استانا - الەم كوز تىككەن مارتەبەسى بار باعانالى مەكەن. وسى كيەلى جەرگە جەر-جەردەن كەلگەن مەيماندار الدىمەن قالانىڭ تازالىعىنا، سوسىن ونىڭ تاريحىنا جانە ونداعى ءتۇرلى قىزمەتتىڭ ساپاسىنا ءمان بەرەرى حاق. بۇل جولى ءبىز ءوزىمىز اڭعارعان جولاۋشىلار كولىگىنە قاتىستى جۇيەسىزدىكتى سوزىمىزگە ارقاۋ ەتكەلى وتىرمىز.

جالپى، وسى كەلەڭسىزدىكتى كوزىمىزبەن كورگەن سوڭ كۇيىنىپ وتىرمىز. تىلگە قاتىستى ماسەلەنى تىم قويىرتپاقتاپ جىبەرگەن جاۋاپتى تۇلعانىڭ كىم ەكەنىن قۇزىرلى ورىندار انىقتاي جاتار. سونىمەن، استانا قالاسىندا جولاۋشىلارعا قىزمەت جاساپ جۇرگەن №50-ءشى مارشرۋتتاعى جۇرگىزۋشىنىڭ جەلكە تۇسىنا ىلىنگەن اۆتوبۋستىڭ قاي باعىتقا باراتىنىن كورسەتكەن مىنا سىزبانۇسقاعا زەر سالىڭىز:

«مەديتسينالىق ورتالىقتىڭ باسقارمالاردىڭ كلينيكو-اكتاۋدىڭ كەشەنى قر پرەزيدەنتىنىڭ قال-جاعدايلارىمەن». ۇزىن-سونار اتاۋدان قوعامدىق كولىكتىڭ قاي ايالداماعا توقتايتىنىن بىلمەي قاپالاندىق.

 ەكىنشى قوزعالاتىن ماسەلە كوندۋكتور مەن وقۋشىعا قاتىستى بولعالى تۇر. ۇلكەن ازامات پەن نەمەرە اراسىنداعى بۇل تۇسىنبەستىك جاقىن ارادا №52-ءشى مارشرۋتتا كورىنىس تاپقان بولاتىن. ەكەۋارا ءسوز تارتىسىن سول قالپىندا بەرگەندى ءجون سانادىق.

- مەن ءالى ونبەس جاسقا تولعان جوقپىن. ءسىز نەگە مەنەن بيلەتتىڭ جارتى باعاسىن المايسىز - دەدى وقۋشى كوندۋكتورعا.
- وندا مەكتەپ وقۋشىسى جانە كامەلەت جاسىنا تولماعاندىعىندى دالەلدەيتىن انىقتاما مەن قۇجاتىڭىزدى كورسەتىڭىز - دەدى كوندۋكتور.
- ءسىزدىڭ كوندۋكتور ەكەنىڭىزدى دالەلدەيتىن قۇجاتىڭىز بار ما؟ - دەدى وقۋشى.
-  جوق! - دەپ ءۇن قاتتى كوندۋكتور.
- وندا اۆتبۋس سالونىندا قانداي زاڭعا سۇيەنىپ، جولاقى الىپ ءجۇرسىز - دەدى وقۋشى.
- ...
- تىم بولماسا جەكە باسىڭىزدى كۋالاندىراتىن قۇجاتىڭىزدى كورسەتىڭىزشى - دەدى وقۋشى.
- ول قۇجاتىم دا جوق - دەدى كوندۋكتور.
- جالپى، مەن اۆتوبۋستىڭ ىشىنە ىلىنگەن حابارلامادان وقۋشىدان قۇجات سۇراۋ تالاپ ەتىلسىن دەگەن ەسكەرتپەنى اڭعارمادىم - دەدى وقۋشى.
- نەگە؟ ءىىلۋلى تۇر - دەپ كوندۋكتور  جولاۋشىلار كىرىپ-شىعاتىن ەسىكتىڭ ۇستىڭگى جاعىن نۇسقادى.
- ول جەردە جولاقىنىڭ مولشەرى مەن جۇكتى الىپ ءجۇرۋ زاڭدىلىعىنان باسقا ەشنارسە جوق . ال وقۋشىدان قۇجات سۇراۋ تالاپ ەتىلسىن دەگەن ءسوزدى كوزىم شالمادى -دەدى وقۋشى.
- ءبىزدىڭ جۇمىسىمىزدى قاداعالايتىن جاۋاپتى قىزمەتكەرلەر وقۋشىدان وقۋشى ەكەنىن دالەلدەيتىن انىقتاما سۇراۋىمىزدى تالاپ ەتىپ وتىر - دەدى وسى ورايدا كوندۋكتور.
- وسى زاڭ قاعاز جۇزىندە جازىلىپ، مەكەمە مورىمەن بەكىتىلگەن بە؟ كانە، سول قۇجاتىڭىزدى كورسەتىڭىزشى-دەدى وقۋشى.

-  ..

بۇل جەردە ماسەلە سول قوعامدىق كولىكتەگى جولاۋشىلارعا قاتىستى ەرەجەگە تىرەلىپ تۇرماعانى انىق. بار گاپ، كوندۋكتوردىڭ اتقارىپ جۇرگەن قىزمەتىنە بايلانىستى قىزمەتتىك كۋالىگىن كورسەتە الماعاندىعىندا بولىپ تۇر.

ءامىرحان الماعانبەتوۆ،

جۋرناليست.

استانا.