جۇما, 29 ناۋرىز 2024
بۇ نە مازاق؟ 10106 0 پىكىر 25 قاراشا, 2014 ساعات 11:31

ابىلاي حانعا ميكروفون ۇستاتقان قازاق

«كورمەيىن دەسەم، كوزىم بار» دەپ اقىن گۇلنار سالىقباەۆا ايتقانداي، جاقىندا مىنانداي ءبىر قىزىق ديالوگتىڭ كۋاسى بولدىم: جول ءجۇرىپ جۇرگەن كوپشىلىك قاۋىم جاقسى بىلەدى، الماتىداعى ەكىنشى تەمىرجول ۆوكزالىنىڭ تۋرا الدىندا ابىلاي حاننىڭ ءزاۋلىم ەسكەرتكىشى تۇر. تاماشا ەسكەرتكىش. كەشە ءبىر جۇمىستارمەن ءدال سول ەسكەرتكىشتىڭ جانىنان اسىعا باسىپ ءوتىپ بارا جاتتىم دا، ۇيالى تەلەفونمەن اينالانى باسىنا كوتەرە بارىلداپ سويلەپ تۇرعان سىمباتتى، ءارى باستان-اياق «سوۆرەمەننىي» كيىنگەن جاپ-جاس قازاق جىگىتىنە ەرىكسىز كوز توقتاتتىم. كوز توقتاتتىم دا، الگىنىڭ الدەكىمگە ايتىپ جاتقان اڭگىمەلەرىنە ەرىكسىز قۇلاق ءتۇردىم. سونداعى ەستىگەنىم مىنانداي دا مىنانداي سوزدەر: ء«اي، قايدا ءجۇرسىڭ وسى ۋاقىتتقا دەيىن، ەكى ساعات بولدى عوي سەنى كۇتىپ تۇرعانىما؟» دەيدى. تەلەفوننىڭ ارعى باسىنداعى تانىسى: «قاي جەردە تۇرسىڭ؟» دەپ سۇراعان بولسا كەرەك، «تۇرمىن عوي ۆوكزالدىڭ الدىنداعى... باسىنا «كوۆبويسكي شلياپا» كيگەن، ءبىر قولىنا «سابليا»، ەكىنشى قولىنا ميكروفون ۇستاپ، اساۋ اتقا ءمىنىپ العان «زدوروۆىي» ءبىر «كوۆبويدىڭ» ەسكەرتكىشىنىڭ جانىندا» دەيدى تاعى دا... جانىنان ارى-بەرى ءوتىپ جاتقانداردان ەش قىسىلماستان. وسى جەردە مەن شىداماي كەتتىم دە، «اۋ، باۋىرىم، تىم بولماسا ەسكەرتكىشتىڭ جازۋىنا نازار اۋدارساڭشى، «تايعا تاڭبا باسقانداي اپ-انىق جازىلىپ تۇر عوي، «ابىلاي حان» دەپ... دەسەم، الگى قازاعىم مەن كورسەتكەن جازۋعا مويىنىن سوزا ءبىر قاراپ الدى دا، تاعى دا جاس جىگىتتەرگە ءتان ەمەس بارىلداق داۋىسىمەن: ء«يا-ءيا، كاكوي-تو ابىلاي حان دەگەننىڭ ەسكەرتكىشىنىڭ جانىندا تۇرمىن» دەپ سالدى.

ال كەرەك بولسا!

راس، كەيىنگى جاستارىمىزدىڭ اراق-شاراپ دەگەندەرىڭىزگە ونشا اۋەس بولماي، زىر جۇگىرىپ وقىپ، جۇمىس ىستەپ جۇرگەندەرىنە قاراپ، قاتتى قۋانامىن. الايدا ء«بىر قارىن مايدى، ءبىر قۇمالاق شىرىتەدى» دەگەندەي، ءزاۋلىم تۇعىرداعى  «ەسكەرتكىش-ابىلاي حاننىڭ» باسىنداعى باس كيىمىنە، ءبىر قولىنداعى اسا تاياعى مەن ءبىر قولىنداعى قىلىشىنا قاراپ، ونى امەريكاندىق كوۆبويعا تەڭەپ تۇرعان «جاڭا قازاعىما» قاراپ، قاتتى قارنىم اشتى. ۇيدە دە، تۇزدە دە... ءتىپتى اجەتحانادا وتىرسا دا قولىنان ىشىندە ينتەرنەتى بار ۇيالى تەلەفونىن تاستامايتىن قازىرگى جاستارىمىزدىڭ اراسىنان ءىشىنارا بولسا دا تاريحىمىزدان مۇلدە ماقۇرىم... الگىنىڭ ءوز سوزىمەن ايتقاندا، مۇلدە «تۋپويلارى» كەزدەسىپ تۇرادى.

جاستارىمىز قايدا بارا جاتىر ءوزى... ىشىندە ينتەرنەتى بار ۇيالى تەلەفوندارىنا ءۇڭىلىپ الىپ؟

 مارات ماداليموۆ

Abai.kz

0 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1575
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2269
عيبىرات

قايسار رۋحتى عازيز جان

مۇحتار قۇل-مۇحاممەد 3582