتۇرى ءالى تيىلماي تۇرعانعا ۇقسايدى. Ratel.kz سايتىنىڭ جازۋىنا سەنسەك، ەندى وڭتۇستىكافريكالىق  Paramount Group كورپاراتسياسى شىعاراتىن Marauder («مارودەر» دەپ وقي بەرسەڭىز دە بولادى) برونوماشيناسىنا قاتىستى اڭگىمە تۋدا.

جالپى، Marauder-ءدىڭ مىقتى ماشينا ەكەندىگى جارنامالىق جەلىلەردە جەلبىرەپ-اق تۇر، ول تۋرالى، ءتىپتى، حالاقارالىق تەلەارانالاردا دا ارنايى حابارلار از ەمەس كورىنەدى. الايدا، اتى دارداي، ماقتاۋى كەرەمەت Marauder قر قورعانىس سالاسىنداعى كەزەكتى اسكەري سىناق-جاتتىعۋ كەزىندە توبىق باتپايتىن باتپاقتى كەشىپ وتە الماپتى. بويى بيىك، سالماعى اۋىر ماشينانى سۇيرەپ شىعارۋ قيىنعا تۇسكەن سوڭ امالسىز شىنجىر تابان تانكتى «جالداۋعا» تۋرا كەلگەن.

ماقتاۋلى Marauder وسىلايشا ماسقارا بولعانىمەن قويماي، قورعانىس قاباتى 90 ميلليمەترلىك اينەگى كادىمگى كالاشنيكوۆ اۆتوماتىنان اتىلعان ءۇش وقتان سوڭ شىتىناپ سالا بەرگەن.

قۇنى جارتى ميلليون دوللاردان اساتىن بۇل ماشينانى، تەگىندە، قالتاسى قالىڭ اعايىننىڭ كەز كەلگەنى ساتىپ الا بەرەتىن سياقتى: ءوزى وڭكيىپ ينكاساتورلار مىنەتىن كولىككە ۇقسايدى. بىلايعى جۇرتقا ايبار كورسەتىپ، ماقتانۋ ءۇشىن اياق ارتپاساڭىز – اربيعان نەمەمەن جاۋعا شابۋ تىم قيىن كورىنەدى. ويتكەنى، بويى تىم بيىك. ال، كولەمى كولدەي تەحنيكا قارسى جاقتىڭ كوزىنە مەنمۇندالاپ بىردەن شالىنادى. بىراق، سوندا دا وسى «مارودەردى» بيلىككە ىقپالدى ءبىر كىسى قازاقستانعا سۇيرەپ اكەلىپ، ونىڭ «سۇيەك-ساياعىن» قۇراستىراتىن زاۋىت سالىپ، "مارودەرگە" "ارلان" دەپ ات قويماقشى ەكەن. ول كىم؟ قىسقاسى، قورعانىس سالاسىندا «مارودەردى» قولداپ وتىرعان قانداي كۇش؟ ازىرگە بۇل سۇراقتىڭ جاۋابى بەلگىسىزىدەۋ.

ايتسە دە، Ratel.kz سايتى وڭتۇستىك افريكا ەلىمەن الگى برونوماشينانى ساتىپ الۋدىڭ باسى-قاسىندا جاياۋ اسكەرلەر ارمياسىنىڭ باس قولباسشىسى، گەنەرال-لەيتەنانت مۇرات مايەكەەۆتىڭ (سۋرەتتە) جۇرگەندىگىن جازادى.  سەبەبى، مايەكەەۆ قورعانىس ءمينيسترى يمانعالي تاسماعامبەتوۆتىڭ 21 قاڭتارداعى (2015 جىل) № 30 بۇيرىعىن ەلەمەي، 24 كۇن سىناقتان ءوتۋى ءتيىس  «مارودەردى» بار-جوعى 9-اق كۇن اسكەري جاتتىعۋعا جىبەرگەن. نەگە؟ نەگە «مارودەر» وزگە اسكەري تەحنيكالار سياقتى سىناقتار مەن جاتتىعۋلارعا تولىق قاتىسپايدى؟!. جامان ايتپاي جاقسى جوق، ەرتەڭ ەل باسىنا كۇن تۋا قالسا، جانى اياۋلى «مارودەر» قايتپەك؟ توعىز كۇننەن سوڭ توڭقايىپ قالماق پا، الدە... گەنەرالدارىن تيەپ الىپ ەلدەن تايىپ تۇرماق پا؟

Abai.kz     

0 پىكىر