بەيسەنبى, 28 ناۋرىز 2024
ءبىزدىڭ شەنەۋنىك 6259 0 پىكىر 10 تامىز, 2015 ساعات 08:02

ەسىموۆ الماتى اكىمدىگىنەن كەتتى

ەلباسى الماتىعا ساپارى اياسىندا قالالىق ءماسليحاتتىڭ سەسسياسىنا قاتىستى. سەسسيا بارىسىندا الماتى قالاسىنىڭ جاڭا اكىمى باۋىرجان بايبەكتىڭ كانديداتۋراسى دەپۋتاتتار تاراپىنان ءبىراۋىزدان قولداۋ تاپتى. مەملەكەت باسشىسى سونداي-اق قالا اكتيۆىمەن كەزدەسىپ مەگاپوليستىڭ بۇدان ءارى دامۋ باعىتتارىن ايقىندادى.

الماتىعا اكىم بولعان باۋىرجان بايبەك بۇدان بۇرىن «نۇر وتان» پارتياسى توراعاسىنىڭ ءبىرىنشى ورىنباسارى قىزمەتىن اتقاردى. باۋىرجان قىدىرعاليۇلى بايبەك 1974 جىلى 19 ناۋرىزدا الماتى قالاسىندا تۋعان. ول  «بولاشاق» باعدارلاماسى بويىنشا گەتە ينستيتۋتتىن (برەمەن قالاسى، 1995) «نەمىس ءتىلى»; «بولاشاق» باعدارلاماسى بويىنشا ليۋبەك قالاسىنداعى جوعارى مەكتەپتى (گفر، 1998) پەداگوگ; ورتالىق ازيا ۋنيۆەرسيتەتىن (2002) حالىقارالىق ەكونوميست ماماندىقتارى بويىنشا بىتىرگەن.

الماتىنىڭ جاڭا اكىمى تۋراسىندا ەلباسى: «باۋىرجان بايبەك - وسىنداي لاۋازىمعا تاعايىندالىپ وتىرعان "بولاشاق" باعدارلاماسىنىڭ ءبىرىنشى تۇلەگى. ول سىرتقى ىستەر مينيسترلىگى جۇيەسىندە، پرەزيدەنت اكىمشىلىگىندە جۇمىس ىستەدى، "نۇر وتان" پارتياسى توراعاسىنىڭ ءبىرىنشى ورىنباسارى بولدى. قاسىمدا جۇمىس ىستەي ءجۇرىپ، مەنىڭ قىزمەتىمدى كوردى، بۇكىل رەسپۋبليكامىزدى ارالادى، ماڭىزدى سايلاۋ ناۋقاندارىنا قاتىستى، ال ءبىزدى الدا پارلامەنتتىك سايلاۋ كۇتىپ تۇر، بۇل وڭاي سىناق ەمەس. ونىڭ قالا الدىندا تۇرعان مىندەتتەردى ەلدە جۇزەگە اسىرىلىپ جاتقان باعدارلامالار اياسىندا سىزدەرمەن بىرلەسىپ شەشە الاتىنىنا سەنىمدىمىن»، - دەپ اتاپ ءوتتى.

احمەتجان ەسىموۆ بولسا پرەزيدەنت جارلىعىمەن "استانا ەكسپو-2017" ۇلتتىق كومپانياسىنىڭ باسشىلىعىنا تاعايىندالدى. ەلباسى احمەتجان ەسىموۆتى «الماتى قالاسىنىڭ اكىمى لاۋازىمىندا ۇلكەن جۇمىس اتقاردى» دەپ اتاپ ءوتتى. «وسى ۋاقىت ارالىعىندا قالا ەلەۋلى ناتيجەلەرگە قول جەتكىزدى، كەلبەتى وزگەردى، بارىنشا يكەمدى ءارى جايلى بولا ءتۇستى. باسپانا قۇرىلىسى قارقىندى جۇرگىزىلىپ، جاڭادان ەكى اۋدان پايدا بولدى. ازيادا تابىستى وتكىزىلدى، قازىرگى كەزدە دۇنيەجۇزىلىك ستۋدەنتتەر ويىنىنا دايىندىق ءجۇرىپ جاتىر. الماتىدا شاعىن جانە ورتا بيزنەس ەكپىندى دامۋدا. ونىڭ ۇلەسى قالا ەكونوميكاسىندا 30 پايىزدان اسىپ، بيۋدجەت تۇسىمدەرىنىڭ ۇشتەن ەكىسىن قامتاماسىز ەتىپ وتىر. بۇل - ماڭىزدى كورسەتكىش»، - دەدى نۇرسۇلتان نازارباەۆ.

پرەزيدەنت اتاپ وتكەندەي، ەسىموۆتىڭ تاجىريبەسى قازىرگى ۋاقىتتا استانادا ەكسپو كورمەسىن ۇيىمداستىرۋ جانە وتكىزۋ ءۇشىن قاجەت. «ەكسپو-2017 - ءبىزدىڭ بولاشاعىمىز. كورمە نىساندارىنىڭ قۇرىلىسى - بۇل مىندەتتىڭ تەك ءبىر قىرى عانا. ونىڭ باسقا، الدەقايدا ماڭىزدى قىرى - مازمۇندىق تولىعۋى. ەكسپو-2017 قازاقستاننىڭ بارلىق سالادا بالاما ەنەرگەتيكانى دامىتۋ ارقىلى جاڭا تەحنولوگيالىق قۇرىلىسقا ءوتۋى ءۇشىن سەرپىن بەرۋى ءتيىس. ۇلتتىق كومپانيانىڭ باسشىلىعىنا ۇكىمەتپەن، بارلىق وڭىرلەردىڭ اكىمدىكتەرىمەن ءىس-قيمىل جاسايتىن، ينۆەستيتسيا جانە تەحنولوگيا تارتۋ ءۇشىن الەمنىڭ ونداعان ەلدەرىمەن جۇمىس ىستەيتىن تاجىريبەلى ادام كەرەك»، - دەگەن مەملەكەت باسشىسى.

احمەتجان ەسىموۆ 1950 جىلى 15 جەلتوقساندا الماتى وبلىسىندا دۇنيەگە كەلگەن.

 «اۋىل شارۋاشىلىعى ءوندىرىسىنىڭ پروتسەستەر مەحانيزاتسياسى» ماماندىعى بويىنشا 1974 جىلى قازاق اۋىلشارۋاشىلىق ينستيتۋتىنىڭ مەحانيكالىق فاكۋلتەتىن بىتىرگەن. «الەۋمەتتىك-ساياسي قاتىناستار تەورياسى» ماماندىعى بويىنشا 1991 جىلى رەسەي قوعامدىق عىلىمدار اكادەمياسىنىڭ الەۋمەتتىك-ساياسي فاكۋلتەتىن بىتىرگەن. ەكونوميكا عىلىمدارىنىڭ دوكتورى

1990 جىلدان - قازكسر مەماگروونەركاسىپ توراعاسىنىڭ ءبىرىنشى ورىنباسارى. 1992 جىلدان - الماتى وبلىستىق اكىمشىلىگىنىڭ باسشىسى. 1994 جىلدان - قر پرەمەر-ءمينيسترىنىڭ ورىنباسارى.

1996 جىلدان - قر باس حاتشىسى. 1996 جىلدان - قر پرەمەر-ءمينيسترىنىڭ ءبىرىنشى ورىنباسارى - مەملەكەتتىك قارجى سالىمدار كوميتەتىنىڭ توراعاسى. 1998 جىلدان - قر پرەزيدەنت اكىمشىلىگىنىڭ جەتەكشىسى. 1998 جىلدان - قر بەنيليۋكس مەملەكەتتەرىندەگى توتەنشە جانە وكىلەتتى ەلشىسى.

2001 جىلدان - قر اۋىل شارۋاشىلىعى ءمينيسترى. 2002 جىلدان - قر پرەمەر-ءمينيسترىنىڭ ورىنباسارى - اۋىل شارۋاشىلىعى ءمينيسترى. 2004 جىلدان - قر پرەمەر-ءمينيسترىنىڭ ورىنباسارى. 2006 جىلدىڭ قاڭتار ايىنان - قر اۋىل شارۋاشىلىعى ءمينيسترى. 2008 جىلدان بەرى - الماكتى قالاسىنىڭ اكىمى.

«نۇر وتان» حدپ قالالىق فيليالىنىڭ توراعاسى (2008 جىلدان).

«قۇرمەت بەلگىسى» (1982), «پاراسات» (2002), «وتان» (2007) وردەندەرىمەن ماراپاتتالعان.

 

Abai.kz

0 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1562
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2256
عيبىرات

قايسار رۋحتى عازيز جان

مۇحتار قۇل-مۇحاممەد 3528