الماتى تۇرعىندارى ءۇشىن جازدىڭ باستاۋى ورتاق پايدالانۋعا ارنالعان جاڭا دەمالىس الاڭىنىڭ اشىلۋىمەن باستالدى. قالا سىرتىنداعى دەمالىس ورنىن اشۋعا «ەفەس قازاقستان» كومپانياسىنىڭ قولداۋ كورسەتۋىمەن «PosadiDerevo.kz» رەسپۋبليكالىق قوعامدىق بىرلەستىگى باستاما بەردى.

بۇل ۇيىمداستىرۋشىلاردىڭ «تازا قالا» جوباسى شەڭبەرىندە بىرلەسە اتقارىپ وتىرعان ەكىنشى تاجىريبەسى، ورتاق پايدالانۋعا ارنالعان العاشقى الاڭ وتكەن جىلى مەدەۋگە بارار جولدىڭ بويىندا سەلدەن قورعاۋ بوگەتىنىڭ اۋماعىندا (قۇزعا ورمەلەۋشىلەردىڭ تاۋى) قۇرىلدى.

بيىلعى جىلى جاڭا دەمالىس ورنى ناۋاي كوشەسى مەن ءال-فارابي داڭعىلىنىڭ قيىلىسىنداعى تابيعي ساياباقتا (تۇڭعىش پرەزيدەنت اتىنداعى ساياباقتىڭ كولىك تۇراعىنان جوعارىدا) ورنالاسقان. وندا سپورتپەن اينالىسىپ، اتكەنشەك تەبۋگە، توبەشىكتەن سىرعاناۋعا ارنالعان قۇرىلىستار بار. جوبانىڭ ماقساتى قالا تۇرعىندارىنىڭ مادەني دەمالىسىنا جايلى جاعدايلاردى جاساۋ، بەلسەندى ءومىر سالتى مەن تابيعاتقا دەگەن ۇقىپتى قاتىناستى ناسيحاتتاۋ بولىپ تابىلادى.

الاڭعا كەلۋشىلەرگە ارناپ ەكولوگيالىق ماسەلەر جانە قوقىستى ءتۇر-تۇرىنە ءبولىپ جيناۋ بويىنشا ويىن تۇرىندەگى تاقىرىپتىق ترەنينگ وتكىزىلىپ، قولدانىستا جۇرگەن ەكولوگيالىق باعدارلامالار تۋرالى ايتىلدى. باعدارلاما ويىندارمەن جانە مەرەكەلىك اسپەن جالعاستىرىلدى.

انار قاليەۆا - «PosadiDerevo.kz» رەسپۋبليكالىق قوعامدىق بىرلەستىگىنىڭ ۇيلەستىرۋشىسى:

«ەكولوگيالىق قوزعالىستىڭ نەگىزگى مىندەتتەرى – الماتى قالاسى ماڭىنداعى ۇيىمداسپاعان دەمالىس ورىندارىن جاقسارتۋ، كورىكسىز قوعامدىق ورىنداردى ۋاقىتتى وتكىزۋگە ارنالعان جايلى اۋماقتارعا اينالدىرىپ، قايتا جابدىقتاۋ، قورشاعان ورتانى قورعاۋ، تابيعاتقا دەگەن ۇقىپتى قاتىناستى قالىپتاستىرۋ. مۇنىڭ بارلىعى قالا ىشىندەگى جانە قالا سىرتىنداعى دەمالىس اۋماقتارىن جانداندىرۋ ءۇشىن، قالا تۇرعىندارى تابيعاتقا شىققان كەزدە تازا اۋادا، ءوز وتباسىلارىمەن جايلى دەمالا الۋى ءۇشىن وتكىزىلۋدە».

«ەفەس قازاقستان» كومپانياسى كورپوراتيۆتىك الەۋمەتتىك جاۋاپكەرشىلىككە جانە سايكەسىنشە قازاقستاندىقتاردىڭ، قالا تۇرعىندارىنىڭ ءومىر ساپاسىن جاقسارتۋعا باعىتتالعان جوبالارعا ەرەكشە كوڭىل بولەدى. وسى دەمالىس الاڭى كومپانيانىڭ وڭتۇستىك استانا تۇرعىندارىنا ارناپ جاساعان كەزەكتى سىيلىعى بولىپ وتىرىپ، بۇعان دەيىن ءبىز مەدەۋگە بارار جولداعى الاڭدى تۇزەگەن بولاتىنبىز»، - دەدى «ەفەس قازاقستان» جك اق-نىڭ كورپوراتيۆتىك قاتىناستار دەپارتامەنتىنىڭ ديرەكتورى شىڭعىس قاسكەەۆ.