جۇما, 10 شىلدە 2020
COVID-19 قازاقستاندا. جۇقتىرعاندار — 53021. جازىلعاندار — 31277. قايتىس بولعاندار — 264
46 - ءسوز 3420 0 پىكىر 30 شىلدە, 2015 ساعات 18:26

قازاق جۋرناليستەرى، قاشانعى بۇلاي جۇرە بەرەمىز...

قازاق جۋرناليستەرى، قاشانعى بۇلاي جۇرە بەرەمىز... اۋدارماشى بولىپ؟! التى جىل ءومىرىمىزدى وسى شەرتيگەن شەنەۋنىكتەردىڭ ورىسشا وتتاۋبايلارىن اۋدارۋ ءۇشىن قيىپ پا ەدىك؟! (كاسىبي اۋدارماشىلارعا قاتىستى ارام ويىم جوق، بۇل مۇلدە باسقا اۋدارما). 
قاي جينالىسقا بارساق تا، قانداي شاراعا قاتىسساق تا، بارلىعى "رەسمي" تىلدە بۇلبۇلداي سايرايدى. وسى ايتقاندارىڭىزدى مەملەكەتتىك تىلدە ايتىپ بەرىڭىزشى، دەپ جالىنعانداي بولىپ، سۇراپ الامىز. ونىڭ ءوزىن جارىتپايدى. ىڭىرانىپ-ىرسىلداپ، ودان قالسا قورسىلداپ، ءبىردىڭ باسىن، ەكىنىڭ اياعىن شاتيدى. ءبارىبىر ودان ەشتەڭە شىعارا المايمىز. اينالىپ كەلگەندە، باياعى سول ورىسشا وتتاۋبايلارىن اۋدارۋعا تۋرا كەلەدى. 
وۋ، اعايىن، سوندا مەملەكەتتىك تاپسىرىس دەگەن نارسە قازاق ءتىلدى جۋرناليستەردىڭ عانا باس قاتىرۋى ءتيىس ماسەلە مە؟! مەملەكەتتىك ساياساتتى مەملەكەتتىك تىلدە ءتۇسىندىرۋ مەملەكەتتىك قىزمەتشىلەردىڭ تىكەلەي مىندەتى ەمەس پە؟! مىندەتى عانا ەمەس، مۇددەسى بولۋى ءتيىس قوي! ەندەشە ءبىز نەگە ەسەك سياقتى ولاردىڭ ايتقانىنا كونىپ، ايداعانىنا جۇرە بەرۋىمىز كەرەك؟ باياعىدا ءبىر ۇكىمەت وتىرىسى قازاقشا وتكەندە، ورىس ءتىلدى جۋرناليستەر ورە تۇرەگەلدى ەمەس پە؟ ولار دىم تۇسىنبەي قالعاندىقتان ەمەس، ەشكىمگە ەسەسىن جىبەرمەيتىندىكتەن سولاي ىستەدى. ال ءبىز بولساق، شەنەۋنىكتىڭ شالا-پۇلا ءبىر-ەكى اۋىز قازاقشا شۇلدىرلەگىن جازىپ العانعا ءماز بولىپ جۇرە بەرەمىز... 
جارايدى، جاعدايدى تۇزەۋ ءۇشىن نە ىستەۋ كەرەك؟ ايتۋ - وڭاي، ارينە. مىنا جاقتا ءوز باستىعىڭ بار جوعارى جاققا جالتاقتاعان. ول جاقتا تاعى بىرەۋ بار ءوزىنىڭ ۇستىندەگىگە لاببايلاعان. وسىلايشا كەتە بەرەدى... 
ءبىز دە ولارعا جالتاقتاپ قاشانعى جۇرەمىز؟! قىرىق كۇن بۋرا بولعانشا، ءبىر كۇن اتان بولايىق تا! ءبىز دە ەشكىمگە ەسەمىزدى جىبەرمەيىك!!! وسىدان بىلاي شەنەۋنىكتەردىڭ قازاقشا ايتقاندارىن عانا ناسيحاتتاپ، ورىسشا ايتقاندارىن ءورىستىلدى ارىپتەستەرىمىزگە قالدىرايىق (ولار دا سولاي ىستەيدى). سول كەزدە مەملەكەتتىك تاپسىرىستىڭ مەملەكەتتىك تىلدەگى نۇسقاسى اقساي باستايدى. سول كەزدە ولار قازاق ءتىلدى جۋرناليستەردىڭ قادىرىن تۇسىنە باستايدى. سول كەزدە ولار "قىسىلعاندا قىمىز شىعادىنىڭ" كەبىن كيەدى. تەك سول كەزدە عانا مەملەكەتتىك ءتىلدى مەنسىنبەي جۇرگەندەر جىلى ورىندارىنان ايىرىلىپ قالماۋ ءۇشىن ءتىل سىندىرا باستايدى. ايتپەسە، ءوز انا ءتىلىن ۇيرەنۋگە ميى جەتپەيتىن "باشكاۆيتىي" شەنەۋنىكتەرگە مەملەكەتتىك ءتىلدى ۇيرەتەتىن باسقا جول قالمادى.

ءابۋ-اسقار مەكەشۇلى

ادەبيەت پورتالى

0 پىكىر