دۇيسەنبى, 19 قازان 2020
COVID-19 قازاقستاندا. جۇقتىرعاندار — 109508. جازىلعاندار — 105030. قايتىس بولعاندار — 1768
46 - ءسوز 5761 1 پىكىر 19 تامىز, 2014 ساعات 12:52

«مۇڭدى» ستۋديا

...ستۋديادا جۇرەگىڭدى بۇلك ەتكىزەر ويناقى ساز ويناي جونەلدى. ونى ساحنانىڭ وڭ جاق بۇرىشىندا ورنالاسقان ۆوكالدى-اسپاپتى انسامبل شابىتتانا شارىقتاتىپ جاتىر. ۇرمالى ساز اسپاپتارىن سابالاعان ادەمى قىز ورنىندا بايىز تاۋىپ وتىرا الماي، قوس بۇيىرىنە كەزەك قوپاڭدايدى. كوڭىلدى اۋەننىڭ ىرعاعىمەن الدەنەگە ىنتىعا تۇسكەن كورەرمەن قاۋىم ىسقىرىپ-قىشقىرىپ، ىزى-قيقۋ جاساپ، قۇلاق تۇندىرار ۋ-شۋ ءسات سايىن ۇدەي بارادى. بۇكىل نازار – ساحنا تورىندەگى... ەڭسەلى ەسىكتە. ەلدىڭ ەسى كەتە ەنتەلەسكەنىنە قاراعاندا، الگى داربازادان قازىر بۇكىل حالىقتىڭ ىستىق ىقىلاسىنا بولەنگەن بولەكشە دارىن با، ەرەكشە قابىلەت يەسى مە، ءتىپتى، زەڭگىر كوكتىڭ سىرىن زەرتتەگەن عاجايىپ عارىشكەر مە...  سونداي ءبىر تۇلعا شىعا كەلەتىن ءتارىزدى.

راسىندا دا، ەسىك ەپتەپ اشىلا باستادى! كوپتەن كۇتكەن قۋانىشتى ءساتتىڭ تۋعانىن سەزگەن جۇرەكتەردىڭ دۇرسىلىمەن ۇندەسىپ، جەر تەپكىلەگەن مۋزىكانتتار قارقىنىن تىپتەن ۇدەتە ءتۇستى. اقىرى، مىنە، ول دا كورىندى! قادامىن نىق باسىپ، ساحنا ورتاسىنا باپپەن شىقتى دا، باقىتتان باسى اينالعان جۇرتتىڭ قوشەمەت-قولپاشىنا ابدەن ەتى ۇيرەنگەن اڭىز-ادامنىڭ كەيپىمەن كۇلىمسىرەي قول بۇلعاپ، حالقىنا سالەم مەزىرەتىن جاسادى. تىنىمسىز زىكىر سالىپ، زار كۇيىنە ابدەن جەتكەن انسامبل مۇشەلەرىنىڭ ءبىرى كەنەت ايرىقشا ايعايمەن الگى كىسىنىڭ ەسىمىن اتاپ جىبەرگەندە، جاڭاعى – جاڭاعى ما، كەۋدەسىن شاتتىق كەرنەگەن ەل ەسىنەن تانىپ قالا جازدادى!

قۇلشىنا سوعىلعان قىرعىن شاپالاقتى، اسا ريزاشىلىقپەن كۇلىمسىرەي تۇرىپ، وڭ قولىن جوعارى كوتەرە ارەڭ سايابىرلاتقان الگى كىسى ەندى بۇگىنگى كەشتە ءوزىنىڭ وتە قۇرمەتتى دە كۇردەلى قىزمەتىنە قول ۇشىن سوزار كومەكشىلەرىن تانىستىرۋعا كىرىستى. الدەن ۋاقتان بەرى ابىگەرلەنىپ، ابدەن قارا تەرگە تۇسكەن مۋزىكانتتاردىڭ ەڭبەگى ايتەۋىر ەش كەتپەي، ەڭ الدىمەن سولار اتالدى. سوسىن نوۋتبۋگىن تىزەسىنە قويىپ الىپ، قالىڭ بۇقارادان تولاسسىز كەلىپ جاتقان سۇراقتاردى سۇرىپتاپ وتىراتىن قاعىلەز قارا بالانىڭ دا كىم ەكەنىن ەل ءبىلدى. باسقا دا بارىپكەل-شاۋىپكەل، ويىنشى-تاسپىرشىلەر دە تۇگەل تاپتىشتەلدى. سودان كەيىن بارىپ الگى كىسى ستۋدياعا... كەلگەن قوناقتى شاقىردى!

باعانادان بەرى وسى كەشتىڭ باستى جۇلدىزى، وسى ساحنانىڭ ءسانى، وسى مەرەكەنىڭ ءمانى – الگى كىسى دەپ وتىرعانىمىزدا، ونىڭ ويدا جوقتا قوناق شاقىرعانى قالاي؟ ە، مەيلى، ەشتەڭە ەتپەس. «الگى كىسىنىڭ مەيمانى – ءبىزدىڭ دە مەيمانىمىز عوي» دەدى مە، ايتەۋىر كورەرمەن قاۋىم قوناق بەيشارانى دا ونشا قوشەمەتسىز قالدىرعان جوق...

«ويناساق تا ءبىراز جەرگە باردىق»، بىلەم، ەندى بارىنشا بايسالدى اڭگىمەگە كوشەيىك. «الگى كىسىمىزدىڭ» ءتىپتى دە قيالدان قۇراستىرىلعان كەيىپكەر ەمەس، «قازاقستان» ۇلتتىق تەلەارناسىنداعى «تۇنگى ستۋديادا – نۇرلان قويانباەۆ» اتتى كوشىرمە باعدارلامانىڭ كادۋىلگى جۇرگىزۋشىسى ەكەنىن وزدەرىڭىز باعانا-اق بايقاپ قويعان شىعارسىزدار (بۇ كۇندە كوشىرمەگە رەنجىمەيمىز، تەك «دۇرىستاپ كوشىرسە ەكەن» دەپ قانا تىلەيتىن بولدىق قوي). بالكىم، جوعارىداعى سيپاتتاما بارىسىندا ءبىز از-كەم اسىرەلەۋگە جول بەرىپ العان دا بولارمىز، الايدا، نەگىزىنەن باعدارلامانىڭ ءدال وسىنداي پارىقسىز پافوسپەن باستالاتىنىن جوققا شىعارا قويماسسىزدار دەپ ويلايمىن.

تەك باستالۋى عانا وسىلاي بولسا، قانەكي. جوق، باعدارلامانىڭ تۇتاس بويىندا جۇرگىزۋشىنىڭ ءوزىن وتە كەرەمەت جاقسى كورەتىنى، ۇنەمى «وزىنە كوپ الىپ قوياتىنى» ايقىن اڭعارىلىپ تۇرادى. شىن مانىندە تەلەجۇرگىزۋشى، جۋرناليست دەگەندەر – سۇحبات بەرۋشى تۇلعا مەن كورەرمەن (وقىرمان) اراسىن جالعاپ قانا وتىراتىن قاراپايىم دانەكەر ەمەس پە؟ بۇل مىندەتتى اتقارۋشىلاردىڭ بار ارتىقشىلىعى – تەلەراديو ەفيرلەرى مەن ءباسپاسوز بەتتەرىندە ءتۇر-ءتۇسى مەن اتى-ءجونىنىڭ ۇنەمى كورىنىپ وتىراتىنىندا عانا. ولاردىڭ بار ماقساتى – سۇحبات بەرۋشىنىڭ بولمىسىن، مىنەزىن، تابيعاتىن اشۋ، اقتارىلا سىر شەرتكىزۋ، كوكەيىندەگى ويىن ايتقىزۋ بولۋى كەرەك. نۇرلان قويانباەۆقا قاتىستىرا ايتساق، ونىڭ مىندەتى – ستۋديا قوناعىن جاراسىمدى قالجىڭدارمەن اقجارقىن اڭگىمەگە جەتەلەۋ، ءوزى ازىراق سويلەپ، مەيلىنشە مەيمانعا ماڭىز بەرۋ، تاپقىر ساۋالدار ارقىلى ونى شەشىلە سىرلاسۋعا ءماجبۇر ەتۋ، ت.س.س. بولۋعا ءتيىس قوي. 

بىراق، بىزدە وسى تەلەەكراننىڭ قاراما-قارسى بەتىندەگى قوس تاراپتىڭ اراسىنداعى دانەكەر ءرولىن قومسىنىپ، وزىنشە تۇلعا دارەجەسىنە كوتەرىلۋگە ۇمتىلاتىندار كوبەيدى. ولار ءبىرىنشى كەزەكتە ءوزى سويلەۋگە تىرىسادى، ستۋديا قوناقتارى ادەمى اڭگىمە ايتىپ جاتسا دا، اراعا سەبەپسىز، ورىنسىز كيلىگىپ، وزدەرىنىڭ قانداي كەرەمەت دانىشپان، بىلگىر، كورەگەن تەلەجۇرگىزۋشى ەكەنىن كورسەتكىسى كەلەدى. بۇل – بەينەلەپ ايتقاندا، «قىزمەت بابىن اسىرا پايدالانۋشىلىقتىڭ» ناق ءوزى! ارينە، جۇرگىزۋشىنىڭ وزىنە سەنىمدى بولۋى – كەرەك-اق قاسيەت. بىراق، بىرىنشىدەن، مۇنىڭ سوڭى «ايتەۋىر وزىمبىلەرمەندىككە» ۇلاسىپ كەتپەۋگە ءتيىس، ەكىنشىدەن، وزىڭە سەنۋ ءۇشىن دە ار جاعىڭدا بىردەڭە بولۋى كەرەك ەمەس پە؟ ءجۇرسىن ەرمانعا: «ايتىس تەلەديدارعا قاي جىلدان بەرى ءتۇسىرىلىپ كەلەدى؟» – دەپ سۇراق قوياتىن ن.قويانباەۆتىڭ قۇر سەنىم، قۇرعاق ماقتانىنان نە پايدا؟ سول سۇراقتىڭ جاۋابىن ءجۇرسىن اقىندى اۋرە قىلماستان، عالامتوردان-اق قاراي سالسا، بەس مينۋتتا تابار ەدى عوي. ەرىنبەي «گۋگلداي» قويسا، ج.ەرماننىڭ باق-تا جاريالانعان بۇكىل سۇحباتى الدىنان شىعا كەلەر ەدى. سولاردى تۇگەل شولىپ شىعىپ، باعدارلاماعا جان-جاقتى دايىندالىپ كەلۋگە نەگە تىرىسپايدى؟ «تۇنگى ستۋديا» جۇرگىزۋشىسىنىڭ كەلگەن قوناقتارعا قويىپ جۇرگەن ساۋالدارى كورەرمەن كوڭىلىن كوتەرۋدىڭ ورنىنا مۇڭ ۇيالاتادى. قالقامان ءساريندى ستۋدياعا شاقىرىپ الىپ، «وسىعان دەيىن قانشا كىتابىڭ شىقتى؟» دەپ سۇراعانىنان-اق، نۇرلان قويانباەۆتىڭ كىم ەكەنىن اڭعارۋعا بولادى. ءوزى قولىنداعى قاعازدان اقىننىڭ قاي بايقاۋدا قانداي اتاق، جۇلدە العانىن كورەرمەنگە داۋىستاپ وقىپ بەرىپ الىپ: «قازىر جاس اقىنداردى قولدايتىن قانداي بايقاۋلار بار؟» – دەپ سۇرايتىن جۇرگىزۋشىگە ايتار ءسوز بار ما جالپى؟ نەگە وسى مالىمەتتىڭ ءبارىن الدىن الا ءبىلىپ (بۇ زاماندا اقپارات دەگەن – پىشەن عوي!), ستۋديا قوناعىنىڭ ءوزىن تاڭ قالدىراتىن توسىن ساۋالدار ازىرلەۋگە بولمايدى؟ كىم بىلەدى، بالكىم، ن.قويانباەۆتىڭ دايىندالۋعا ونشا ۋاقىتى دا جوق شىعار. ولاي بولسا، باعدارلاما باسىنداعى وزىنە كەرەمەت قوشەمەت-قولپاش دامەتەتىن بەس مينۋتتى ءتيىمدى پايدالانسىن: مىنا جاقتا جۇرت ۋلاپ-شۋلاپ جاتقاندا، ول گريم بولمەسىنەن كورەرمەن الدىنا شىققانعا دەيىنگى ارالىقتا قوناعى تۋرالى اقپاراتپەن تانىسىپ شىعۋعا ابدەن ۇلگەرەدى... 

ساكەن سىبانباي

http://rgmedia.kz/

1 پىكىر