جۇما, 29 ناۋرىز 2024
ساتيرا 6141 0 پىكىر 10 شىلدە, 2014 ساعات 10:31

مۇحتار شەرىم. جاپپاي جىلاي باستادىق...

بەلگىلى ساتيريك-جازۋشى، قازاقستان جازۋشىلار وداعىنىڭ مۇشەسى مۇحتار شەرىمنىڭ كەزەكتى تاعى ءبىر كىتابى «ناۋرىز» باسپاسىنان جارىق كوردى. «قۇداعي قۇشاقتاي بەرەدى»، «وبشىم، ادام ەمەسسىڭدەر»، «قاشقاندار مەن قۋعاندار»  جانە ءتورت تومدىق ساتيرالىق كىتاپتار اۆتورىنىڭ  كەزەكتى دۇنيەسى  –«كۇلكى–ومىر كىلتى» دەپ اتالادى.  «وڭتۇستىك قالامگەرلەرىنىڭ كىتاپحاناسى» سەرياسىمەن وقىرماندارىنا جول تارتقان كىتاپتىڭ جاۋاپتى شىعارۋشىسى- بەلگىلى جۋرناليست-جازۋشى اتانبەك ناۋرىز. سىقاقشىنىڭ بۇل ەڭبەگى ورازا ۇستايتىن مۇسىلماندارعا رۋحاني كومەك رەتىندە ۇسىنىلىپ وتىر.  العاشقى بەتتەرىندە ورازا كەستەسى، ناماز ۋاقىتى، ورازا ۇستاۋشىعا 13 كەڭەس بەرىلگەن،  «وتىز كۇن ورازاعا–مۇحتار شەرىمنەن وتىز اۋىز كۇلكى» ايدارى دا ايشىقتالىپ جازىلعان، ءارى قاراي ساتيرا اۋىلىنا جول تارتىپ كەتەسىز.


  بۇرىن فۋتبول دەگەندە، دەلەبەم قوزبايتىن، كورشىم دە تەلەديدارداعى فۋتبولعا موينىن سوزبايتىن. مەن بار عوي: «وسى دوپ قۋالاپ، تالاسىپ جۇرگەندەر دە قىزىق-ەي! ءبىر دوپقا تالاسادى دا جاتادى. سپورت دۇكەنىندە  الا دوپتار كوپ ەمەس پە؟»-دەپ ويلايتىنمىن. ءتورت-بەس جىل بولدى، كورشىم ەكەۋمىز فۋتبول دەسە، «لەزبىمەن» باس تەرىمىزدى سىپىرىپ الىپ، تەرى تسەحىنا وتكىزەتىندەي كۇي كەشىپ ءجۇرمىز. ا-ايتپاقشى، وتكەن اپتادا ۇلكەنىم ۇيلەنەتىن بولىپ، بەتاشارعا دايىندالىپ جاتقانبىز.

     بالام قالادان بالشىق بوتقا جەگەندەي، بىرەۋ وزىنە بىردەڭە دەگەندەي، بۇرتيىپ، سۇمەتىلىپ، سۇمىرەيىپ كەلدى...

–اۋ، كەلىن قايدا؟ –دەپ سۇرادىم مەن.

–برازيليا جەڭىلىپ قالدى... –دەپ كەمسەڭدەدى ۇلىم.

–برازيليانىڭ قاتىسى قانشا؟

     سويتسەم،  بالام بىرەۋدىڭ قالىڭدىعىنا عاشىق ەكەن. ال، اناۋ جىگىت تە ۇيلەنۋگە اسىق ەكەن.  سودان ەكەۋى كەزدەسىپ: «گۋليا ەكەۋمىزبەن دە جۇرەدى. تالاسىپ جاتساق، جۇرت جىرتىلا كۇلەدى. ودان دا باستەسەيىك، وسى الەم چەمپيوناتىندا برازيليا كومانداسى جەڭسە، سەن «وتستاۆكاعا» كەتەسىڭ. ماحابباتىڭدى ۇرلەپ وشىرەسىڭ. جۇرەك ءلۇپىلىڭدى باسقا قىزعا كوشىرەسىڭ. ال، گەرمانيا جەڭىپ كەتسە، اي قايدام، جەڭىلىپ قالادى-اۋ! برازيليا  مىقتى-ى! گەرمانيا جەڭىپ كەتسە، مەن سەندەرگە «باقىتتى بولىڭدار!» دەيمىن... پيستولەتپەن اتىسىپ قايتەمىز؟ وسىلاي ەتەيىك...»- دەپتى. گۋلياعا بارادى عوي.

–نەگىزى... جالپى العاندا... قىسقاسى... نە عوي... مەن ەكەۋىڭدى دە سۇيەمىن... سولاي كەلىسسەڭدەر، ايتەۋىر بىرەۋىڭە تيمەگەندە قايتەيىن!»- دەپتى  ەكس-كەلىن. وزدەرىڭىز بىلەسىزدەر برازيليا گەرمانيادان «1-7» بولىپ  جەڭىلىپ قالدى عوي، ماسقارا بولعاندا! ءوزىمىز تەلەديداردىڭ ىشىنە كىرىپ كەتە جازدادىق قوي، ماسقارا بولعاندا! مەن دە برازيلياعا بۇيرەگىمدى بۇرىپ جۇرگەندە، قۇداي ۇرىپ قالدى عوي! برازيليا جەڭىلگەندە، تۋايىن دەپ تۇرعان سيىرىمنىڭ ءوزى تۇسىك تاستاپ، ءولى بۇزاۋ تۋعانىن قاراشى! برازيليا قاقپاسىنا گول كىرگەن سايىن موڭىرەپ، تىپىرشىپ، كوزدەرىنەن جاس پارلادى... قايران، برازيليا!  ەرتەڭىنە  كوشەگە شىقسام، كورشىم، جانە ىنىلەرى تاياق سۇيەنىپ جىلاپ تۇر. نە بولعانىن تۇسىنبەي قالدىم... اكە- شەشەسى  ۇيىندە ءجۇر... ءبىر قاراسام، ءبىر توپ قاتىن-قالاش، ەركەكەرى ارالاس، بوتاداي بوزداپ كەلەدى ەكەن. «برازيليا باۋىر-رە-ە-ە-ەم، باۋىر-رەم! اتاڭا نالەت جەتى گول جەلكەڭدى ءۇزىپ كەتتى-اۋ! فينالعا جەتە الماي، قىرشىنىڭنان قيىلدىڭ-اۋ، برازيلياجان... گەرمانيا جەتى گولعا جەتى شەلپەك ءپىسىرىپ، قۇدايى بەرىپ جاتقان شىعار؟ فۋتبولداعى توپىراعىڭ تورقا بولسىن، برازي-ي-ي-ليا...»-دەپ بەتسىزبايدىڭ ايەلى اڭىراعاندا، مەن دە كەمسەڭدەپ، اقىرىندا اقىرا جىلادىم-اي! كورشىممەن جىلاپ كورىستىم. نەگىزى، ءبىزدىڭ اۋىلدا جۇمىس جوق... جۇمىس جوق بولعان سوڭ، اۋىل بىتكەن ۇيلەرىندە جاتىپ الىپ، الەم چەمپيوناتىن كورەتىن. ەندى مىنە، كورشىم كورگەنبايدىڭ، ءبارىمىزدىڭ برازيليامىز «قايتىس» بولىپ، قابىرعامىزدى ۇستاپ كورسەك، كادىمگىدەي قايىسىپ، مايىسىپ كەتىپتى-ەي... اكەم ولگەندەي وكىرگەنىم-اي!  جۇرتقا قوسىلىپ، وتىرىك جىلاپ جۇرگەندەر دە بار. تۇككە تۇسىنبەي، «كىمىڭ ولسە دە، توپىراعى تورقا بولسىن...» دەپ جۇرگەندەر دە جەتەرلىك. مولدا جەتىپ كەلىپتى. برازيلياعا باعىشتاپ قۇران وقىلدى.  الا دوپقا «برازيليا» دەپ جازىپ، ونى قىر ەتەگىنە جەرلەپ قايتتىق... مىنە، ءبىزدىڭ اۋىلدىڭ فاناتتارى وسىنداي! كەشىرىڭىز، ءسىز قاي كومانداعا «بالەلشىك» ەدىڭىز؟ جىلاپ ءجۇرسىز بە؟ الدە، اسىر سالىپ، سەكىرىپ ءجۇرسىز بە؟ سەكىرىپ جۇرسەڭىز، سيراعىڭىزدى سىندىرامىن!

 

 Abai.kz

0 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1571
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2265
عيبىرات

قايسار رۋحتى عازيز جان

مۇحتار قۇل-مۇحاممەد 3565