جۇما, 29 ناۋرىز 2024
كوكمۇنار 5398 0 پىكىر 3 قازان, 2014 ساعات 09:31

«ەلىن اڭساعان قازاققا» ەلشىلەر ەرەكەشە ريزا بولدى

ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ جانىنان قۇرىلعان “شاڭىراق” تەاترى بيىلعى جىلى ۇلكەن ىسكە تاۋەكەل ەتىپ، قازاقستاننىڭ ەڭبەك سىڭىرگەن قايراتكەرى، بەلگىلى دراماتۋرگ جولتاي ءالماشۇلى جۇماتتىڭ «مۇڭمەن الىسقان ادام» («شەتەلدە قارتايعان قازاق») دراماسىن اعىلشىن تىلىنە اۋدارىپ، ساحنالاپ، استانا كورەرمەندەرىنە ۇسىندى. بۇل باستاماعا تىكەلەي باس-كوز بولعان ۋنيۆەرسيتەت باسشىسى ە.سىدىقوۆ قويىلىمدى ق.قۋانىشباۆ اتىنداعى دراما تەاترى ساحناسىنان كورسەتۋگە ىنتالى بولدى. 30 قىركۇيەك كۇنى كەشكىسىن تەاتر زالىندا قر پرەمەر-ءمينيسترىنىڭ ورىنباسارى گ.ابدىحالىقوۆا، مەملەكەت جانە قوعام قايراتكەرلەرى، پارلامەنت دەپۋتاتتارى، مينيسترلىكتىڭ باسشى قىزمەتكەرلەرى مەن ەلىمىزدەگى شەتەلدىك ەلشىلىك وكىلدەرى لىق تولىپ وتىردى.

سپەكتاكلدىڭ نەگىزگى يدەياسى – وتكەن عاسىردىڭ 20-30 جىلدارى قازاق توپىراعىنان كەتىپ قالعان قازاق ازاماتىنىڭ ارادا 50 جىل وتكەندە ءوز ەلىن اڭساۋى، ساعىنىشى ءسوز بولادى، مىنە سول ارقىلى تۋعان جەردى ءسۇيۋ، ونسىز كىسى ەش جەردە ۋايىمسىز-قايعىسىز تىرلىك كەشە الماسىن سەزدىرۋ. جاسى 80-نەن اسقان اسان شالدىڭ ەكى ۇلى مارات پەن ەلجان اراسىنداعى پىكىر تايتالاسى ارقىلى بۇگىنگى كۇننىڭ كوپتەگەن اششى شىندىقتارىنىڭ بەتى اشىلادى. مارات ءۇشىن بار الەم ءبىر-اق ۇعىم بولسا، ەلجان سول ۇلكەن الەمنەن ءوزىنىڭ قازاعىن ىزدەيدى. «قازاق قانداي حالىق» دەگەن ساۋالدى وزىنە-ءوزى قويا وتىرىپ، سول ويدى اۋەلەتىپ، ماقسات ەتىپ ۇستانادى. ۇلتىنىڭ ەرەكشەلىكتەرىن ارشىپ الۋدى ارمان ەتەدى.

كورەرمەن ەڭ سوڭىندا ءوز تۋعان توپىراعىنا ورالىپ، كەنەتتەن كوز جۇمعان اسان شالمەن بىرگە مۇڭايادى. كەۋدەلەرىنە اياۋشىلىق سەزىم ۇيالاپ قالادى.

تەاتر – نە جىلاتىپ، نە كۇلدىرۋى كەرەك دەگەن قاعيداعا سۇيەنسەك، بۇل شىعارما دا سول مىندەت ۇدەسىنەن شىعا ءبىلدى دەپ ويلايمىز.

سپەكتاكل سوڭىندا شەتەلدىك ەلشىلەر وكىلدەرى تۇرەگەپ تۇرىپ، ۇزاق قول سوقتى.  

ج.ءالماشۇلىنىڭ بۇل شىعارماسى بويىنشا قوستاناي، سەمەي دراما تەاترلارىندا دا ساحنالىق قويىلىمدار بولعان-دى. قوستاناي تەاترىنىڭ جاز ايىنداعى استاناعا جاساعان گاسترولدىك ساپارى كەزىندە ەلوردالىق كورەرمەندەر وتە جاقسى اسەرمەن تاراعانىن دا ءوز كوزىمىزبەن كورگەنبىز.

ال، بۇل جولعى قويىلىمنىڭ ورنى، ارينە وزگەشە.

ەرەكشە قاداپ ايتارلىعى – سپەكتاكلدى ساحنالاعان رەجيسسەر دە ۋنيۆەرسيتەت تۇلەگى، جاس دارىن جامبىل تىلەپوۆ. ول وزىنە-ءوزى سەنىمدى كورىندى. الداعى جوسپارلارى دا ۇشان-تەڭىز.

الداعى ۋاقىتتا ستۋدەنتتەردىڭ ويناۋىندا اعىلشىن تىلىندە ساحنالانعان بۇل قويىلىم رەسپۋبليكانىڭ بىرقاتار جوعارعى وقۋ ورىندارىندا كورسەتىلمەكشى. ءتىپتى الداعى جىلى شەتەلدەرگە گاسترولدىك ساپارلارمەن شىعىپ قايتۋ دا جوسپارلانىپ وتىر.

مىنە، ۇلت ونەرىن ۇلىقتاۋ دەگەن وسى بولادى.

 

سۋرەتتەردە: سپەكتاكلدەن كورىنىستەر

اينۇر نايمانباي،

مادەنيەتتانۋشى

Abai.kz

0 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1582
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2281
عيبىرات

قايسار رۋحتى عازيز جان

مۇحتار قۇل-مۇحاممەد 3616