سارسەنبى, 28 شىلدە 2021
بيلىك 12726 0 پىكىر 19 قاڭتار, 2015 ساعات 01:00

وتانسۇيگىشتىك – قۇرمەتتى مارتەبەگە لايىق ۇستانىم

ەلباسى ن.ءا.نازارباەۆ ءوزىنىڭ «تاريح تولقىنىندا» اتتى ەڭبەگىندە: «ەگەر ءبىز مەملەكەت بولعىمىز كەلسە، ءوزىمىزدىڭ مەملەكەتتىلىگىمىزدى ۇزاق ۋاقىتقا مەڭزەپ قۇرعىمىز كەلسە، وندا حالىق رۋحانياتىنىڭ باستاۋلارىن تۇسىنگەنىمىز ءجون. وعان بارار جول حالىق دانالىعىنىڭ نەگىزىندە جاتىر»، دەگەن ەدى. ال «قازاقستان جولى – 2050: ءبىر ماقسات، ءبىر مۇددە، ءبىر بولاشاق» اتتى قازاقستان حالقىنا جولداۋىندا ەجەلگى اتا-بابالارىمىز – تۇركىلەردىڭ ماڭگىلىك ەل يدەياسىن قازاق ەلىنىڭ ۇلتتىق يدەياسى دەپ جاريالاعان بولاتىن. اتالعان يدەيا «نۇرلى جول – بولاشاققا باستار جول» جاڭا جولداۋىندا دا جاڭا قىرىنان تولىقتىرىلا ءتۇستى.

بۇل يدەيانى ۇلكەن جاۋاپكەرشىلىكپەن دەرەۋ ىسكە اسىرۋدىڭ تۇپقازىعى وتانداستارىمىزدىڭ بويىنداعى ادامگەرشىلىك، تۋعان ەلگە سۇيىسپەنشىلىگى دەسەك، وبەكتيۆتى تۇجىرىم بولار دەپ ويلايمىن.

قاي زاماندا دا ءار ادامنىڭ ساناسىنداعى اسا مازمۇندى جانە قۇرمەتتى مارتەبەگە يە ۇستانىم – ول وتانسۇيگىشتىك (پاتريوتتىق) سەزىم ء(ىس-ارەكەت) بولىپ كەلگەنى اقيقات. بۇل تۋرالى الەمدىك جانە ءتول تاريحىمىزدىڭ ءار بەتىنەن نەگىزدى دەرەك تابىلادى. ەلىمىزدىڭ تاۋەلسىزدىگىنىڭ العاشقى كۇنىنەن باستاپ ەلباسى وسى ماسەلەنى تۇراقتى كوتەرىپ كەلەدى. ال پاتريوت بولۋ دەگەن ەل ازاماتىنىڭ ادامگەرشىلىك جانە ساياسي قاعيداتى، تۋعان جەرگە، ەلگە سۇيىسپەنشىلىگى، قاجەت بولسا، مەملەكەتتىك مىندەتكەرلىكتى جەكە مۇددەدەن جوعارى قويۋدى تالاپ ەتەتىن الەۋمەتتىك سەزىمى رەتىندە تانىلعان. تۋعان ەلىنىڭ قۇندىلىقتارىن، اسىرەسە، ءتىلى مەن مادەنيەتىن ءاردايىم قۇرمەتپەن جوعارى ۇستاپ، ول قۇندىلىقتاردى باسقا ۇلتتار مەن ۇلىستارعا، مەملەكەتتەرگە تاراتۋ دا وتانسۇيگىشتىكتىڭ بەلگىسى. وتانسۇيگىشتىكتىڭ تاريحي نەگىزىن عاسىرلار بويى جيناقتالعان ادامي تاجىريبە سونىڭ ىشىندە ۇلت، ۇلىس، جالپى ەتنوستىڭ ارتىقشىلىقتارى قالايتىنىن، قاجەت بولسا، جانىن سالىپ وتاندى قورعاۋ ەكەنىن كونە تاريح دالەلدەۋدە.

پاتريوتتىق ۇستانىم ول جەكە تۇلعانىڭ وتانىنا، ازاماتتىلىعىنا، مادەنيەتى مەن تىلىنە، ۇلتتىق داستۇرىنە ەموتسيالىق كۇيزەلىسىنىڭ ايرىقشا ءتۇرى دەپ انىقتاۋعا تولىق كەلەدى. الەمدىك تاجىريبە مەن بۇل ورايداعى تەوريالىق تۇجىرىمدار اياسىندا پاتريوتتىق سەزىم ەتنوس پەن ۇلتتىق مەملەكەتتىڭ قالىپتاسۋ جاعدايىندا قوعامدىق سانانىڭ ماڭىزدى قۇرامداس بولىگىنە اينالۋى نەگىزىندە جالپىۇلتتىق تىنىستى سيپاتتايدى. الەمگە تانىلعان عىلىمي مەكتەپتەردىڭ ساياسي-زەرتتەۋشىلىك تۇجىرىمدارى بويىنشا ادامزات تاريحىندا پاتريوتتىق ۇستانىم بىرنەشە تۇرگە جىكتەلىپ سيپاتتالعان.

سولاردىڭ ءبىرىنشى قاتارىندا پوليستىك پاتريوتتىق ۇستانىم – تاريحتاعى بەلگىلى پوليستىك-قالا مەملەكەتتەرى; ەكىنشى قاتارىندا يم­پەريالىق پاتريوتتىق ۇستانىم، ياعني يم­­پەريالىق مەملەكەت پەن ونىڭ بيلىك جۇيە­سىن قولداپ-قورعاۋ;  ءۇشىنشىسى – ەتنوستىق پات­ريوت­تىق ۇستانىم نەگىزىندە ادەتتە ۇلت، ەتنوس، رۋ، اتا-تەك قۇندىلىقتارىنا ءاردايىم زور سۇيىس­پەن­شىلىكپەن قاراپ قورعاۋ; ال كەلەسىسى – مەملە­كەتتىك پاتريوتتىق ۇستانىم، ياعني مەملەكەت ساياساتىن ايرىقشا جاۋاپكەرشىلىكپەن قولداۋ; سۋسىندىق پاتريوتتىق سەزىم (ۋاقىتشا قولداۋ، كۇنكورىستىك سەزىم) – حالىق پەن مەملەكەتتى جەكە باسقا پايدالى ماقساتتا قولداۋ.

الەمدىك قۇندى قازىنالار جيناقتارىندا پاتريوت، پاتريوتتىق ۇستانىم جونىندە جان-جاقتى نەگىزدەلگەن ارنايى تۇجىرىمدى انىقتامالار جيناقتالعان. حح عاسىردا جارىق كورگەن ادەبيەت مەن عىلىمي شىعارمالاردا پاتريوتتىق تۋرالى انىقتاما نەگىزىنە لاتىندىق، گرەكتىك تۇيىندەر الىنعان. ءسوز جوق، سول جيناقتارداعى تۇجىرىم تۇيىندەردى نەگىزگە الۋ مىندەتتى، نەگە دەسەڭىز، ولار – تەڭىز بەتى تارىزدەس عاسىرلار بويعى شىعارماشىلار، زەرتتەۋشىلەر، ادامي رۋحانياتىنىڭ تۇجىرىمدارى. ول قازاقتىڭ دالاسى ىسپەتتى. بۇل دالادا كول دە بار، اسقارىنا كوز جەتپەس شىڭ دا بار. ىزعارلى دا شۋاقتى قويناۋىندا مەندەلەەۆ كەستەسىنە ەنگەن ەلەمەنتتەردىڭ باسىم كوپشىلىگى ورىن تاپقان باتىس قازاقستان ءوڭىرى، سيراعىن Cىرعا، قۇلاشىن التاي مەن اتىراۋعا سوزعان سارىارقاسى تاعى بار.

قازاقتىڭ پاتريوتتىق ۇستانىمى ارقايسىمىزعا بۇرىن-سوڭدى كورمەگەن تۇمسا تابيعاتتاي ەلەستەيدى. جاڭا ءبىر الەم، جاڭا ءبىر «اشىلماعان ارال» سياقتى تاڭعالدىرادى. بۇعان سەنبەسەڭىز، جوعارى باياندالعان پاتريوت تۇرلەرىن وي ەلەگىنەن وتكىزىپ، ءتۇيىنىن بارلاڭىز. سوناۋ بالا شاعىمىزدان قۇلاعىمىزعا قۇيىلىپ قالعان تۋعان جەرگە، وتانعا، ۇلتقا دەگەن ويىمىزعا، ءىس-قيمىلىمىزعا يىگەن سايىن، شىعارماشىلىق تابيعاتىنا ۇڭىلگەن سايىن كۇردەلى جانە اسا جاۋاپتى شىڭعا اينالا بەرەدى. شىنايى پاتريوتتىق سەزىم ارقىلى بوي الاتىن ۇستانىم حالىق جادىنداعى قۇندىلىقتارمەن دالەلدەنۋى ءتيىس. بۇل ورايدا، اياۋلى ۇلتىمىزدىڭ تاريحي يىندەرى جانە جارقىن دا باتىل تۇلعالارى باس كەيىپكەرى بولعانى ءجون. وسى ماسەلەلەر ايقىندالماي جاتسا، وتانسۇيگىشتىڭ قاباعى تۇكسيىپ، بۋىرقانىپ، جان-جاعىن وراپ نوسەرلەي جونەلەتىنى ايقىن. جاي نوسەرلەمەيدى. اششى شىندىعىن ناقتى دەرەك-دايەككە نەگىزدەپ، ماسەلەنى تەرەڭنەن تولعاپ نوسەرلەيدى. بۇل – شىنايى پاتريوتتىڭ تابيعاتىنا ءتان قاسيەت. سوندىقتان دا، ءار تۇلعا كەيدە تۋعان جەرىنىڭ تاۋلارىنداي اسقاق، بيىك، سونىمەن بىرگە، قاتۋلى كورىنەدى.

ناعىز پاتريوت ادام جايشىلىقتا دوس-جارانعا اشىق-جارقىن، ابايلاماي سويلەيتىن اڭعال مىنەزى كەڭ دالانىڭ جون ارقاسىن جىبىتەر جايما-شۋاق جازعا ۇقسايدى. شىنايى پاتريوتشىل تۇلعا ۇزاق ساپار شەگىپ ەلىنەن جىراقتاسا، اڭقاسى كەۋىپ، ساعىنىشقا تولى جۇرەكپەن تۋعان توپىراعىن يىسكەمەيىنشە ماۋقى باسىلمايتىن سياقتى بولىپ كورىنەدى. پاتريوتتىق سەزىمدى جوعارى قوياتىن ادام وي-ءورىسى مەن ءىس-ارەكەتى بويىنشا ءوزىن ۇزاققا سىلتەيتىن تارلانداي كورىنەتىن بولار دەپ ەسەپتەيمىن. سول ارقىلى ول قولدايتىنداردى باتىل شەشىمگە، ادىلەتتىڭ اق ءجىبىن اتتاماۋعا، شىعارماشىلىق ويمەن باتىل ءىس-ارەكەتكە، ايبىندى ەرلىككە جەتەلەيدى.

مۇنداي قاسيەتتەر دۇنيەگە كەلگەن كەزدەن اينالاداعى قۇبىلىستاردان سۋسىنداپ قالىپتاسۋى شارت. بالا كەزدەن قازاقتىڭ جىر-داستاندارىمەن سۋسىنداپ، دالالىق سالت-ءداستۇردىڭ سارقىتىن قانىپ ىشكەن شىعارماشىلىق الەمىندە دە وزىندىك دارالىق، كوركەمدىك ىرىلىكتى تاڭداپ ءبىلۋ ارقىلى كەلۋى مۇمكىن، ياعني وتان، ۇلتسۇيگىشتىك سيپاتتى مەڭگەرىپ، ويلاۋ جۇيەسى قالىپتاسقان ۇلتتىڭ وسەتىنىن ادامزات تاريحى انىق دالەلدەپ كەلەدى.

ءبىزدىڭ پايىمداۋىمىزشا بۇگىنگى كۇردەلى تىرشىلىكتەگى، 7 ميللياردتان استام ادام مەكەندەگەن 220-عا جۋىق مەملەكەتتەن قۇرالعان، سان-قيلى حيكايالى الەمنىڭ قانداي دا ءبىر ەتنوسى بولماسىن وتانىن، ەلىن، جەرىن سۇيمەيتىنى جوق بولار. سونىڭ ىشىندە قازاق حالقى دا جالپى شىعىس، ونىڭ ىشىندە تۇركى تىلدەس حالىقتارداي وتانىن، جەرىن، سۋىن، تابيعاتىن ءسۇيۋ قاسيەتى ىقىلىم زاماننان ولارمەن تابيعي تامىرلاس دامىپ كەلەدى. قازاقستاندىق پاتريوتيزم مەن ۇلتارالىق تاتۋلىقتىڭ وتكەن ءومىر جولى، كورگەن-بىلگەنىنەن جيناقتالعان جان-جاقتى تارازىلانعان تاجىريبەسى تاۋەلسىز قازاقستان ەلباسىنىڭ تاريحي ەڭبەكتەرىندە وبەكتيۆتى دالەلدەرمەن تۇجىرىمدالىپ كەلگەنى بارشا وتانداستارعا جانە الەمنىڭ كوپتەگەن شەتەلدەرىنە ايان.

وسى ورايدا، ن.ءا.نازارباەۆتىڭ «قازاق­ستان­نىڭ بولاشاعى – قوعامنىڭ يدەيالىق بىرلى­گىندە»، «تاريح تولقىنىندا» اتتى ەڭبەك­تەرىندە مەملەكەت، ەتنوستارعا ورتاق ءبىر ماقسات اياسىنا توپتاسۋدىڭ كەزەك كۇتتىرمەيتىن مىندەت ەكەنىن اتاپ، بۇل مىندەتتى ابىرويمەن كۇندەلىكتى ومىرگە دارىتۋدا وتباسى، ءبىلىم بەرۋ ورىندارى، ەڭبەك ۇجىمى سياقتى ءداستۇرلى ينستيتۋتتاردىڭ ماڭىزدى ءرول اتقاراتىنىن، ولاردىڭ ىقپالى اسا ءتيىمدى بولاتىنىن باسا ايتا وتىرىپ، ء«بىزدىڭ تاعى ءبىر اسا ماڭىزدى يدەولوگيالىق مىندەتتەرىمىز – قازاقستاندىق پاتريوتيزمگە تاربيەلەۋ، ءاربىر ازاماتتىڭ ءوزىن ءوزى ايقىن بيلەۋى» دەگەن ويى قوعام مۇشەلەرىنە باعدارلامالىق باعىت بولار.

قازاقستاندىق پاتريوتتىق ۇستانىمنىڭ نەگىزى، ونىڭ ماقساتى، مىندەتى، مازمۇنى، ءتۇرى، قۇرىلىمى، ءادىسى، ءتاسىلى، زاڭدىلىقتارى، قاعيداتتارى، قۇرالدارى بار. ەگەر پاتريوتتىق ءتالىم-تاربيە ارناسىندا سولاردىڭ ءبىرىنىڭ نەگىزدەرى بولماسا، ول ءجاي ءسوز بولىپ قالۋى مۇمكىن. ءوزىن ءوزى بىلمەگەن ادام وزگەنىڭ كىم ەكەنىن تۇسىنبەيدى. كەز كەلگەن مەملەكەتتىڭ ءبىلىم بەرۋ جۇيەسى سول قوعامدا ۇستانعان سايا­ساتىمەن انىقتالادى. مىسالى، قازاقستان رەسپۋبليكاسىنىڭ ازاماتتارىنا پاتريوتتىق تاربيە بەرۋدىڭ 2006-2008 جىلدارعا ارنالعان مەملەكەتتىك باعدارلاماسىندا وسى ماسەلەلەر انىق كورسەتىلگەن بولاتىن.

بۇگىنگى الەمنىڭ كۇردەلى تىنىسىندا تاعى ءبىر ماسەلەنى ەسكەرگەن ءجون. تازا بىرجاقتى ۇلتتىق تاربيە – كەيبىر ساتتە ۇلتارالىق تۇسىنبەۋشىلىككە سوقتىرۋى مۇمكىن. پوستكەڭەستىك مەملەكەتتەر قايسىبىرىندە بولىپ جاتقان قانتوگىستى جانجال، مەنىڭشە وسىنداي ساياساتتىڭ سالدارى بولسا كەرەك. اسىرەسە، پاتريوتتىق تاربيەدە بۇل ەرەكشە بىلىنەدى. ارينە، ۇلتتىق تاربيەنى بارشامىز بىرقالىپتى ءتۇسىنىپ، ونىڭ شارتتارىن بۇلجىتپاي ورىنداۋ – اسا جاۋاپتى جانە كۇردەلى ءىس. كەيبىرەۋلەر «ۇلتتىق ناقىشتار سول كۇيىندە بولسا ەكەن» دەسە، ال كەلەسىلەر «ۇلتتىق تاربيە قازىرگى ومىرمەن بايلانىستى بولسا ەكەن» دەيدى. شىندىعىندا، ەسكى جاڭامەن ۇيلەسىم تاۋىپ جاتسا، ومىرشەڭ كەلەدى. بۇگىنگى ەگەمەن قازاقستاننىڭ جاعدايىندا پاتريوتيزم، ۇلتارالىق تاتۋلىق جاڭا ماعىناعا يە بولىپ وتىر.

سەبەبى، قازاقستاندى وتانىم دەپ بىلەتىن ءاربىر ازامات تۋعان ولكەسىن ءسۇيىپ، سونىڭ ازاماتى بولۋ، ونى قورعاۋ، الەۋمەتتىك-ەكونوميكالىق، ساياسي دامۋىنا، وركەندەۋىنە ءوز ۇلەسىن قوسۋ ءداستۇرى دە بار. مۇنى، اسىرەسە، قازاق ۇلت وكىلدەرىنەن باسقا ۇلت وكىلدەرى جاقسى ۇعىنۋى ءتيىس. «قوس ازاماتتىق»، «قوس تىلدىلىك» دەگەن ۇعىمنىڭ ءوزى دە ءبىرشاما ويلارعا جەتەلەيدى. وسى ماسەلەگە بايلانىستى قازاق ازاماتتارىنا كەلەتىن بولساق، ولار قازاقستاندىق پاتريوتيزم، ۇلتارالىق تاتۋلىقتىڭ كوش باستاۋشىسى بولۋى ءتيىس. قازاقستاندىق پاتريوتيزم مەن ۇلتارالىق تاتۋلىققا تاربيەلەۋدىڭ جولدارى مەن قۇرالدارى – ول ءتۇرلى ءىس-شارالار، تاربيە ساعاتتارى، گۋمانيتارلىق پاندەردىڭ مازمۇنى. قازاق بالاسىن ۇلتجاندىلىق، وتانشىلدىق سەزىمدە تاربيەلەۋ – ءبىلىم بەرۋدىڭ مەكتەپكە دەيىنگى جۇيەسىنەن جوعارى وقۋ ورنىنا دەيىنگى بارلىق ۇيىمداردىڭ مىندەتى. ءححى عاسىردا ءوز ۇلتىن سۇيگەن، بىرلىكتە بولعان حالىق قانا تۇتاستىعىن ساقتاپ قالادى.

اتا-بابا سالتىنىڭ جەر-اناعا دەگەن ىستىق سەزىمى ءبىرىنشى كەزەكتە تۇرادى. مىنە، وسى جالپى ادامي قۇندىلىقتار جالپى تاربيە جۇيەسىنىڭ ىزگىلىكتى دە يگى باس­تاۋلارىن قۇرايدى. اينالاڭداعى ۇلتتار مەن ۇلىستاردىڭ ەشقايسىسىن الالاماي، ءبارىنىڭ دە تولىققاندى دامۋىنا ناقتى جاعدايلار تۋعىزىپ، كوپەتنوستى ەلدەگى ساياسي تۇراقتىلىقتى قامتاماسىز ەتۋ وتانسۇيگىشتىك سەزىمنىڭ تەرەڭ بويلاۋىنا مۇرىندىق بولا الادى. سوندا عانا ادامنىڭ جۇرەگىندە قازاقستاندىق پاتريوتيزم سەزىمىنىڭ، ءوز وتانىنا دەگەن پەرزەنتتىك ماقتانىش سەزىمنىڭ وركەن جايىپ تامىرلانۋىنا نەگىز نىعايادى. ياعني، ەتنوسارالىق ينتەگراتسيانىڭ بازاسى ەمەس، ادامداردىڭ ءوزىن ءوزى ازاماتتىق بيلەۋى، قازاقستان حالقىنىڭ اجىراماس بولشەگى سىڭايلى سەزىمى قالىپتاسىپ، بويلاي بەرەدى. حالىقتىڭ پاتريوتتىق سەزىمىن قالىپتاستىرۋ ءۇشىن بۇكىل ادامزات ەۆوليۋتسياسىندا سىننان ءوتىپ، ءپىسىپ-جەتىلگەن بەلگىلى العىشارتتار اتقاراتىن مىندەت تە ماڭىزدى.

كازىرگى ەلىمىزدە وتانعا سۇيىسپەنشىلىك سەزىم قوعامدىق قاتىناستاردى دەموكراتيالاندىرۋ، ادامدى ونىڭ ءومىرىن، يگىلىگىن، ادامي ار-نامىسىن، قىزمەتشىگە لايىقتى ەڭبەكاقى تولەۋ شارتتارى مەن ءومىر ساپاسىن جوعارى قۇندىلىق دەپ تانۋ نەگىزىندە، مەملەكەتتە ىلگەرىلەۋشى الەۋمەتتىك-ەكونوميكالىق ساياسات جۇرگىزۋ بارىسىندا قالىپتاستىرىلادى. جاڭارعان قازاقستاندىق ءپاتريوتيزمنىڭ مازمۇنىن قازىرگى قوعام مەن زاماناۋي وزىق مادەنيەت قۇندىلىقتارىمەن قاتار، ۇلتتىق مادەنيەتتىڭ ءداستۇرلى نىشاندارى، ونىڭ ايرىقشا رۋحانيلىق، ازاتتىق پەن ونەگەلىلىككە ۇدايى ۇمتىلۋشىلىق قۇندىلىقتارى دا قۇرايدى. تاريحىمىزدىڭ تابيعي داستۇرلەرىن ساقتاي وتىرىپ، كازىرگى زامانعى وركەنيەتتىڭ مەيلىنشە وزىق باعىتتارىن يگەرە كەلە، وتانداستار تۋعان ەلىن ەڭ الدىڭعى قاتارلى شەپتە ۇستاي الادى. بۇعان حالقىمىزدىڭ جوعالماعان، قايتا، جاڭا الەۋمەتتىك ءومىر جاعدايىندا جەتىلىپ تولىسقان وتانسۇيگىشتىك سەزىمى سەنىمدى كەپىل بولادى.

ءپاتريوتيزمدى قالىپتاستىرۋ – بۇل قوعام­نىڭ الەۋمەتتىك تاپسىرىسىنان ءنار الاتىن مەملەكەتتىك مىندەت. پاتريوتيزم ءومىردىڭ، جاعدايدىڭ، وقيعانىڭ بارلىق جەكەلەگەن قىرلارى، حالىق پەن ەلدىڭ تۇتاستىعى، بىرەگەيلىگىمەن تىكەلەي بايلانىستىرا قاراس­تىرىلاتىن قوعامدىق قاتىناستاردىڭ ءمانى مەن قۇندىلىقتارىن زەردەلەۋ ءتاسىلى ەكەنى دە ايان. وتانسۇيگىشتىك سەزىمدى تاربيەلەۋ ازاماتتىڭ، ەلدىڭ مادەنيەتىنىڭ بىرەگەيلىگى، الەۋمەتتىڭ، حالىقتىڭ مىنەز-قۇلقىنىڭ تولىمدى كورىنىسى مەن قوعامدىق ءومىردى ۇيىمداستىرۋدىڭ ءمانى مەن ماقساتتارىن پايىمداۋ ارقىلى جۇيەلى ىسكە اسادى. پاتريوتيزم مىندەتتى تۇردە تۇلعانىڭ جوعارى الەۋمەتتىك بەلسەندىلىگىن دىتتەيدى، ويتكەنى، ونىڭ ءوزى ەڭبەكتە تابىستارعا جەتۋ ءۇشىن، ەل-جۇرتقا، حالىققا قىزمەت ەتۋ ءۇشىن بيىك سەرپىن بولىپ تابىلادى.

ءار وتانداس قازاقستان تاۋەلسىز مەملەكەت بولىپ جاريالانعاننان كەيىنگى ۋاقىتتىڭ ىشىندە پاتريوتتىق باعىتتاعى سان-قيلى مەملەكەتتىك، عىلىمي جانە بۇقارالىق سۇبەلى شارالار ورىندالىپ كەلە جاتقانىنىڭ كۋاسى دەسەك، ارتىق بولماس. كەزىندە تۇركى جۇرتى قاعاندارى «تۇندە ۇيىقتاماي، كۇندىز وتىرماي، قارا تەرىن توگىپ، قىزىل قانىن اعىزىپ»، «ماڭگىلىك ەلدىڭ» ىرگەسىن قالاپ كەتسە، ءدال وسىنى جاڭا داۋىردە ەلباسىمىز ن.ءا.نازارباەۆ ءححى عاسىرداعى «ماڭگىلىك ەل» يدەياسى تۇرعىسىندا، ءىس جۇزىندە تاريحي ساباقتاستىقتا جالعاستىرىپ وتىرعانىن ەرەكشە اتاپ كورسەتكەن ءجون. ەلباسىنىڭ جولداۋىنداعى ماڭگىلىك ەل ۇعىمىن ۇلتىمىزدىڭ ۇلى باعدارى – «قازاقستان-2050» ستراتەگياسىنىڭ ءتۇپ قازىعى دەيتىن بولساق، اقيقاتتان الىس كەتپەسپىز.

نۇرتازا ابدوللاەۆ،

ق.جۇبانوۆ اتىنداعى اقتوبە وڭىرلىك مەملەكەتتىك ۋنيۆەرسيتەتىنىڭ كافەدرا مەڭگەرۋشىسى، تاريح عىلىمدارىنىڭ دوكتورى. 

اقتوبە وبلىسى.

(دەرەككوز: http://egemen.kz/2015/01/10/46846)

 

اباي.kz

0 پىكىر