جەكسەنبى, 23 ماۋسىم 2024
بيلىك 4186 0 پىكىر 25 تامىز, 2015 ساعات 10:37

«دامۋ» قورى كاسىپكەرلەردى قولداۋىن قىسقارتپايدى

 

 

تەڭگەنىڭ ەركىن ايىرباس باعامىنا كوشۋى «دامۋ» قورىنان قارىز العان كاسىپكەرلەرگە اسەر ەتپەيدى، شاعىن جانە ورتا كاسىپكەرلىكتى قولداۋ كولەمى بۇرىنعى دەڭگەيدە ساقتالادى،- دەپ مالىمدەدى ورتالىق كوممۋنيكاتسيالار قىزمەتىندەگى بريفينگتە «دامۋ» كاسىپكەرلىكتى دامىتۋ قورى» اق-نىڭ باسقارما ءتورايىمىنىڭ ورىنباسارى داۋلەت ابىلقايىروۆ. ول قارجى نارىعىنداعى وزگەرىستەرگە قاراماستان، اتالعان قوردىڭ باعدارلامالارى قالىپتى جۇمىس ىستەي بەرەتىنىن اتاپ ايتتى.

«دامۋ» قورى شاعىن جانە ورتا بيزنەسكە قولداۋ كورسەتۋ شارالارىنىڭ قارقىنىن ەشقانداي قىسقارتپايدى جانە تومەندەتپەيدى. كەرىسىنشە، ءبىزدىڭ كاسىپكەرلەرگە بەرەتىن كومەگىمىزدىڭ كولەمى ارتا تۇسەتىن بولادى. اتاپ ايتاتىنىم، تەڭگە باعامىنىڭ وزگەرىسكە ۇشىراۋى قوردان قارىز العاندارعا اسەر ەتپەيدى، ويتكەنى، «دامۋ» باعدارلامالارى بويىنشا شاعىن جانە ورتا بيزنەس سۋبەكتىلەرىن قارجىلاندىرۋ تەڭگەمەن عانا جۇزەگە اسىرىلادى. سونىمەن قاتار، نەسيەلەرگە جاردەماقشا بەرۋ كەزىندە شەتەلدىك ۆاليۋتا دا قولدانىلادى. قازىرگى كەزدە «دامۋ» قورى باعدارلاماسى ارقىلى وسىنداي 27 جوبا بويىنشا جالپى قۇنى 53 ملرد. تەڭگەگە قارىز بەرىلدى. الايدا بۇل كاسىپكەرلەر «بيزنەستىڭ جول كارتاسى 2020» بىرىڭعاي باعدارلاماسىنىڭ ءۇشىنشى باعىتى بويىنشا «ۆاليۋتالىق تاۋەكەلدەردى تومەندەتۋ» تاسىلىمەن قارجىلاندىرىلدى. اتالعان كومپانيالاردىڭ ۆاليۋتالىق تاۋەكەلدەرى الدىن-الا ساقتاندىرىلعان،- دەپ ءتۇسىندىردى داۋلەت ابىلقايىروۆ.

ونىڭ ايتۋىنشا، اتالعان قوردان قارىز العانداردىڭ اراسىندا شەتەل اقشاسىمەن بەرىلگەن نەسيەنىڭ كولەمى وتە از، ءارى كەتسە 3 پايىزدى قۇرايدى. الايدا «بيزنەستىڭ جول كارتاسى 2020» باعدارلاماسى اياسىندا پايىزدىق مولشەرلەمەگە جاردەماقشا بەرۋگە قاراستىرىلعان بيۋدجەتتىڭ كولەمى 27 ملرد. تەڭگەنى قۇرايدى. دەسەك تە 2015-2016 جىلدارعا بۇل ماقساتقا بولىنگەن قاراجات ەشقانداي قىسقارتۋعا ۇشىرامايدى. «دامۋ» كاسىپكەرلىكتى دامىتۋ قورى» اق-نىڭ باسقارما ءتورايىمىنىڭ ورىنباسارى 2015 جىلدىڭ سوڭىنا دەيىن قور مەملەكەتتىڭ قولداۋى ارقىلى جالپى قۇنى 228 ملن. دوللاردى قۇرايتىن ازيا دامۋ بانكىنىڭ ءۇشىنشى ترانشىن الۋدى جوسپارلاپ وتىرعانىن مالىمدەدى. ەڭ باستىسى، بۇل جەردە قوردىڭ بارلىق تاۋەكەلدەرى ساقتاندىرىلماق. ال شاعىن جانە ورتا كاسىپكەرلىك سۋبەكتىلەرىنە نەسيە تەك تەڭگەمەن عانا بەرىلەدى. – ازيا دامۋ بانكىنىڭ اقشاسى اياسىندا 1300 ادامعا قارىز بەرۋدى ويلاستىرىپ وتىرمىز، سونىڭ ناتيجەسىندە 3 مىڭنان استام جاڭا جۇمىس ورىندارى پايدا بولادى،- دەدى د. ابىلقايىروۆ.

سونىمەن قاتار، «دامۋ» قورىنىڭ وكىلى قازىرگى تاڭدا «بيزنەستىڭ جول كارتاسى 2020» باعدارلاماسىنىڭ قارقىندى جۇزەگە اسىرىلىپ جاتقانىن جەتكىزدى. ماسەلەن، بۇگىنگە دەيىن 5 536 كاسىپكەر قارىز الىپ، سىياقى مولشەرلەمەسى ارقىلى مەملەكەتتەن جاردەماقشا الۋ قۇرالىن پايدالانعان، ولاردىڭ العان نەسيەسىنىڭ جالپى قۇنى 1 ترلن. تەڭگەدەن اسادى. سونداي-اق، «دامۋدىڭ» كەپىلدىك بەرۋ قۇرالىنىڭ كومەگىن 1173 كاسىپكەر پايدالانىپ، 56,3 ملرد. تەڭگەگە نەسيە العان.

ءامىرلان ءالىمجان. 

0 پىكىر