جۇما, 1 ناۋرىز 2024
قوعام 7581 0 پىكىر 21 مامىر, 2014 ساعات 12:23

اعايىنعا «ورال» دەي مە، «جوعال» دەي مە؟

كەشە عانا پارلامەنتتە ءماجىلىستىڭ الەۋمەتتىك جانە مادەني دامۋ كوميتەتىنىڭ وتىرىسى ءوتتى. ەكونوميكا جانە بيۋدجەتتى جوسپارلاۋ ۆيتسە-ءمينيسترى ءمادينا ابىلقاسىموۆا «ورالمانداردىڭ 70 پايىزىندا جوعارى ءبىلىم جوق»، «تاۋەلسىزىكتەن بەرى ورالعانداردىڭ سانى ءبىر ميلليونعا جەتكەن جوق»  دەپ «سۇيىنشىلەگەندەي» بولدى. وسىعان وراي ءماجىلىس دەپۋتاتى باقىتبەك سماعۇلدىڭ پىكىرىن بىلگەن ەدىك.

–  مىنبەردەن سويلەگەن ۆيتسە-مينيسترلەردىڭ بىردە بىرەۋى  قازاقشا سويلەگەن جوق. ادامدا ءبىر جان جىلۋى، جۇرەك جىلۋى بولۋى كەرەك ەمەس پە؟ مەن قازاق كوشى، ورالمان ماسەلەسى تۋرالى سويلەگەن ۆيتسە-مينيسترلەردىڭ بىرەۋىنەن دە ونداي جىلۋلىقتى كورە العان جوقپىن.  ەسەسىنە ورالماندارعا «وتانىڭا ورال» دەپ ەمەس، «اتامەكەنىڭنەن ارى جوعال» دەپ تۇرعانداي سەزىلدى. اناسىنىڭ اق ءسۇتىن ەمگەن ۇرپاقتىڭ مەملەكەتتىك ءتىلدى اياق استى ەتۋگە قانداي قاقىسى بار؟! وزگە تىلدە سويلەپ، جات پيعىل تانىتسا، قاي قازاقتى وتانعا كوشىرىپ اكەلە قويماقشى. مەملەكەت تاعدىرى تالقىعا ءتۇسىپ جاتقان وسىنداي ساتتە شەنەۋنىكتەر سامارقاۋلىق تانىتىپ وتىرعان سىڭايلى.

وزدەرىڭىز بىلەسىزدەر،  رف پرەزيدەنتى پۋتين قىرىمدىقتاعا ءبىر-اق كۇندە ورىس ازاماتتىعىن بەرە سالدى. ءبىزدىڭ زاڭىمىز بىلاي ەدى، كىمسىڭ، قايدانسىڭ، نە ىستەگەنسىڭ دەگەن جوق. ەل تاعدىرى تالقىعا تۇسكەن قازىرگىدەي ۋاقىتتا بىزگە دە ءدال وسىنداي شەشىم قابىلداۋ قاجەت. مەملەكەت تۇتاستىعىن، مەملەكەت مۇددەسىن ويلاساق، سونداي قادام جاساۋ كەرەكپىز. ول قىتايدان كەلە مە، موڭعوليادان كەلە مە؟ قازاق بولسا بولدى. انا قۇجاتتى، مىنا قۇجاتتى تالاپ ەتىپ وتىراتىن ۋاقىت ەمەس بۇل.

كەزىندە «موڭعوليادان كەلگەن قازاقتاردىڭ 98 پايىزى ءبىلىمسىز» دەپ ايدى اسپاننان شىعارعان قابىلسايات ابىشەۆتىڭ «وتىرىگى» دە ۇزاققا بارعان جوق.  وعان دا ءوز پىكىرىمىزدى ايتقانبىز.

اسىلى، كوشى-قون ماسەلەسى پارلامەنتتە تالقىلانعان ساتتە ورالمان ۇيىمدارىنىڭ وكىلدەرى، جاستار پارلامەنتتە وتىرۋى كەرەك ەدى. تالقىعا قاتىسۋى كەرەك ەدى. بىراق كەشەگى وتىرىستا ولاردىڭ بىردە-ءبىرى بولعان جوق.

ايتا كەتەتىن ءبىر ماسەلە، جاقىندا موڭعوليا قازاق جاستارى قوعامىنىڭ توراعاسى جانبولات دەگەن جىگىت كەلدى. بەكەر كەلگەن جوق. ەلى مەن جەرىنىڭ جاعدايىن ايتتى. ءبىز سولارمەن تىعىز قارىم-قاتىناستا جۇمىس جاساۋ كەرەكپىز. قىتايدا بولىپ جاتقان جاعدايلاردى كۇندەلىكتى ەستىپ-ءبىلىپ وتىرمىز. ەكونوميكالىق قارىم-قاتىناسىمىز وتە جوعارى دەڭگەيدە دامي باستاعان قازىرگى كەزەڭدە قىتايداعى اعايىنداردىڭ دا كوشىنە ەشقانداي توسقاۋىل بولماۋى ءتيىس.

Abai.kz

0 پىكىر

ۇزدىك ماتەريالدار