بەيسەنبى, 11 تامىز 2022
ءسۇيىنشى! 4979 0 پىكىر 7 قازان, 2014 ساعات 11:15

ينچحون ريو-دە-جانەيروداعى جەڭىستەرىمىزگە جولاشار بولسىن

سونىمەن وڭتۇستىك كورەي ەلىنىڭ ينچحون قالاسىندا وتكەن ازيا ويىندارى اياقتالدى. قازاقستان جۇلدە كولەمى بويىنشا وسىعان دەيىنگى ازيادا ويىندارىنداعى ءوز رەكوردىن جاڭارتتى: 28 التىن، 23 كۇمىس جانە 33 قولا مەدال.

سالىستىرۋ ءۇشىن ايتا كەتەيىك، بۇعان دەيىن قازاقستان سپورتشىلارى 1994 جىلى حيروسيمادا 27 التىن، 25 كۇمىس پەن 27 قولا (بارلىعى – 74 مەدال) جۇلدە العان ەدى.

 ينچحوندا قازاق بوكسشىلارىنىڭ باعى تاعى دا 69 كگ سالماقتا ايگىلەندى. بۇلاي دەۋىمىزگە سەبەپ:  2006 جىلى  باقىت سارسەكباەۆ، 2010 جىلى – سەرىك ساپيەۆ ءدال وسى 69 كگ سالماقتا ازيا ويىندارىنىڭ جۇلدەگەرلەرى اتانعان ەدى. ەندى مىنە، دانيار ەلەۋسىنوۆ (69 كگ) ازيا ويىندارىندا قاتارىنان ەكى مارتە چەمپيوندىقتى جەڭىپ العان العاشقى قازاقستاندىق بوكسشى اتاندى.

 جەڭىل اتلەتيكادان ولگا رىپاكوۆا ء(ۇش قارعىپ سەكىرۋ) دوحا، گۋانجوۋ، ينچحونداعى ازيا ويىندارىنىڭ ۇشەۋىندە دە التىنعا قول جەتكىزدى. گرەك-ريم كۇرەسىنەن نۇرماحان تىناليەۆ تە (120 كگ) ەكى بىردەي ازيا ويىندارىنىڭ چەمپيونى اتاندى.

ازيا ويىندارىندا قازاقستاننىڭ ءبىراز سپورتشىسى بىرنەشە مەدال جەڭىپ الىپ، «ازيادانىڭ مۋلتيمەداليستەرىنىڭ» قاتارىنا ەندى. جۇزۋدەن دميتري بالاندين 50, 100, 200 مەترگە براسس ادىسىمەن ءجۇزۋ جارىستارىندا ءۇش التىن ۇتتى.

جەڭىل اتلەت ولگا سافرونوۆا ازيا ويىندارىنىڭ التىن (200 مەترگە جۇگىرۋ), كۇمىس (ەستافەتا), قولا (100 مەترگە جۇگىرۋ) مەدالدارىنىڭ يەگەرى اتاندى. كانوە قايىقپەن جارىستا ناتاليا سەرگەەۆا، ەۆگەني الەكسەەۆ، الەكسەي دەرگۋنوۆ ءبىر التىن، ءبىر كۇمىستەن يەلەندى.

دزيۋ-دودان ەلدوس سمەتوۆ جەكەلەي سىندا ازيا چەمپيونى اتانىپ، كوماندالىق جارىستا كۇمىسكە ولجا سالدى. ماكسيم راكوۆ (دزيۋ-دو) پەن ەكاتەرينا رۋدەنكو ء(جۇزۋ) ەكى كۇمىس، اپالى-ءسىڭىلى ەكاتەرينا جانە الەكساندرا نەميچتەر (سينحروندى ءجۇزۋ)  ەكى قولا يەلەندى. باقتيار يبراەۆقا دا نىسانا كوزدەۋدەن ەكى قولا بۇيىردى.

ينچحوندا قازاقستان سپورتشىلارى الەم، ازيا رەكوردتارى مەن ازيا ويىندارىنىڭ رەكوردتارىن جاڭارتتى. ماسەلەن اۋىر اتلەتيكادان 58 كيلوگرام سالماقتاعى  ءزۇلفيا چينشانلو سەرپە كوتەرىپ 132 كيلوگرامدى يگەرىپ، الەم رەكوردىن جاڭارتتى.

وسى ارادا ايتا كەتەرلىگى، ينچحوندا  الەم رەكوردى 14 رەت، ال، ازيا رەكوردى 28 دۇركىن جاڭاردى.

 XVII جازعى ازيا ويىندارىنان جۇلدەمەن ورالعان سپورتشىلارىمىزدى ەلباسى نازارباەۆ قۇتتىقتاپ بىلاي دەدى:

-          ازيا قۇرلىعىنىڭ 45 ەلىنىڭ سپورتشىلارىمەن بولعان قىزۋ باسەكەدە سىزدەر اسا تاباندىلىق، شەبەرلىك جانە جەڭىسكە دەگەن زور ەرىك-جىگەر كورسەتىپ، 84 مەدال، سونىڭ ىشىندە 28 التىن مەدال جەڭىپ الدىڭىزدار. بۇل – قازاقستاننىڭ جازعى ازيا ويىندارىنا قاتىسۋ تاريحىنداعى ەڭ ۇزدىك ناتيجە، جاڭا رەكورد.  قۇتتىقتاۋ سوڭىندا قازاقستان پرەزيدەنتى ءبىزدىڭ قۇرامانىڭ تابىسى ريو-دە-جانەيرودا وتەتىن ءحححى وليمپيادا ويىندارىنداعى بولاشاق جەڭىستەرىمىزگە جولاشار بولاتىنىن اتاپ ءوتتى.

ايتپاقشى، ينچحوندا وتكەن ازيا ويىندارىندا شەتەلدەگى جانە ءبىر ۇلتى قازاق سپورتشى كوزگە ءتۇستى. ول - قىتايداعى قازاق بالۋانى ەرلانبەك كاتەي (سۋرەتتە). ەرلان ءوزى تۇرىپ جاتقان مەملەكەتكە  قولا جۇلدەمەن قايتتى.
 
Abai.kz

0 پىكىر

ۇزدىك ماتەريالدار

الاشوردا

الاش-ارمان

بەيبىت قويشىباەۆ  1964
بىلگەنگە مارجان

حيلدا حۋكحەم جانە ۇلى قولباسشىلار

بەيسەنعازى ۇلىقبەك 1924
ادەبيەت

ءتۇس

ەرعالي باقاش 1689
انە، كوردىڭ بە؟

ارحيمەد كىمدى قورعاشتايدى؟

جايبەرگەن بولاتوۆ 2719