جەكسەنبى, 29 قاراشا 2020
COVID-19 قازاقستاندا. جۇقتىرعاندار — 130865. جازىلعاندار — 116187. قايتىس بولعاندار — 1990
بيلىك 5334 0 پىكىر 3 شىلدە, 2014 ساعات 10:24

"ماڭگىلىك ەل" ءمۇشايراسى مارەگە جەتتى

استانا كۇنىنىڭ قۇرمەتىنە ساكەن سەيفۋللين مۇراجايى وسىمەن ءتورتىنشى رەت وتكىزىپ وتىرعان ءداستۇرلى ءمۇشايرا ءوز مارەسىنە جەتتى. بيىل «ماڭگىلىك ەل – ۇلت مۇراتى» ايدارىمەن جاريالانعان جىر بايگەسىنە ەلىمىزدىڭ تۇكپىر-تۇكپىرىنەن، قىتاي حالىق رەسپۋبليكاسىنان، مونعوليادان الپىستان استام اقىننىڭ شىعارماسى كەلىپ ءتۇستى.

بايگەدە باعىن سىناعان اقىنداردىڭ تاقىرىپتى تەرەڭنەن قوزعاپ، كەڭىنەن قامتىپ جىرلاۋعا بارىن سالعاندىعى بايقالادى. اسىرەسە، بيىلعى ءمۇشايرادا ەلباسىنىڭ «ماڭگىلىك ەل» ۇلتتىق يدەياسىنا بەلسەنە ءۇن قوسقان جاڭا ەسىمدەر– جاس اقىندار قاتارىنىڭ كوپ بولعانى قۋانتادى.

اكادەميك سەيىت قاسقاباسوۆ توراعالىق ەتكەن، قۇرامىندا جازۋشى قويشىعارا سالعاراۇلى، اقىندار نەسىپبەك ايتۇلى، سەرىك اقسۇڭقارۇلى، وڭايگۇل تۇرجان بار قازىلار القاسى دوداعا تۇسكەن شىعارمالاردى مۇقيات سارالاپ، مىناداي شەشىم شىعاردى: باس جۇلدە – تەمىر تۇلپاردى ارمان شەريزاتوۆ يەلەندى. ءبىرىنشى ورىندى (1 ميلليون 500 مىڭ تەڭگە) اقسۇيرىك ىزمۇقانوۆا قانجىعالادى. ەكى ەكىنشى ورىندى (800 مىڭ تەڭگەدەن) قاراعاندىلىق قوس اقىن – ابزال بوكەن مەن ءىلياس مۇقاەۆ السا، ءۇشىنشى ورىنعا تىگىلگەن ءۇش جۇلدەنى (400 مىڭ تەڭگەدەن) رافاەل نيازبەكوۆ، كەنجەباي احمەتوۆ جانە تالعات ەشەنۇلى ءوزارا ءبولىستى.

بەس ىنتالاندىرۋ سىيلىعىن (150 مىڭ تەڭگەدەن) موڭعو­ليالىق قارت اقىن شىناي راحمەتۇلى، الماتىلىق باتىق ءماجيتۇلى، قىتاي حالىق رەسپۋبليكاسىنىڭ ازاماتى سەرىك ءتۇسىپحانۇلى، اقتوبەلىك بالتابەك نۇرعاليەۆ، اياگوزدىك جاس تالاپكەر ءبىرجان احمەر ەنشىلەدى. سونداي-اق، ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ رەكتورى ەرلان سىدىقوۆ، استانا قالالىق ءتىل باسقارماسىنىڭ باستىعى ەربول تىلەشوۆ، «فوليانت» باسپاسىنىڭ ديرەكتورى نۇرلان يسابەكوۆ تاعايىنداعان ءۇش ارناۋلى سىيلىق (100 مىڭ تەڭگەدەن) باقىتجان توباياقوۆقا، جارىلقاسىن بورانباەۆ پەن گۇلجاينار قالديناعا بۇيىردى.

جۇلدە العان جانە ءمۇشايرا قورجىنىنا كەلىپ تۇسكەن شىعارمالاردىڭ تاڭداۋلىلارى جىل اياعىنا دەيىن جەكە كىتاپ بولىپ شىعادى. جۇلدەگەرلەردى ماراپاتتاۋ ءراسىمى استاناداعى «كونگرەسس-حولل» سارايىندا 1 شىلدە كۇنى ساعات 18.00-دە ونەر جۇلدىزدارىنىڭ قاتىسۋىمەن وتەدى.

سەرىكحان سابىربەكوۆ،
س.سەيفۋللين مۇراجايى ديرەكتورىنىڭ ورىنباسارى

"استانا اقشامى"

0 پىكىر