سەيسەنبى, 30 قاراشا 2021
ءسۇيىنشى! 4780 0 پىكىر 28 قازان, 2014 ساعات 21:31

التى ايدا ازاماتتىق الىپ، باسپانالى بولادى

شەتەلدەن كەلەتىن قانداستارىمىزدى قر ۇكىمەتى تەگىن پاتەرمەن قامتاماسىز ەتەدى. ال، ازاماتتىقتى التى ايدىڭ ىشىندە الۋعا بولادى. بۇل تۋرالى بۇگىن قر پرەزيدەنتى جانىنداعى وكق-ءنىڭ بريفينگىندە قر دەنساۋلىق ساقتاۋ جانە الەۋمەتتىك قورعاۋ مينيسترلىگىنىڭ ەڭبەك جانە ميگراتسيا كوميتەتىنىڭ توراعاسى اسلان قارجاۋباەۆ مالىمدەدى دەپ حابارلايدى BAQ.KZ ءتىلشىسى.
«وزدەرىڭىز بىلەسىزدەر، وسى ۋاقىتقا دەيىن ورالمانداردىڭ كوشىپ كەلۋ كۆوتاسى توقتاتىلعان بولاتىن. وسىعان سايكەس قارجىلاي كومەك بەرۋ دە توقتاتىلدى. ال، ازاماتتىق الۋ قۇقىعى 4 جىلعا قالدىرىلعان ەدى. كۆوتا توقتاعان 2012 جىلدان بەرگى ستاتيستيكاعا قاراساق، 2012 جىلى 39 مىڭ اعايىن كوشىپ كەلدى. 2013 جىلى 35 مىڭ اعايىن كەلدى. بيىلعى جىلدىڭ العاشقى جارتىجىلدىعىنىڭ مالىمەتتەرىنە سۇيەرسەك، 7 مىڭ قانداسىمىز كوشىپ كەلگەن»، - دەدى ا.قارجاۋباەۆ.
شەتەلدەن كوشىپ كەلگەن ەتنيكالىق قازاقتاردىڭ ستاتيستيكاسىنان حاباردار ەتكەن كوميتەت توراعاسى ولاردىڭ ازاماتتىق الۋىنا جاعداي جاسالىپ وتىرعانىن دا اتاپ ءوتتى.
«كوشىپ كەلۋ دەگەن وڭاي نارسە ەمەس. سوندىقتان ۇكىمەت تاراپىنان ولارعا كومەك كەرەك ەكەنى بەلگىلى. ۇكىمەت وسىنى ەسكەرىپ جاڭا قابىلدانعان زاڭعا وزگەرىستەر ەنگىزدى. زاڭعا سايكەس، اعايىندار قازاقستان اۋماعىنىڭ قاي وڭىرىنە كەلسە دە ءوزى تاڭدايتىن بولادى. ەلىمىزگە كەلىسىمەن «ورالمان» مارتەبەسىن الادى. تۇراقتى تۇرۋعا رۇقسات ءۇشىن تولەم قابىلەتىن راستامايتىن بولادى. تۇراقتى تۇرۋعا رۇقسات الىسىمەن ازاماتتىق الۋعا ءوتىنىش بەرە الادى. بىلاي قاراساڭىز جارتى جىلدىڭ ىشىندە قازاقستان ازاماتى اتانۋعا مۇمكىندىك بار»، - دەدى كوميتەت توراعاسى.
سونىمەن قاتار، قانداستارىمىز ءۇشىن ماتەريالدىق جاعداي دا جاسالماق. ولاردىڭ ەڭ باستى پروبلەماسى باسپانا ماسەلەسى شەشىمىن تاباتىن بولدى.
«ۇكىمەت بەلگىلەگەن مەكەندەرگە كەلگەن اعايىندارعا كوشىپ كەلۋ شىعىندارىن تولەيدى. مىندەتتى تۇردە قىزمەتتىك پاتەرمەن دە قامتاماسىز ەتىلەدى. بۇل قىزمەتتىك پاتەردى ولار 5 جىلدان سوڭ مەنشىگىنە الۋعا قۇقىلى. ەندى وسىنداي جاعدايلار جاسالىپ وتىرعاندا شەتەلدەن كەلەتىن قانداستارىمىزدىڭ سانى ارتادى دەپ ويلايمىن. شەتەلدەن كەلەتىن قازاقتار ءۇشىن قازاقستاننىڭ ەسىگى ءاردايىم اشىق. كەيبىر ازاماتتاردىڭ جاڭساق اقپارات تاراتىپ «شەتەل قازاقتارىنا قازاقستان توسقاۋىل قويدى» دەگەن سوزدەرى دۇرىس ەمەس. وسىنى ءاربىر قازاق بىلە جۇرگەنى ءجون. شەتەلدەن قازاق وسى ۋاقىتقا دەيىن كوشىپ كەلدى. الداعى ۋاقىتتا دا كوشىپ كەلە بەرەدى»، - دەدى دەنساۋلىق ساقتاۋ جانە الەۋمەتتىك قورعاۋ مينيسترلىگىنىڭ ەڭبەك جانە ميگراتسيا كوميتەتىنىڭ توراعاسى اسلان قارجاۋباەۆ.

وتكەن ء ساۋىر ايىندا دەنساۋلىق ساقتاۋ جانە الەۋمەتتىك دامۋ ءمينيسترى تامارا دۇيسەنوۆا شەتەلدەن كەلەتىن قانداستارىمىزعا بارلىق جاعدايلار جاسالاتىنىن، ولاردىڭ ازاماتتىق الۋىنا بايلانىستى قۇقىقتىق كەدەرگىلەر الىنىپ تاستالاتىنىن ايتقان بولاتىن.ال، 6 تامىزداعى ۇكىمەتتىڭ كەڭەيتىلگەن وتىرىسىندا ەلباسى نۇرسۇلتان نازارباەۆ «قانداستارىمىزعا جاعداي جاساڭدار» دەپ ءتيىستى مينيسترلىكتەرگە تاپسىرما بەرگەن ەدى. ەندىگى ماسەلە پارلامەنت دەپۋتتارىنىڭ   «كوشى-قون زاڭىنا» تەزدەتىپ وزگەرىستەر ەنگىزۋىنە تىرەلىپ تۇر.

Abai.kz 

0 پىكىر