Strategypage.com سايتىندا جازىلعان ساراپتامادا  قازاقستان قارۋلى كۇشتەرىنىڭ كوەففيتسەنتى 100 پايىزدىق جۇيە بويىنشا توعىز پايىز دەپ باعالاندى. ون بالدىق جۇيە بويىنشا قازاقستان اسكەري داستۇرلەرى «ەكى»، ال باسقارۋ ساپاسى «بەس» دەگەن باعا العان.
بۇل تۋرالى «ازاتتىق راديوسى» جازدى. بيىل قازاقستان بيۋدجەتىنەن قورعانىس سالاسىنا ەكى ميللياردقا جۋىق دوللار ءبولۋ قاراستىرىلعان ەدى. قازاقستان قارجى مينيسترلىگى دەرەكتەرى بويىنشا، 2014 جىلعا ارنالعان رەسپۋبليكالىق بيۋدجەتتە قورعانىس سالاسىنا 362 ميلليارد 700 ميلليون تەڭگە ءبولۋ جوسپارلانعان. بۇل - بيۋدجەتتىڭ جالپى شىعىسىنىڭ شامامەن 5,3 پايىزى، ياعني ەكى ميلليارد اقش دوللارىن قۇرايدى. ارمياعا قىرۋار قارجى بولىنسە دە، حالىقارالىق ساراپشىلار ەلدىڭ اسكەري قۋاتىن ءالسىز دەپ باعالايدى. قازاقستان قارۋلى كۇشتەرى ناقتى قۇرامى اسكەري قۇپيا بولعانىمەن، ءتۇرلى دەرەك بويىنشا، ونىڭ سانى 60-65 مىڭ ادام شاماسىندا دەپ باعالانعان.

ال باتىستىڭ تاعى ءبىر ينستيتۋتى - Global Firepower زەرتتەۋ ۇيىمىنىڭ دەرەگى بويىنشا، اسكەري قۋات رەيتينگىندە قازاقستان 106 ەلدىڭ ىشىندە 80 ورىندى يەلەنگەن. بۇل رەيتينگتە 21 ورىندا تۇرعان ۋكراينا بولسا قارۋ-جاراعىنىڭ 90 پايىزى ەسكىرگەن دەپ سانالادى. ۋكرايناداعى سوڭعى وقيعالار ەلدىڭ قارۋلى كۇشتەرىنىڭ شىعىستاعى سەپاراتيستەرگە قارسى تۇرۋعا قاۋقارسىز ەكەنىن كورسەتىپ وتىر.

اسكەري دوكتريناعا سايكەس، مەملەكەت جوعارى دارەجەلى شيەلەنىس كەزىندە اسكەري قاۋىپسىزدىكتى قامتاماسىز ەتەتىن ۇجىمدىق جۇيەلەردىڭ كومەگىنە سۇيەنەدى. قازاقستان ۇجىمدىق قاۋىپسىزدىك كەلىسىمشارتى ۇيىمى (ۇقكۇ) جانە شانحاي ىنتىماقتاستىعى ۇيىمى (شىۇ) سياقتى ۇجىمدىق ۇيىمدارعا مۇشە. بۇل ەكى ۇيىمنىڭ نەگىزگى ويىنشىلارى – رەسەي مەن قىتاي. اسكەري الەۋەتى جاعىنان ەكى ەلدىڭ ارميالارى اقش ارمياسىنان كەيىن ەكىنشى جانە ءۇشىنشى ورىندا تۇر.

اباي-اقپارات