بەيسەنبى, 28 قاڭتار 2021
جاڭالىقتار 3259 0 پىكىر 30 مامىر, 2014 ساعات 10:49

الەم تۇركىلەرىنىڭ III فورۋمى وتۋدە

تۇركيانىڭ ەدىرنە قالاسىندا الەم تۇركىلەرىنىڭ III فورۋمى ءوز جۇمىسىن باستادى. بۇل تۋرالى تۇركى اكادەمياسىنىڭ ءباسپاسوز قىزمەتىنە سىلتەمە جاساپ BAQ.KZ حابارلادى.  

جيىننىڭ سالتاناتتى اشىلۋ ءراسىمى ەدىرنە قالاسى II. بايازيت كۋلليەسي ساعلىك مۋزەيىندە بولدى. كەشە ەكمەكچيزادە احمەت پاشا كەرۆانسارايىندا سەكتسيا جۇمىستارى ءوتتى. القالى جيىندا تۇركى ەلدەرىنىڭ مادەنيەتى مەن ءتۋريزمى، تۇرىك جانە ارميان دياسپورالارى، قوعامدىق ديپلوماتيانىڭ مۇمكىندىكتەرى مەن تاۋەكەلدىلىكتەرى تالقىعا ءتۇستى. تۇرىك ازيا ستراتەگيالىق زەرتتەۋ ورتالىعىنىڭ (TASAM) ۇيىمداستىرۋىمەن جيىن بيىل ءۇشىنشى مارتە وتۋدە. تۇركى الەمى مەن تۇركى دياسپورالارىنا ارنالعان فورۋمعا 60-قا جۋىق ەلدەن عالىمدار، مەملەكەت قايراتكەرلەرى، ديپلوماتتار، جۋرناليستەر، ازاماتتىق ۇيىم جانە زيالى قاۋىم وكىلدەرى قاتىسۋدا. 
بيىلعى جيىننىڭ ءبىر ەرەكشەلىگى - تۇركى الەمىنە بايلانىستى تۇڭعىش رەت 11 نوميناتسيا بويىنشا «قىزىل الما» سىيلىعى بەرىلەدى. ول تۇركى الەمىنىڭ كاسىپكەرلىك، ونەر، مادەنيەت، تەحنولوگيا، ديپلوماتيا، عىلىم ت.ب سالالارىندا ۇزدىكتەرگە ارنالعان ماراپات. مۇنداي سىيلىق تاعايىنداۋ ماسەلەسى بىلتىر ساۋىردە ىستامبۇل قالاسىندا وتكەن الەم تۇركىلەرىنىڭ II فورۋمىندا كوتەرىلىپ، شەشىمىن تاپقان ەدى. فورۋم اياسىندا الەم تۇركىلەرى فورۋمى اقساقالدار كەڭەسىنىڭ ەكىنشى ءماجىلىسى وسى قالادا وتەتىن بولادى. بۇل كەڭەسكە ەلىمىزدىڭ اتىنان يۋنەسكو-نىڭ قازاقستانداعى وكىلى اقىن ولجاس سۇلەيمەنوۆ مۇشە. 

 

اباي-اقپارات

 

0 پىكىر